¿Ndáaña káʼa̱n Biblia xa̱ʼa̱ ña̱ taxiyó ña̱ʼa ndaʼa̱ inkana?
Ña̱ káʼa̱n Biblia xa̱ʼa̱ ña̱yóʼo
Biblia káʼa̱nña xíʼinyó ña̱ ná taxiyó ña̱ʼa ña̱ kúúmiíyó ndaʼa̱ inkana ta xíʼin ndiʼi níma̱yó ná keʼéyóña. Tá saá ná keʼéyó, su̱ví iinlá na̱ yiví na̱ táxiyó ña̱ʼa ndaʼa̱ va̱ʼa kúni, chi saátu miíyó va̱ʼa kuniyó (Proverbios 11:25; Lucas 6:38). Ta̱ Jesús ni̱ka̱ʼa̱nra: “Kúsi̱íka-iniyó tá táxiyó ña̱ʼa ndaʼa̱ inkana nu̱úka ña̱ ndakiʼinyóña” (Hechos 20:35).
¿Ama kúú ña̱ va̱ʼa taxiyó ña̱ʼa ndaʼa̱ inkana?
Tá xíʼin ndinuʼu-iniyó táxiyó ña̱ʼa ndaʼa̱ inkana, sakúsi̱íyó-ini Ndióxi̱. Biblia káchiña: “Iin iinndó keʼéndó nda̱a̱ táki̱ʼva chi̱ka̱a̱-inindó, ta xíʼin ndiʼi níma̱ndó keʼéndóña su̱ví xíʼin ña̱ ndúxa saáchi Ndióxi̱ kúʼvi̱-inira xínira na̱ táxiña xíʼin ña̱ si̱í-ini” (2 Corintios 9:7).
Ndióxi̱ kúni̱ra ña̱ miíyó na̱ ndásakáʼnu miíra ná taxiyó ña̱ʼa ndaʼa̱ inkana xíʼin ndiʼi níma̱yó (Santiago 1:27). Tá chíndeétáʼanyó xíʼin na̱ kúma̱ní ña̱ʼa nu̱ú, náʼa̱yó ña̱ chíndeétáʼanyó xíʼin Ndióxi̱, ta miíra taxi ña̱ʼa ndaʼa̱yó tá chíndeétáʼanyó xíʼin inkana (Proverbios 19:17). Biblia káʼa̱nña ña̱ taxi Ndióxi̱ ña̱ va̱ʼa ndaʼa̱yó (Lucas 14:12-14).
¿Ama kúú ña̱ va̱ása va̱ʼa taxiyó ña̱ʼa ndaʼa̱ inkana?
Tá táxiyó ña̱ʼa ndaʼa̱ inkana xa̱ʼa̱ ña̱ kúni̱yó kindo̱o va̱ʼayó. Tá kúú:
Xa̱ʼa̱ ña̱ kúni̱yó ndakanda̱-ini inkana xíʼin ña̱ kéʼéyó (Mateo 6:2).
Xa̱ʼa̱ ña̱ kúni̱yó ndakiʼinyó iin ña̱ʼa xa̱ʼa̱ ña̱ táxiyó (Lucas 14:12-14).
Xa̱ʼa̱ ña̱ kúni̱yó ná taxi Ndióxi̱ kutakuyó ndiʼi tiempo (Salmo 49:6, 7).
Tá chíndeétáʼanyó xíʼin inkana ña̱ keʼéna ña̱ kǒo kutóo Ndióxi̱. Tá kúú, va̱ása va̱ʼa taxiyó xu̱ʼún ndaʼa̱ iinna ña̱ kusíkína á ña̱ koʼona á kuniñúʼuna droga (1 Corintios 6:9, 10; 2 Corintios 7:1). Saátu va̱ása va̱ʼa taxiyó xu̱ʼún ndaʼa̱ iin na̱ kivi kachíñu, soo va̱ása xíínna kachíñuna (2 Tesalonicenses 3:10).
Ña̱ kivi kasi nu̱úyó ña̱ keʼéyó chiñu ña̱ ta̱xi Ndióxi̱ ndaʼa̱yó. Biblia káʼa̱nña ña̱ na̱ níʼi yichi̱ nu̱ú na̱ veʼena kúú na̱ xíniñúʼu taxi ña̱ xíniñúʼu na̱ veʼena (1 Timoteo 5:8). Chi va̱ása va̱ʼa taxina ña̱ kúúmiína ndaʼa̱ inkana tá kǒo ndáana xa̱ʼa̱ na̱ veʼena. Saáchi ta̱ Jesús va̱ása níxikutóora ña̱ xi̱keʼé savana tá va̱ása níxi̱ndaana xa̱ʼa̱ na̱ veʼena na̱ xa̱a̱ ku̱chée, saáchi xi̱kachina ña̱ ta̱xina ña̱ xa̱a̱ kúúmiína ndaʼa̱ Ndióxi̱ (Marcos 7:9-13).