Xíniñúʼundi̱ videollamada ña̱ va̱ʼa ndatakandi̱

Ku̱a̱ʼání país na̱ chíñu ni̱ka̱ʼa̱nna ña̱ ná va̱ása ndakutáʼan na̱ yiví ta saátu ná kǒo kuumiína reunión nu̱ú ndákutáʼan ku̱a̱ʼání na̱ yiví. Ndi̱ʼi̱ na̱ testigo Jehová kúni̱ndi̱ keʼéndi̱ nda̱a̱ táki̱ʼva ni̱ka̱ʼa̱n na̱ chíñu, soo va̱ása sándakoondi̱ ña̱ ndakutáʼanndi̱, ña̱kán na̱ congregación xíniñúʼuna aplicación ña̱ naní Zoom ña̱ va̱ʼa ndakutáʼanndi̱ ti̱xin videollamada.

Ña̱ va̱ʼa kuumiíndi̱ reunión nda̱a̱ táki̱ʼva kéʼéndi̱ña, na̱ Cuerpo Gobernante ni̱ka̱ʼa̱nna ña̱ kivi kuniñúʼuna donación ña̱ táxina ña̱ va̱ʼa satána cuenta ña̱ Zoom ña̱ va̱ʼa kuniñúʼu na̱ congregación ña̱yóʼo. Ta chíndeétáʼanña xíʼin sava na̱ congregación na̱ va̱ása níkivi chaʼvi ki̱ʼva 15 á 20 dólar, á ku̱a̱ʼáka chi saá kúú ña̱ ya̱ʼvi cuenta yóʼo. Sava congregación xi̱xiniñúʼuna aplicación táʼan ña̱yóʼo ña̱ va̱ása níxi̱chaʼvina xa̱ʼa̱ soo loʼovana xi̱ndakutáʼan ti̱xin cuenta yóʼo. Ndiʼi na̱ congregación na̱ xíniñúʼu cuenta ña̱ Zoom ña̱ cháʼvi na̱ organización na̱ testigo Jehová xa̱ʼa̱ kivi kiʼinna kuenta xíʼin ña̱yóʼo ndáana kúú na̱ kivi ki̱ʼvi, tasaá ku̱a̱ʼání na̱ yiví kivi kotona reunión tá xíyoña. Vitin yáʼaka 65,000 congregación ña̱ íyo 170 país xíniñúʼu cuenta yóʼo.

Ña̱ congregación ña̱ íyo chí Kairagi, chí ñuu Manado (ña̱ kíndo̱o chí Célebes Septentrional, Indonesia), na̱samana aplicación ña̱ va̱ása níxi̱chaʼvina xa̱ʼa̱ ta ki̱xáʼana xíniñúʼuna cuenta ña̱ Zoom ña̱ cháʼvi na̱ organización xa̱ʼa̱. Ta̱ hermano Hadi santoso káchira: “Nda̱a̱ na̱ hermano na̱ kǒo xíni va̱ʼa kuniñúʼu celular á tableta kivi kotona reunión saáchi va̱ása xíniñúʼu ki̱ʼvina ku̱a̱ʼání yichi̱ ti̱xin reunión”.

Ta̱ Léster Jijón, iin ta̱ kúú anciano ti̱xin ña̱ congregación Guayacanes chí Oeste, ña̱ ñuu Guayaquil (Ecuador), káchira: “Xa̱ʼa̱ ña̱ va̱ása ku̱a̱ʼá xu̱ʼún kúúmií na̱ hermano, sana va̱ása chaʼvi ku̱a̱ʼání na̱ congregación xa̱ʼa̱ cuenta ña̱ Zoom ña̱ kivi ki̱ʼvi ku̱a̱ʼá na̱ hermano. Tíxa̱ʼvi ña̱ kéʼé na̱ organización kivi kuumiíndi̱ cuenta ña̱ Zoom tasaá va̱ʼa ki̱ʼvi ndiʼina. Ña̱kán kivi ka̱ʼa̱nndi̱ xíʼin ku̱a̱ʼá na̱ yiví ña̱ kivi ki̱ʼvina tá xíyo reunión”.

Ta̱ hermano Johnson Mwanza, ta̱ ndíka̱a̱ ti̱xin congregación Norte Ngwerere, ña̱ íyo chí ñuu Lusaka (Zambia) ka̱ʼyíra ña̱yóʼo: “Xa̱a̱ ku̱a̱ʼá yichi̱ ku̱a̱ʼání na̱ hermano káʼa̱nna xíʼinndi̱ ña̱yóʼo: ‘Ña̱ Zoom ña̱ cháʼvi na̱ organización xa̱ʼa̱ su̱ví sákuyatin kuitíña miíndi̱ nu̱ú na̱ hermano chi saátu náʼa̱ña ña̱ kúʼvi̱-ini Jehová xínira miíndi̱’”.

Xu̱ʼún ña̱ xi̱niñúʼuna ña̱ va̱ʼa satána cuenta yóʼo ka̱naña ti̱xin xu̱ʼún ña̱ xa̱a̱ íyo tu̱ʼva ña̱ kuniñúʼuna tá kúú iin tu̱ndóʼo. Ndiʼi xu̱ʼún yóʼo kúú ña̱ táxina ti̱xin ña̱ obra mundial. Ta ku̱a̱ʼání donación yóʼo táxinaña nu̱ú donate.jw.org. Tíxa̱ʼviníndó xa̱ʼa̱ xu̱ʼún ña̱ táxindó chi saátu xíniñúʼunaña tá kúú inka tu̱ndóʼo iníísaá ñuyǐví (2 Corintios 8:14).