¿Á va̱ása va̱ʼa keʼéyó tatuaje ku̱ñuyó?
Ña̱ káʼa̱n Biblia xa̱ʼa̱ ña̱yóʼo
Iin yichi̱ kuití káʼa̱n Biblia xa̱ʼa̱ tatuaje, nu̱ú Levítico 19:28, nu̱ú káchiña: “Va̱ása sanánandó tatuaje ñii̱ndó”. Jehová ta̱xira ley yóʼo ndaʼa̱ na̱ ñuu Israel saáchi na̱ ñuu na̱ xi̱ndoo yatin xíʼinna xi̱kaʼyína ki̱vi̱ ndióxi̱na ku̱ñuna ta kǒo níxi̱kuni̱ra ña̱ keʼé na̱ ñuu Israel ña̱yóʼo (Deuteronomio 14:2). Ni va̱ása ndíku̱nkayó Ley ña̱ ta̱xi Jehová ndaʼa na̱ ñuu Israel, soo ndáyáʼviní ndakanixi̱níyó xa̱ʼa̱ ña̱yóʼo.
¿Á va̱ʼa sanána na̱ cristiano tatuaje ñii̱na?
Ná ka̱ʼa̱nyó xa̱ʼa̱ sava texto ña̱ kivi chindeétáʼan xíʼinyó.
“Saátu ná ñaʼá [...] ná kiʼinná kuenta xíʼin ki̱ʼva ña̱ ndásaviíná miíná ta viíní ná ndakanixi̱níná xa̱ʼa̱ ña̱yóʼo ta ná kooña xíʼin ña̱ to̱ʼó” (1 Timoteo 2:9). Saátu chíndeétáʼan texto yóʼo xíʼin na̱ ta̱a. Ña̱ va̱ʼa ixato̱ʼó na̱ cristiano ña̱ ndákanixi̱ní inkana, xíniñúʼu kiʼinna kuenta xíʼin ki̱ʼva ña̱ náʼa̱na.
Savana sánanana tatuaje ñii̱na ña̱ va̱ʼa na̱ʼa̱na ña̱ kivi keʼéna ña̱ kúni̱ miína. Soo ña̱yóʼo kúú ña̱ káʼa̱n Biblia xíʼin na̱ cristiano: “Ndataxindó miíndó ta saátu ña̱ tákundó ndaʼa̱ Ndióxi̱, ta ná kooña nda̱a̱ táki̱ʼva íyo iin ña̱ yi̱i̱ ña̱ ndakiʼinra; chi saá kúú ña̱ kuniñúʼundó ndiʼi ña̱ ndákanixi̱níndó ña̱ ndasakáʼnundó Ndióxi̱” (Romanos 12:1). Ña̱ vií ndákanixi̱ní iin na̱ yiví, chíndeétáʼanña xíʼinna ña̱ ndakanixi̱nína nda̱chun kúni̱na sanánana tatuaje ñii̱na. Sana ña̱ kúni̱na kúú ña̱ keʼéna ña̱ kéʼé inka na̱ yiví á na̱ʼa̱na ndáa na̱ yiví kúú na̱ kítáʼanna xíʼin. Xíniñúʼu nda̱ka̱tu̱ʼunna miína xa̱ʼa̱ ña̱yóʼo: “¿Ndáaña keʼíi̱ tá va̱ása kútóokai̱ tatuaje yóʼo? ¿Á ndandikó-inii̱ xa̱ʼa̱ ña̱ ke̱ʼíi̱ña?”. Tá ná ndakanixi̱nína xa̱ʼa̱ ña̱yóʼo, vií ndaka̱xinna ndáaña keʼéna (Proverbios 4:7).
“Na̱ ndákani vií xi̱ní xa̱ʼa̱ iin chiñu ña̱ kéʼéna, viíní kánaña, soo na̱ kamaní kéʼéña va̱ása va̱ʼa kánaña” (Proverbios 21:5). Ku̱a̱ʼání yichi̱, kamaní ndáka̱xinna ña̱ sanánana tatuaje ñii̱na. Soo na̱ ndáka̱xin keʼé ña̱yóʼo ku̱a̱ʼání tiempo xóʼvi̱na xa̱ʼa̱ ña̱ ke̱ʼéna. Na̱ kéʼé ña̱yóʼo kivi ixayo̱ʼvi̱ña xíʼinna ña̱ ndani̱ʼína chiñu. Ta saátu yo̱ʼvi̱ní ña̱ sandóona tatuaje ñii̱na ta yaʼviní kánaña. Ku̱a̱ʼání na̱ yiví ndándikó-inina xa̱ʼa̱ ña̱ sa̱nánana tatuaje ñii̱na. Xa̱ʼa̱ ña̱yóʼo íyo ku̱a̱ʼání na̱ káchíñu ña̱ sándoona tatuaje.