Na̱ kúúmií ku̱a̱ʼá ña̱ʼa chíndeétáʼanna xíʼin na̱ loʼoña kúúmií

Na̱ testigo Jehová nátúʼunna xíʼin na̱ yiví xa̱ʼa̱ Ndióxi̱ ta saátu chíndeétáʼanna xíʼinna nu̱ú yáʼaka 200 país xíʼin ñuu válí. Soo 35 kuití país yóʼo ndákiʼinna donación ña̱ táxi na̱ hermano ña̱ va̱ʼa kuniñúʼunaña. Tá saá ¿ndáaña kéʼé sava ñuu nu̱ú va̱ása ku̱a̱ʼá xu̱ʼún kúúmiína?

Na̱ Cuerpo Gobernante kíʼinna kuenta xíʼin ña̱ kéʼé na̱ hermano na̱ íyo iníísaá ñuyǐví ta saátu ña̱ kéʼéna ña̱ va̱ʼa ndasakáʼnuna Ndióxi̱. Ndiʼi xu̱ʼún ña̱ táxi na̱ hermano viíní kíʼinna kuenta xíʼin ña̱yóʼo. Tá iin sucursal ku̱a̱ʼá xu̱ʼún kíxaa̱ ndaʼa̱na, na̱yóʼo chíndaʼánaña ku̱a̱ʼa̱nña ndaʼa̱ inka sucursal ña̱ va̱ʼa kuniñúʼunaña. Táʼan ña̱yóʼo kúú ña̱ ke̱ʼé na̱ cristiano na̱ ni̱xi̱yo tá siglo nu̱ú ta saátu kéʼé miíyó tiempo vitin. Na̱yóʼo xi̱taxina ña̱ xi̱kindoo nu̱úna ndaʼa̱ na̱ hermano ña̱ va̱ʼa chindeétáʼanna xíʼinna tasaá kuumiína ña̱ xíniñúʼuna (2 Corintios 8:14).

¿Ndáaña ndóʼo na̱ hermano na̱ ndákiʼin ña̱ kíndo̱o ndaʼa̱ inka na̱ sucursal? Tá kúú chí Tanzania ku̱a̱ʼání na̱ yiví na̱ íyo país kán xíniñúʼuna ki̱ʼva 2 dólar iin ki̱vi̱, xi̱niñúʼuna xu̱ʼún ña̱ ta̱xi na̱ sucursal ndaʼa̱na ña̱ va̱ʼa ndasaxa̱ána Salón ña̱ Reino ña̱ congregación Mafinga. Na̱ hermano na̱ íyo ti̱xin congregación yóʼo káchina: “Nda̱a̱ tá nda̱saxa̱ána salón ku̱a̱ʼání na̱ yiví xáʼa̱n reunión. Táxiníndi̱ tíxa̱ʼvi ndaʼa̱ na̱ ñuu Jehová ta saátu na̱ hermano na̱ íyo iníísaá ñuyǐví xa̱ʼa̱ ña̱ va̱ʼaní-inina ta vitin kúúmiíndi̱ iin salón ña̱ liviní ña̱ va̱ʼa ndasakáʼnundi̱ Jehová”.

Xa̱ʼa̱ ña̱ ndíka̱a̱ pandemia ña̱ COVID-19 sava na̱ hermano na̱ íyo chí Sri Lanka kǒo ku̱a̱ʼá ña̱ kuxuna. Tá kúú ñá hermana Imara Fernando xíʼin ta̱ loʼo se̱ʼeñá Enosh. Soo tíxa̱ʼvi ña̱ donación ña̱ táxi inka país va̱ʼa nda̱kiʼinna ña̱ xíniñúʼuna. Na̱yóʼo ka̱ʼyína iin tarjeta ña̱ káchi: “Táxiníndi̱ tíxa̱ʼvi ndaʼa̱ na̱ hermano na̱ ni̱na̱ʼa̱ ña̱ kúʼvi̱-inina xínina ndi̱ʼi̱ ña̱ tiempo yo̱ʼvi̱ní yóʼo. Kúsi̱íní-inindi̱ ña̱ kítáʼanndi̱ xíʼin na̱ familia yóʼo ta káʼa̱nndi̱ xíʼin Jehová xa̱ʼa̱ na̱ hermano ña̱ ná chindeétáʼanra xíʼinna tiempo ña̱ nu̱ú ndíʼi vitin”.

Ni nda̱a̱ ndáaka nu̱ú íyo na̱ hermano kúsi̱íní-inina ña̱ chíndeétáʼanna xíʼin na̱ hermano. Tá kúú ta̱ Enosh ke̱ʼéra iin caja loʼo nu̱ú va̱ʼa taánra xu̱ʼún tasaá va̱ʼa chindeétáʼanra xíʼin inka na̱ familia na̱ xíniñúʼuña. Saátu íyo ña̱ kéʼé ñá Guadalupe Álvarez va̱ʼaní-iniñá, ñáyóʼo íyoñá chí México nu̱ú íyo ku̱a̱ʼání na̱ yiví nu̱ú va̱ása ku̱a̱ʼá xu̱ʼún kíʼinna ta loʼo na̱yóʼo káchíñu ta va̱ása ku̱a̱ʼá xu̱ʼún cháʼvinana. Soo ñáyóʼo chíka̱a̱ñá ndee̱ ña̱ chindeétáʼanñá xíʼin inkana. Ñáyóʼo káchiñá: “Táxi tíxa̱ʼvi ndaʼa̱ Jehová xa̱ʼa̱ ña̱ kúʼvi̱-inira xínira yi̱ʼi̱ ta saátu ña̱ va̱ʼa-inira xíʼi̱n, kúnda̱a̱-inii̱ donación ña̱ táxii̱ ta saátu ña̱ táxi inkana chíndeétáʼanña xíʼin na̱ hermano na̱ yáʼa nu̱ú tu̱ndóʼo”.

Na̱ sucursal na̱ táxi xu̱ʼún ndaʼa̱ inkana kúsi̱íní-inina ña̱ kéʼéna ña̱yóʼo. Ta̱ Anthony Carvalho, ta̱ kúú Comité ña̱ Sucursal chí Brasil káchira: “Ku̱a̱ʼání ku̱i̱ya̱, inka sucursal chi̱ndeétáʼanna xíʼinndi̱ ta ta̱xina xu̱ʼún ndaʼa̱ndi̱. Tíxa̱ʼvi ña̱ chi̱ndeétáʼanna xíʼinndi̱ ku̱a̱ʼáníka na̱ yiví kúnda̱a̱-ini xa̱ʼa̱ Ndióxi̱. Soo vitin xa̱a̱ íyo loʼoka xu̱ʼún ndaʼa̱ndi̱ ña̱ va̱ʼa chindeétáʼanndi̱ xíʼin inkana. Na̱ hermano kíʼinna kuenta ña̱ xíniñúʼu natúʼunna xíʼin na̱ yiví iníísaá ñuyǐví ta saátu kíʼinna kuenta ña̱ kivi chindeétáʼanna xíʼin inkana, nda̱a̱ táki̱ʼva kéʼé na̱ discípulo ta̱ Cristo”.

¿Ndáa ki̱ʼva kivi chindeétáʼan na̱ testigo Jehová xíʼin na̱ hermano na̱ kúma̱ní ña̱ʼa nu̱ú? Iin ña̱ va̱ʼaní ña̱ kivi keʼéna kúú ña̱ taxina xu̱ʼún ti̱xin obra mundial nu̱úka ña̱ chindaʼá miína ña̱yóʼo ndaʼa̱ na̱ sucursal ña̱ íyo inka país. Kivi taxina donación ti̱xin caja ña̱ íyo ti̱xin congregación ña̱ naní “Obra mundial” á nu̱ú donate.jw.org. Ndiʼi donación ña̱ táxindó ndáyáʼviña.