Tá ko̱on sa̱vi̱ kini nda̱a̱ tá ke̱ena ñuu Egipto

U̱na̱ kuitíva kúú na̱ yiví na̱ ni̱ka̱ku tá ko̱on sa̱vi̱ kini, soo tá ni̱ya̱ʼa tiempo ku̱a̱ʼáva ndu̱una. Tándi̱ʼi ko̱on sa̱vi̱ ta ni̱ya̱ʼa 352 ku̱i̱ya̱ saá ka̱ku ta̱ Abrahán. Sakuaʼayó chi Ndióxi̱ sa̱xínura tu̱ʼunra ña̱ ni̱ka̱ʼa̱nra xíʼin ta̱ Abrahán ña̱ kaku iin se̱ʼera kunaní Isaac. Ta̱ Isaac ni̱xi̱yo u̱vi̱ se̱ʼera, soo se̱ʼera ta̱ xi̱naní Jacob kúú ta̱ nda̱ka̱xin Ndióxi̱.

Ta̱ Jacob ku̱a̱ʼá se̱ʼera ni̱xi̱yo, 12 xi̱kuu ta̱a se̱ʼera ta ni̱xi̱yotu ná si̱ʼí se̱ʼevara. U̱xu̱ se̱ʼe ta̱ Jacob ni̱sa̱a̱-inina xi̱nina ñanina ta̱ loʼoka nu̱úna, ta̱ José, ta ni̱xi̱kónara ku̱a̱ʼa̱nra kachíñura nu̱ú na̱ ñuu Egipto. Soo tá ni̱ya̱ʼa tiempo ta̱ José ni̱xa̱a̱ra ndu̱ura iin ta̱a káʼnu ñuu Egipto. Tá ki̱xa̱a̱ tiempo ña̱ koo so̱ko, ta̱ José xi̱tondosóra na̱ ñanira chi xi̱kuni̱ra kunda̱a̱-inira á na̱samana xíʼin ña̱ xi̱keʼéna. Nda̱a̱ vitinví ku̱a̱ʼa̱n ndiʼi na̱ se̱ʼe ta̱ Jacob ñuu Egipto. Tá ka̱ku ta̱ Abrahán ta ni̱ya̱ʼa 290 ku̱i̱ya̱ saáví ku̱u ña̱yóʼo.

Na̱ ñuu Israel 215 ku̱i̱ya̱ ni̱xi̱yona ñuu Egipto. Tá ni̱xi̱ʼi̱ ta̱ José, na̱ ñuu Egipto i̱xanduxana xíʼin na̱ ñuu Israel ña̱ kachíñuna nu̱úna. Ta ni̱ya̱ʼa tiempo saáví ka̱ku ta̱ Moisés, Ndióxi̱ xi̱niñúʼurara ña̱ sa̱kákura na̱ ñuura nu̱ú na̱ ñuu Egipto. Ndiʼi ña̱ va̱xi nu̱ú ña̱ TÁʼVI 2 yóʼo ku̱uña ti̱xin 857 ku̱i̱ya̱.