¿Ndáa ki̱ʼva sáka̱ku ta̱ Jesús miíyó?
Ña̱ káʼa̱n Biblia xa̱ʼa̱ ña̱yóʼo
Ta̱ Jesús sa̱kǎkura na̱ yiví tá ni̱xi̱ʼi̱ra xa̱ʼa̱na (Mateo 20:28). Xa̱ʼa̱ ña̱yóʼo Biblia káchiña xa̱ʼa̱ ta̱ Jesús ña̱ “sáka̱kura na̱ yiví” (1 Juan 4:14). Saátu káchiña “kǒo ni iinna kivi sakǎku miíyó, saáchi kǒo inka ki̱vi̱ nu̱ú ñuʼú yóʼo ña̱ níndaka̱xin Ndióxi̱ ña̱ kivi sakǎku miíyó” (Hechos 4:12).
Ta̱ Jesús ni̱xi̱ʼi̱ra xa̱ʼa̱ ndiʼi na̱ kándíxa miíra (Hebreos 2:9; Juan 3:16). Tándi̱ʼi, Ndióxi̱ sa̱ndátakura ta̱ Jesús ta ndi̱kóra chí ndiví (Hechos 3:15). Ta nani saá, nda̱a̱ chí ndiví ta̱ Jesús “kivi sakǎkura ndiʼi na̱ xíniñúʼu ki̱vi̱ra ña̱ ka̱ʼa̱nna xíʼin Ndióxi̱, ta kivi sakǎkurana chi ndiʼi tiempo tákura ta kivi ka̱ʼa̱nra xíʼin Ndióxi̱ ña̱ ná chindeétáʼanra xíʼinna” (Hebreos 7:25).
¿Nda̱chun xíniñúʼuyó ña̱ ná ka̱ʼa̱n ta̱ Jesús xíʼin Ndióxi̱ ña̱ ná chindeétáʼanra xíʼinyó?
Ndiʼiyó kúúyó na̱ yiví ku̱a̱chi (Romanos 3:23). Ku̱a̱chi kúú ña̱ xáʼní miíyó ta sásiña nu̱úyó ña̱ kuyatinyó nu̱ú Ndióxi̱ (Romanos 6:23). Soo ta̱ Jesús kúú ta̱ “chíndeétáʼan xíʼinyó” á kúúra iin abogado xa̱ʼa̱yó tá kándíxayó ña̱ ni̱xi̱ʼi̱ra xa̱ʼa̱yó (1 Juan 2:1). Xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó, kivi ka̱ʼa̱nra xíʼin Ndióxi̱ ña̱ ná kuniso̱ʼora ña̱ káʼa̱nyó xíʼinra ta ná koo káʼnu-inira xa̱ʼa̱ ku̱a̱chiyó (Mateo 1:21; Romanos 8:34). Ndióxi̱ ndákuiinra ña̱ káʼa̱n ta̱ Jesús saáchi kítáʼanvaña xíʼin ña̱ kúni̱ra. Ta̱kán chi̱ndaʼára ta̱ Jesús nu̱ú ñuʼú yóʼo ña̱ “ki̱xira ña̱ sakǎkura na̱ ñuyǐví yóʼo” (Juan 3:17).
¿Á xíniñúʼu kandíxa kuitíviyó ta̱ Jesús ta xa̱a̱ ka̱kuvíyó?
Va̱ása. Ni xíniñúʼu kandíxayó ta̱ Jesús ña̱ va̱ʼa ka̱kuyó, saátu xíniñúʼu keʼéyó inkaka ña̱ʼa (Hechos 16:30, 31). Biblia káchiña: “Nda̱a̱ táki̱ʼva íyo iin na̱ yiví, tá va̱ása ndákiʼinkana ta̱chí ña̱ táxi ña̱ kutakuna na̱ xa̱a̱ ni̱xi̱ʼi̱va kúúna, saátu íyo ña̱ kándíxayó Ndióxi̱, tá kǒo ni iin ña̱ʼa ña̱ va̱ʼa kéʼéyó ni loʼoví va̱ása ndáyáʼvi ña̱ kándíxayóra” (Santiago 2:26). Ndáaña xíniñúʼu keʼéyó ña̱ va̱ʼa ka̱kuyó:
Sakúaʼayó xa̱ʼa̱ ta̱ Jesús xíʼin xa̱ʼa̱ yivára, Jehová (Juan 17:3).
Kandíxayó ta̱ Jesús xíʼin Jehová (Juan 12:44; 14:1).
Na̱ʼa̱yó ña̱ kándíxayóna tá kéʼéyó ña̱ káʼa̱nna (Lucas 6:46; 1 Juan 2:17). Ta̱ Jesús ni̱ka̱ʼa̱nra su̱ví ndiʼi na̱ káʼa̱n “táta” xíʼinra kúú na̱ ka̱ku, chi na̱ kéʼé ña̱ kúni̱ yivára kúú na̱ ka̱ku (Mateo 7:21).
Ndakundeéyó na̱ʼa̱yó ña̱ kándíxayó Ndióxi̱ ni íyo tu̱ndóʼo nu̱úyó. Ta̱ Jesús ka̱chira: “Soo na̱ ná kundeé-ini nda̱a̱ nu̱ú ndíʼi kúú na̱ ka̱ku” (Mateo 24:13).