¿Nda̱chun síín íyo ña̱ ndákaʼán na̱ testigo Jehová ña̱ ni̱xi̱ʼi̱ ta̱ Jesús nu̱ú inka religión?

Ndi̱ʼi̱ na̱ testigo Jehová, ndíku̱ndi̱ ña̱ káʼa̱n Biblia xa̱ʼa̱ ndáa ki̱ʼva xíniñúʼu ndakaʼányó ña̱ ni̱xi̱ʼi̱ ta̱ Cristo, á ña̱ naní “Cena del Señor” (1 Corintios 11:20). Soo, ki̱ʼva ña̱ ndákaʼán inka na̱ religión xa̱ʼa̱ ña̱ ni̱xi̱ʼi̱ ta̱ Jesús, kǒo kítáʼanña xíʼin ña̱ káʼa̱n Biblia.

¿Nda̱chun kéʼéyóña?

Kéʼéyóña chi saá ndákaʼányó ña̱ ke̱ʼé ta̱ Jesús xa̱ʼa̱yó, ta saátu náʼa̱yó ña̱ táxiyó tíxa̱ʼvi ndaʼa̱ Ndióxi̱ (Mateo 20:28; 1 Corintios 11:24). Ña̱ ndakaʼányó xa̱ʼa̱ ña̱ ni̱xi̱ʼi̱ ta̱ Jesús su̱ví iin sacramento kúúña ni su̱ví iin ña̱ kéʼéna ña̱ ndoo ku̱a̱china kúúña.a Saáchi, Biblia káʼa̱nña ña̱ kivi koo káʼnu-ini Ndióxi̱ xa̱ʼa̱ ku̱a̱chíyó tá kándíxayó ta̱ Jesús, ta su̱ví tá ndákuatuyó á tá kéʼéyó inkaka ña̱ʼa (Romanos 3:25; 1 Juan 2:1, 2).

¿Nda̱saa yichi̱ xíniñúʼu keʼéyóña?

Ta̱ Jesús ni̱ka̱ʼa̱nra xíʼin na̱ discípulora ña̱ ndakaʼánna xa̱ʼa̱ ña̱ ni̱xi̱ʼi̱ra, soo, kǒo níka̱ʼa̱nra xíʼinna nda̱saa yichi̱ xi̱xiniñúʼu keʼénaña (Lucas 22:19). Sava na̱ yiví káʼa̱nna ña̱ ndiʼi yo̱o̱ xíniñúʼu ndakaʼányó xa̱ʼa̱ ña̱yóʼo; savatuna káʼa̱n, ña̱ semana tá semana á iin tá iin ki̱vi̱ xíniñúʼu keʼéyóña, inkatuna káʼa̱n, ña̱ ku̱a̱ʼá yichi̱ nu̱ú ña̱ iin ki̱vi̱ xíniñúʼu keʼéyóña, íyotu na̱ káʼa̱n ña̱ iin tá iinyó kivi ndaka̱xin ama kúni̱yó keʼéyóña. Soo, íyo sava ña̱ʼa ña̱ xíniñúʼu kunda̱a̱-iniyó xa̱ʼa̱.

Ta̱ Jesús chi̱ndúʼura xa̱ʼa̱ ña̱ Cena del Señor mií ki̱vi̱ tá xi̱ndakaʼán na̱ judío ña̱ Pascua; ta, tá ni̱ya̱ʼa loʼo hora xa̱ʼnínara (Mateo 26:1, 2). Ña̱yóʼo su̱ví ña̱ níkuu sana miíví kúúña. Tu̱ʼun Ndióxi̱ chítáʼanña ña̱ ni̱xi̱ʼi̱ ta̱ Jesús xíʼin ndikachi tí xi̱xaʼnína tá xi̱xiyo Pascua (1 Corintios 5:7, 8). Iin yichi̱ nu̱ú ña̱ iin ku̱i̱ya̱ xi̱ndakaʼanna ña̱ Pascua (Éxodo 12:1-6; Levítico 23:5). Na̱ cristiano na̱ xi̱ndoo tá siglo nu̱ú iin yichi̱ nu̱ú ña̱ iin ku̱i̱ya̱ xi̱ndakaʼánna ña̱ ni̱xi̱ʼi̱ ta̱ Jesús, ndi̱ʼi̱ na̱ testigo Jehová kéʼénndi̱ táki̱ʼva xi̱keʼé na̱yóʼo, saáchi ndíku̱ndi̱ ña̱ va̱xi nu̱ú Biblia.b

Fecha xíʼin hora

Yichi̱ ña̱ chi̱ndúʼu ta̱ Jesús nu̱úyó chíndeétáʼanña xíʼinyó ña̱ kunda̱a̱-iniyó nda̱saa yichi̱ xíniñúʼu ndakaʼányó xa̱ʼa̱ ña̱yóʼo, ta saátu chíndeéña miíyó ña̱ kunda̱a̱-iniyó ndáa hora xíʼin ndáa ki̱vi̱ xíniñúʼu keʼéyóña. Tá 14 tí nisán ña̱ ku̱i̱ya̱ 33 tá xa̱a̱ ni̱ki̱ʼvi ñu̱ʼu á ña̱ ka̱ndii ke̱ʼé ta̱ Jesús ña̱yóʼo, nda̱a̱ táki̱ʼva va̱xiña nu̱ú calendario lunar ña̱ xi̱xiniñúʼuna tá ya̱chi (Mateo 26:18-20, 26). Ndi̱ʼi̱ na̱ testigo Jehová kéʼénndi̱ nda̱a̱ táki̱ʼva xi̱keʼé na̱ cristiano na̱ xi̱ndoo tá ya̱chi̱, ña̱kán ndákaʼánndi̱ ña̱ ni̱xi̱ʼi̱ ta̱ Jesús mií fecha yóʼo.c

14 tí nisán ña̱ ku̱i̱ya̱ 33 nda̱kavaña ki̱vi̱ viernes, soo, iin tá iin ku̱i̱ya̱ nása̱mava ki̱vi̱ ña̱ ndákava ña̱yóʼo. Ña̱ va̱ʼa kunda̱a̱-ini ndi̱ʼi̱ na̱ testigo Jehová ndáa ki̱vi̱ kúú ña̱ 14 tí nisán, ndíku̱ndi̱ ña̱ xi̱keʼéna tá tiempo ta̱ Jesús, ta su̱ví ña̱ kéʼé na̱ judio na̱ ndóo tiempo vitin.d

Si̱táva̱ʼa xíʼin tá vino

Tá ke̱ʼé ta̱ Jesús ña̱yóʼo, xi̱niñúʼura si̱táva̱ʼa ña̱ kǒo yuxa̱n iyá kúúmií xíʼin vino tá ki̱ndo̱o tá xi̱xina ña̱ Pascua (Mateo 26:26-28). Xa̱ʼa̱ ña̱yóʼo, ndi̱ʼi̱ na̱ testigo Jehová, tá ndákaʼánndi̱ ña̱ ni̱xi̱ʼi̱ ta̱ Jesús, xíniñúʼundi̱ si̱táva̱ʼa ña̱ kǒo yuxa̱n iyá kúúmií, ta vino tá xíniñúʼundi̱ kǒo kúúmiíra azúcar, ndixi ni yuku̱ á inkaka ña̱ʼa.

Sava na̱ veʼe-ñu̱ʼu xíniñúʼuna si̱táva̱ʼa ña̱ kúúmií yuxa̱n iyá. Soo, sava yichi̱, Biblia chítáʼanña yuxa̱n iyá xíʼin ku̱a̱chi ña̱ kúúmiíyó (Lucas 12:1; 1 Corintios 5:6-8; Gálatas 5:7-9). Xa̱ʼa̱ ña̱kán, si̱táva̱ʼa ña̱ kǒo yuxa̱n iyá kúúmií, va̱ʼaní ndána̱ʼaña ku̱ñu ta̱ Jesús saáchi kǒo ku̱a̱chi kúúmiíra (1 Pedro 2:22). Inka na̱ veʼe-ñu̱ʼu kǒo kéʼéna ña̱ káʼa̱n Biblia tá ndákaʼánna xa̱ʼa̱ ña̱ ni̱xi̱ʼi̱ ta̱ Jesús, saáchi jugo tá uva xíniñúʼuna, ta va̱ása xíniñúʼuna vino, kéʼéna ña̱yóʼo saáchi káʼa̱nna ña̱ na̱ ndásakáʼnu Ndióxi̱ kǒo kívi koʼona ndixi (1 Timoteo 5:23).

Ña̱ ndána̱ʼa kuití ni̱i̱ ta̱ Jesús xíʼin ku̱ñura kúúña

Si̱táva̱ʼa ña̱ kǒo yuxa̱n iyá kúúmií xíʼin tá vino tá xíniñúʼuna Conmemoración ña̱ ndána̱ʼa kuití ni̱i̱ ta̱ Jesús xíʼin ku̱ñura kúúña. Ki̱vi̱ ña̱ Conmemoración, va̱ása kúú iin milagro ta ndúu tá vino ni̱i̱ ta̱ Jesús, ni si̱táva̱ʼa va̱ása ndúuña ku̱ñura, nda̱a̱ táki̱ʼva ndákanixi̱ní sa̱vana. Ni kǒo ndásaka̱ ña̱yóʼo xíʼin ni̱i̱ra á ku̱ñura. Ná kotoyó ndáaña káʼa̱n Biblia xa̱ʼa̱ ña̱yóʼo.

• Ta̱ Jesús kǒo níka̱ʼa̱nra xíʼin na̱ discípulora ña̱ koʼona ni̱i̱ra, chi tá níkeʼéra ña̱yóʼo ya̱ʼandosóra ña̱ káʼa̱n ley Ndióxi̱, ña̱ kǒo xíniñúʼu kaxiyó ni̱i̱ á ña̱ koʼoyóña (Génesis 9:4; Hechos 15:28, 29). Ta̱ Jesús kǒo níkeʼéra ña̱yóʼo, kǒo níka̱ʼa̱nra xíʼin na̱ discípulora ña̱ ya̱ʼandosóna ley Ndióxi̱, saáchi nu̱ú Jehová ña̱ yi̱i̱ kúú ni̱i̱ (Juan 8:28, 29).

• Na̱ discípulo ta̱ Jesús, kǒo níxiʼina ni̱i̱ra, saáchi ñuú tá kúma̱níka kuvira ni̱ka̱ʼa̱nra ña̱ ku̱i̱ta̱ ni̱i̱ra, xíʼin ña̱yóʼo ni̱na̱ʼa̱ra ña̱ xi̱kuma̱níva ndataxira ña̱ tákura xa̱ʼa̱ na̱ yiví (Mateo 26:28).

• Ta̱ Jesús “su̱ví ku̱a̱ʼáníví yichi̱ nítaxira miíra” ña̱ kuvira (Hebreos 9:25, 26). Tá ná nduu si̱táva̱ʼa xíʼin tá vino ku̱ñu ta̱ Jesús xíʼin ni̱i̱ra ki̱vi̱ ña̱ xíyo Conmemoración, na̱ xíʼi tá vino xíʼin na̱ xíxi si̱táva̱ʼa nda̱a̱ táki̱ʼva íyo na̱ ndikó tuku kaʼni ta̱ Jesús saá koona.

• Ta̱ Jesús va̱ása ni̱ka̱ʼa̱nra: “Kǒo sandákoondó keʼéndó ña̱yóʼo ta kaʼnindó inkana”, saáchi ña̱ ni̱ka̱ʼa̱n kuitíra kúú ña̱yóʼo: “Kǒo sandákoondó keʼéndó ña̱yóʼo” (1 Corintios 11:24).

Na̱ yiví na̱ káʼan ña̱ tá vino ndúura ni̱i̱ ta̱ Jesús ta ña̱ si̱táva̱ʼa ndúuña ku̱ñura, kándíxana ña̱yóʼo saáchi káʼa̱nna ña̱ saá káʼa̱n sava texto ña̱ va̱xi nu̱ú Biblia. Tá kúú, sava traducción ña̱ Biblia káʼa̱nña ña si̱aʼa ni̱ka̱ʼa̱n ta̱ Jesús xa̱ʼa̱ tá vino: “Táyóʼo kúú ni̱íi̱” (Mateo 26:28). Soo, tu̱ʼun ña̱ ni̱ka̱ʼa̱n ta̱ Jesús ki̱ʼva siaʼa kivi sandáya̱ʼayóña: “Táyóʼo ndána̱ʼara niíi̱” á “táyóʼo ndákiʼinrá nu̱ú ni̱íi̱”.e Ta̱ Jesús xi̱xiniñúʼura ilustración tá xi̱sanáʼara na̱ yiví, ña̱kán tá ni̱ka̱ʼa̱nra xa̱ʼa̱ nii̱ra xi̱niñúʼura iin ña̱ naní metáfora (Mateo 13:34, 35).

¿Ndáana xíxi si̱táva̱ʼa ta xíʼina tá vino?

Ki̱vi̱ ndákaʼán na̱ testigo Jehová ña̱ ni̱xi̱ʼi̱ ta̱ Jesús, loʼonívana xíxi si̱táva̱ʼa ta xíʼina tá vino. ¿Nda̱chun?

Tá ni̱xi̱ʼi̱ ta̱ Jesús, saá ki̱xáʼa iin “trato xa̱á” ta ña̱yóʼo kúú ña̱ ni̱kiʼvi nu̱ú trato ña̱ ke̱ʼé Jehová xíʼin na̱ ñuu Israel tá ya̱chi̱ (Hebreos 8:10-13). Su̱ví ndiʼiví na̱ cristiano xíxi si̱táva̱ʼa á xíʼina tá vino tá xíyo Conmemoración, saáchi iinlá na̱ “nda̱kaxin Ndióxi̱” ku̱ʼu̱n chí ndiví kúú na̱ kéʼé ña̱yóʼo (Hebreos 9:15; Lucas 22:20). Na̱yóʼo kaʼndachíñuna xíʼin ta̱ Cristo chí ndiví. Biblia káʼa̱nña, ña̱ 144.000 kúú na̱ ku̱ʼu̱n chí ndiví (Lucas 22:28-30; Revelación [Apocalipsis] 5:9, 10; 14:1, 3).

Na̱ kaʼndachíñu xíʼin ta̱ Cristo chí ndiví iin “tiʼvi ndikachi” kuitíva kúú na̱yóʼo, soo, tu̱ʼún Ndióxi̱ káʼa̱nña, ña̱ “ku̱a̱ʼání na̱ yiví” ndátuna koona nu̱ú ñuʼú yóʼo ndiʼi saá tiempo (Lucas 12:32; Apocalipsis 7:9, 10). Miíyó na̱ ndátu koo nu̱ú yóʼo kǒo xíxiyó si̱táva̱ʼa ta ni kǒo xíʼiyó tá vino, soo, xáʼa̱nvayó tá xíyo Conmemoración chi saá náʼa̱yó ña̱ táxiyó tíxa̱ʼví xa̱ʼa̱ ña̱ ke̱ʼé ta̱ Jesús xa̱ʼa̱yó (1 Juan 2:2).