¿Ndáa ki̱ʼva kivi chindeétáʼan ña̱ Biblia xíʼi̱n? Taʼví iin: Nandukú ña̱ ndáyáʼviní va̱xi nu̱ú Biblia

“Xa̱a̱ ku̱a̱ʼání yichi̱ kúni̱ kaʼvii̱ Biblia soo ku̱a̱ʼání letra va̱xi nu̱úña túvii̱” (ñá Briana, 15 ku̱i̱ya̱).

¿Á xa̱a̱ ndóʼún ña̱yóʼo? Va̱ʼaní chindeétáʼan ña̱ artículo yóʼo xíʼún.

• ¿Nda̱chun ndáyáʼviní kaʼviyó Biblia?

• Ki̱ʼva ña̱ kaʼviyó Biblia

• Ña̱ kéʼé inka na̱ va̱lí kúa̱an

¿Nda̱chun ndáyáʼviní kaʼviyó Biblia?

¿Á kúxuxaún kaʼviún Biblia? Ku̱a̱ʼána ndóʼo saá. Sana ndákanixi̱níún ña̱ Biblia kúúña iin libro ña̱ ku̱a̱ʼání página kúúmií ta válíní letra va̱xi nu̱úña ta kǒo na̱ʼná va̱xi nu̱úña. Síínníva íyo ña̱yóʼo nu̱ú televisión xíʼin video.

Soo ndakanixi̱ní xa̱ʼa̱ ña̱yóʼo: tá ná ndani̱ʼún iin caja nu̱ú ñúʼu ña̱ʼa ña̱ ndáyáʼviní, ¿á su̱ví xa̱a̱ kuni̱níún ndakunaúña ña̱ kotoún ña̱ʼa ña̱ ñúʼu ti̱xinña?

Ki̱ʼva saá íyo Biblia, nu̱ú ña̱yóʼo ndani̱ʼún ku̱a̱ʼání ña̱ʼa ña̱ ndáyáʼvi ña̱ ndíchi koún ta ña̱yóʼo chindeétáʼanña xíʼún ña̱:

• Vií koo ña̱ ndaka̱xiún keʼún.

• Vií kutáʼún xíʼin na̱ yiváún.

• Ndani̱ʼún na̱ koo migoún.

• Va̱ása ndi̱ʼiní-iniún.

¿Ndáa ki̱ʼva chindeétáʼan iin libro ña̱ yatání xíʼinyó? Saáchi “Ndiʼi ña̱ ni̱ka̱ʼyi̱ nu̱ú tutu yi̱i̱ tu̱ʼun Ndióxi̱ kúúña” (2 Timoteo 3:16). Ña̱yóʼo kúni̱ kachiña ta̱ táxi consejo ña̱ va̱xi nu̱ú Biblia kúú mií ta̱ ndáyáʼvika nu̱ú iníísaá ñuyǐví.

Ki̱ʼva ña̱ kaʼviyó Biblia

Kivi kixáʼún kaʼviúnña nu̱ú kíxáʼaña iinsaá nda̱a̱ nu̱ú ndíʼiña. Tá ná keʼún ña̱yóʼo kunda̱a̱ ndiʼi-iniún xa̱ʼa̱ ña̱ káʼa̱n Biblia. Ku̱a̱ʼá ki̱ʼva keʼún ña̱yóʼo ná ka̱ʼa̱nyó xa̱ʼa̱ u̱vi̱ña:

• Kivi kaʼviún 66 libro ña̱ va̱xi nu̱úña kixáʼún Génesis iinsaá nda̱a̱ Apocalipsis.

• Kivi kaʼviún Biblia nda̱a̱ táki̱ʼva ku̱u iin tá iin ña̱ʼa ña̱ va̱xi nu̱úña.

Kivi keʼún ña̱yóʼo: Nu̱ú táʼví ña̱ 4-A folleto Ña̱ táxi yichi̱ nu̱úyó ña̱ va̱ʼa sakuaʼakayó xa̱ʼa Biblia va̱xi iin lista ndáa ki̱ʼva ku̱u iin ña̱ ndáyáʼviní ña̱ ke̱ʼé ta̱ Jesús tá ni̱xi̱yora nu̱ú ñuʼú yóʼo.

Ña̱ u̱vi̱ ña̱ kivi kaʼviúnña kúú ña̱ nandukún ña̱ káʼa̱n xa̱ʼa̱ ndáa tu̱ndóʼo kúú ña̱ yáʼún nu̱ú. Tá kúú:

• ¿Á kúni̱ún kuumiíún na̱ migo na̱ va̱ʼaní kundaa-iniún? Kaʼvi ña̱ káʼa̱n xa̱ʼa̱ ta̱ David xíʼin xa̱ʼa̱ ta̱ Jonathán (1 Samuel, capítulo 18 nda̱a̱ 20). Ta keʼé ña̱ va̱xi nu̱ú káʼa̱nña “Cómo encontrar amigos de verdad” ña̱ va̱ʼa sakúaʼún xíʼin ña̱ kaʼviún yóʼo.

• ¿Á kúni̱ún ndakú koo iniún ña̱ kǒo ndakavaún ndaʼa̱ ña̱ va̱ása va̱ʼa? Kivi kaʼviún ña̱ káʼa̱n xa̱ʼa̱ ta̱ José ta ndáa ki̱ʼva ku̱ndeé-inira nu̱ú ña̱ va̱ása va̱ʼa (Génesis, capítulo 39). Tándi̱ʼi keʼé ña̱ va̱xi nu̱ú káʼa̱nña “Cómo resistir las tentaciones” xíʼin “Acusado falsamente”, ta va̱ʼaní sanáʼa̱ ña̱yóʼo miíún xa̱ʼa̱ ña̱ kivi keʼún.

• ¿Á kúni̱ún kunda̱a̱-iniún ndáa ki̱ʼva chindeétáʼan ña̱ oración xíʼún? Kaʼvi xa̱ʼa̱ ña̱ ndo̱ʼo ta̱ Nehemías (Nehemías, capítulo 2). Tándi̱ʼi keʼé, “Jehová contestó su oración” nu̱ú ña̱yóʼo sakúaʼún ña̱ chindeétáʼan xíʼún.

Kivi keʼún ña̱yóʼo: Tá kúni̱ún ka̱ʼviún Biblia nandukú nu̱ú táxi̱n íyo ña̱ va̱ʼa kunda̱a̱-iniún xíʼin ña̱ káʼviún.

Ña̱ u̱ni̱ kivi kaʼviún iin ña̱ va̱xi nu̱ú Biblia á iin salmo, tándi̱ʼi ka̱ʼviúnña ndakanixi̱ní xa̱ʼa̱ ndáa ki̱ʼva chíndeétáʼanña xíʼún. Tándi̱ʼi ka̱ʼviún ndakanixi̱ní xa̱ʼa̱ ña̱yóʼo:

• ¿Nda̱chun ta̱xi Jehová ña̱ va̱xi tu̱ʼun yóʼo nu̱ú Biblia?

• ¿Ndáaña sánáʼa̱ña miíi̱ xa̱ʼa̱ ki̱ʼva ña̱ íyo Jehová ta saátu ki̱ʼva ña̱ kéʼéra iin ña̱ʼa?

• ¿Ndáa ki̱ʼva chindeétáʼan ña̱ sa̱kán ka̱ʼvii̱ yóʼo xíʼi̱n?

Kivi keʼún ña̱yóʼo: Ndaka̱xin iin ña̱ kivi keʼún. Kivi kaʼyíún ama kixáʼún kaʼviún Biblia ta kuniñúʼu programa ña̱ káʼviyó nu̱ú Biblia ña̱ kivi ndani̱ʼún nu̱ú sitio ña̱ internet ña̱ kúúmiíndi̱.