¿Á chí Estados Unidos ka̱na religión ña̱ kúúmií na̱ testigo Jehová?

Sede mundial ña̱ kúúmiíndi̱ íyoña chí Estados Unidos. Soo religión ña̱ kúúmiíndi̱ su̱ví chí Estados Unidos níkanaña. Yóʼo va̱xi sava ña̱ káʼa̱n nda̱chun va̱ása íyoña saá:

• Savana káʼa̱nna ña̱ tu̱ʼun secta káʼa̱nña xa̱ʼa̱ iin tiʼvi loʼo na̱ yiví na̱ ke̱e ti̱xin iin religión. Soo ndi̱ʼi̱ na̱ testigo Jehová su̱ví ti̱xin iin religión níkeendi̱. Chi ña̱ kéʼéndi̱ kúú ña̱ chíka̱a̱ndi̱ ndee̱ ña̱ keʼéndi̱ nda̱a̱ táki̱ʼva xi̱keʼé na̱ cristiano na̱ ni̱xi̱yo tá siglo nu̱ú.

• Yáʼaka 230 país xíʼin ñuu válí íyo na̱ testigo Jehová na̱ chíka̱a̱ní ndee̱ káchíñu nu̱ú Jehová. Ta ni nda̱a̱ ndáaka nu̱ú ndóondi̱, iinlá Jehová xíʼin ta̱ Jesucristo nda̱kú íyo inindi̱ xíʼin, ta su̱ví xíʼin gobierno na̱ íyo chí Estados Unidos á xíʼin inkakana (Juan 15:19; 17:15, 16).

• Ndi̱ʼi̱ kándíxandi̱ ña̱ sánáʼa̱ ña̱ Biblia, ta su̱ví ña̱ níkaʼyí nda̱a̱ ni iin na̱ níʼi yichi̱ nu̱ú na̱ veʼe-ñu̱ʼu na̱ íyo chí Estados Unidos (1 Tesalonicenses 2:13).

• Ndi̱ʼi̱ ndíku̱nndi̱ ta̱ Jesucristo ta su̱ví na̱ yiví (Mateo 23:8-10).