Reino Ndióxi̱, ¿á iin ña̱ ndíka̱a̱ níma̱ na̱ yiví kúúña?
Ña̱ káʼa̱n Biblia xa̱ʼa̱ ña̱yóʼo
Ña̱ Reino Ndióxi̱ su̱ví ña̱ ndíka̱a̱ níma̱ na̱ ndásakáʼnu Ndióxi̱ kúúña.a Nu̱ú Biblia káxi va̱ʼa káʼa̱nña míí íyo reino yóʼo, saáchi káchiña “reino Ndióxi̱ ña̱ íyo chí ndiví” (Mateo 4:17). Saátu náʼa̱ña ña̱ ndixa íyoña ta xa̱a̱ xáʼndachíñuña chí ndiví. Ná kotoyó.
Ti̱xin Reino Ndióxi̱ íyo na̱ xáʼndachíñuña nu̱ú, kúúmiíña ley, ta ña̱yóʼo kúú ña̱ sáxi̱nu ña̱ kúni̱ Ndióxi̱ chí ndiví ta saátu nu̱ú ñuʼú yóʼo (Mateo 6:10; Apocalipsis 5:10).
Reino Ndióxi̱ kaʼndachíñuña “nu̱ú ndiʼi ñuu, ñuu válí ta saátu nu̱ú ndiʼika na̱ káʼa̱n ndiʼi tu̱ʼun nu̱ú ñuʼú yóʼo” (Daniel 7:13, 14). Su̱ví na̱ yiví kúú na̱ níndaka̱xin gobierno yóʼo; chi Ndióxi̱ kúú ta̱ nda̱kaxinña ta kaʼndachíñuña nu̱ú ndiʼi na̱ yiví (Salmo 2:4-6; Isaías 9:7).
Ta̱ Jesús ni̱ka̱ʼa̱nra xíʼin na̱ apóstolra ña̱ koona xíʼinra ti̱xin Reinora chí ndiví. ¿Nda̱chun koona xíʼinra? Miíra ni̱ka̱ʼa̱n ña̱yóʼo: “Ta koondó xíʼi̱n [...] nu̱ú tayi̱ nu̱ú tiinndó ku̱a̱chi”, ña̱yóʼo kúni̱ kachiña, ña̱ koona rey xíʼinra (Lucas 22:28, 30).
Reino Ndióxi̱ sandíʼi-xa̱ʼa̱ña na̱ sáa̱-ini xíni miíra (Salmo 2:1, 2, 8, 9; 110:1, 2; 1 Corintios 15:25, 26).
Xíʼin ña̱yóʼo sánáʼa̱ Biblia, Reino Ndióxi̱ ña̱ íyo chí Ndiví va̱ása ndíka̱a̱ña níma̱yó ña̱ kaʼndachíñuña. Kúnda̱a̱-iniyó Reino Ndióxi̱ su̱ví ña̱ ndíka̱a̱ níma̱yó kúúña. Ña̱ sanáʼa̱ Biblia “tu̱ʼun va̱ʼa xa̱ʼa̱ Reino Ndióxi̱” á “ña̱ ka̱ʼa̱nna xa̱ʼa̱ Reino Ndióxi̱” kivi ta xíniñúʼu nasamaña níma̱yó (Mateo 13:19; 24:14).
¿Nda̱chun ni̱ka̱ʼa̱n ta̱ Jesús: “Reino Ndióxi̱ ndíka̱a̱ña iniyó”?
Nu̱ú sava Biblia sándaya̱ʼana ña̱ káʼa̱n Lucas 17:21 ta káchiña “reino Ndióxi̱ ndíka̱a̱ña inindó” (Biblia Americana San Jerónimo). Xa̱ʼa̱ ña̱kán sava na̱ yiví ndákanixi̱nína Reino Ndióxi̱ ndíka̱a̱ña níma̱yó. Soo, ña̱ va̱ʼa kunda̱a̱ va̱ʼa iniyó xíʼin versículo yóʼo xíniñúʼu kotoyó ndiʼi ña̱ káʼa̱nña xa̱ʼa̱.
Va̱ása kiviví kundika̱a̱ Reino Ndióxi̱ níma̱ na̱ xi̱kuni kaʼní ta̱ Jesús
Ta̱ Jesús ni̱ka̱ʼa̱nra tu̱ʼun yóʼo xíʼin na̱ fariseo, na̱ xi̱niʼi yichi̱ nu̱ú na̱ veʼe-ñu̱ʼu ta na̱yóʼo xi̱sa̱a̱-inina xi̱xininara ta nda̱a̱ xi̱kuni̱na kaʼnínara (Mateo 12:14; Lucas 17:20). Na̱ ta̱a yóʼo ndi̱va̱ʼaní-inina ¿á ña̱ kán xi̱kuni̱ kachi ta̱ Jesús ña̱ ndíka̱a̱ Reino Ndióxi̱ níma̱na? Va̱ásaví, miíra ni̱ka̱ʼa̱n ña̱yóʼo: “Inindó chútúña xíʼin ña̱ vatá saátu xíʼin ña̱ va̱ása va̱ʼa” (Mateo 23:27, 28).
Inka Biblia káxiva káʼa̱nña xa̱ʼa̱ ña̱ káʼa̱n Lucas 17:21. Tá kúú ña̱ El Nuevo Testamento original káchiña: “Reino Ndióxi̱ íyoña yatin si̱índó”, ta ña̱ Traducción del Nuevo Mundo de las Santas Escrituras (con referencias) káchiña: “Reino Ndióxi̱ xa̱a̱ íyoña xíʼinndó”. Tásaá, ¿ndáa ki̱ʼva xi̱ndika̱a̱ Reino Ndióxi̱ si̱ín na̱ fariseos á xíʼinna? Saáchi ta̱ Jesús ta̱ nda̱kaxin Ndióxi̱ ña̱ koora rey ni̱xi̱yora xíʼinna (Lucas 1:32, 33).
a Ku̱a̱ʼání na̱ yiví sánáʼa̱na Reino Ndióxi̱ ndíka̱a̱ña ini na̱ yiví, ña̱yóʼo kúni kachiña ña̱ ndíka̱a̱ña níma̱na. Tá kúú na̱ veʼe-ñu̱ʼu na̱ naní, Convención de Bautistas del Sur, ña̱ íyo chí Estados Unidos ni̱ka̱ʼa̱nna xa̱ʼa̱ Reino Ndióxi̱ “ña̱ xáʼndachíñuña níma̱ na̱ yiví ta xáʼndachíñuña nu̱ú ña̱ tákuna”. Libro ña̱ naní Jesús de Nazaret, ta̱ papa Benedicto XVI káchira: “Reino Ndióxi̱ xáa̱ña nda̱a̱ níma̱ na̱ yiví. Ña̱yóʼo kúú ña̱ kéʼévaña”.