Ta̱ rey ñuu Egipto su̱ví ta̱ va̱ʼa kúúra

NA̱ XÍTOÚN yóʼo íxanduxana xíʼin na̱ yiví ña̱ kachíñuna. Koto ta̱ káni iin ta̱a ta̱ káchíñu yóʼo. Na̱yóʼo kúú na̱ veʼe ta̱ Jacob, ta nanína na̱ ñuu Israel. Ta na̱ ñuu Egipto kúú na̱ íxanduxa xíʼinna ña̱ kachíñuna nu̱úna. Soo, ¿ndachun káchíñuna nu̱úna?

Ku̱a̱ʼání ku̱i̱ya̱ va̱ʼa xi̱ndoo na̱ veʼe ta̱ Jacob ñuu Egipto. Ta̱ José iin chiñu káʼnuní xi̱kuumiíra nu̱ú ta̱ rey Faraón, ta̱yóʼo xi̱ndaara na̱ ñuu Israel. Soo tá ni̱xi̱ʼi̱ ta̱ José, saá ka̱na inka ta̱ Faraón xa̱á, ta̱yóʼo xi̱kuu ta̱ rey ñuu Egipto ta kǒo níxikuni̱ra na̱ ñuu Israel.

Ta̱ Faraón yóʼo su̱ví ta̱ va̱ʼa kúúra chi i̱xanduxara xíʼin na̱ ñuu Israel ña̱ ka̱chíñuna nu̱úra. Ta ni̱xi̱yo ta̱a na̱ xi̱xaʼnda chíñu nu̱úna ta kue̱ʼe̱ní ni̱xi̱yona, ta̱ rey yóʼo kúú ta̱ ni̱ka̱ʼa̱n xíʼinna ña̱ koona saá. Ta i̱xanduxana xíʼin na̱ ñuu Israel ña̱ ka̱chíñuna nu̱ú ta̱ Faraón ña̱ i̱xava̱ʼana veʼe náʼnu. Soo na̱ ñuu Israel káku tá kákuka se̱ʼena ta ndúku̱a̱ʼákana ku̱a̱ʼa̱nna. Tá ni̱ya̱ʼa tiempo na̱ ñuu Egipto ki̱xaʼá ni̱yi̱ʼvína, chi sana xa̱a̱ na̱ ñuu Israel nduku̱a̱ʼákana ta ndakúka koona nu̱ú na̱yóʼo.

¿Á xíni̱ún ndáaña ke̱ʼé ta̱ Faraón? Ni̱ka̱ʼa̱nra xíʼin ná sákaku se̱ʼe ná si̱ʼí ñuu Israel, ta káchira xíʼinna: ʼKaʼníndó ndiʼi ta̱a válí ta̱ sa̱kán kákuʼ. Soo ná si̱ʼí yóʼo, ná si̱ʼí va̱ʼa xi̱kuuná chi kǒo níxaʼníná ta̱a válí sa̱kán káku.

Ña̱kán ta̱ Faraón ni̱ka̱ʼa̱nra xíʼin ndiʼi na̱ ñuura, ta káchira: ʼNdiʼi ta̱a válí ta̱ ñuu Israel kaʼníndóra, soo kǒo kaʼníndó ná si̱ʼí válíʼ. ¿Á ña̱ va̱ʼa kúú ña̱ ni̱ka̱ʼa̱n ta̱yóʼo? Ná kotoyó ndachun va̱ʼa ni̱ka̱ku iin ta̱a loʼo.