Ña̱ ni̱ka̱ʼa̱n ta̱ Jefté

¿Á KǑO ndóʼún ña̱yóʼo tá káʼún keʼún á taxiún ña̱ʼa ndaʼa̱ iinna, soo tándi̱ʼi va̱ása nísaxi̱núnña? Ña̱yóʼo ndo̱ʼo ta̱ va̱xi nu̱ú na̱ʼná yóʼo, ña̱kán kúsuchí-inira. Jefté naníra, ta iin juez ndakú-ini kúúra ña̱ ñuu Israel.

Ta̱ Jefté ni̱xi̱yora tá tiempo kǒo ndásakáʼnuka na̱ ñuu Israel Jehová. Chi tuku ki̱xaʼána kéʼéna ña̱ kini nu̱úra. Xa̱ʼa ña̱yóʼo ta̱xi Jehová kanitáʼan na̱ ñuu Ammón xíʼinna. Ta na̱ ñuu Israel ni̱ka̱ʼa̱nna xíʼin Jehová: ʼJehová íyova ku̱a̱chindi̱ nu̱ún. Soo sáka̱ku ndi̱ʼi̱ vitinʼ.

Na̱ yiví va̱ása íyo va̱ʼa inina xa̱ʼa ña̱ kini ña̱ ke̱ʼéna. Ta ki̱xaʼá ndásakáʼnu tukuna Jehová. Tasaá, tuku ki̱xaʼá Jehová chíndeérana.

Na̱ ñuu Israel nda̱ka̱xinna ta̱ Jefté ña̱ kunúura nu̱úna ña̱ kanitáʼanna xíʼin na̱ ñuu Ammón. Ta̱yóʼo kúni̱níra ná chindeé Jehová miína ña̱ kanitáʼanna xíʼin na̱ ñuu Ammón. Xa̱ʼa ña̱yóʼo ni̱ka̱ʼa̱nra xíʼin Jehová: ʼJehová tá ná chindeún ndi̱ʼi̱ ña̱ kanitáʼanndi̱ xíʼin na̱yóʼo, saá taxii̱ iin na̱ siʼnaka kita ndakiʼin yi̱ʼi̱ tá ná ndikói̱ veʼi̱ ña̱ va̱ʼa kachíñuna nu̱únʼ.

Jehová xi̱niso̱ʼovara ña̱ ni̱ka̱ʼa̱n ta̱ Jefté xíʼinra, ta chi̱ndeérana ña̱ ka̱nitáʼanna xíʼin na̱yóʼo. Tá ndi̱kó ta̱ Jefté veʼera, ¿á xíni̱ún ndáana kúú na̱ siʼna ki̱ta nda̱kiʼin-ñaʼá? Siʼnaka ñá se̱ʼera ki̱ta, ta iinlá saá kúúñá. ʼAy, ñá loʼo, sákusuchíníún-inii̱, ta yi̱ʼi̱ xa̱ni̱ka̱ʼi̱n xíʼin Ndióxi̱ ña̱ taxii̱ iin na̱ kachíñu nu̱úra, ta vitin saxínuvai̱ tu̱ʼun ña̱ ni̱ka̱ʼi̱n xíʼinraʼ, káchira ta xákura.

Tá na̱kunda̱a̱-ini ñá loʼo se̱ʼera xa̱ʼa ña̱ ni̱ka̱ʼa̱nra taxira ndaʼa̱ Ndióxi̱, ta saátu ñá loʼo yóʼo ni̱kusuchí-iniñá, chi sandákooñá yiváñá xíʼin na̱ migoñá. Ta ndiʼi tiempo ku̱ʼu̱nñá kachíñuñá nu̱ú Jehová ini tabernáculo ña̱ Siló. Tasaá ni̱ka̱ʼa̱nñá xíʼin yiváñá ta̱ Jefté: ʼYivá, tu̱ʼun ña̱ ni̱ka̱ʼún xíʼin Jehová, xíniñúʼu sáxínúnñaʼ.

Ñá loʼo yóʼo ku̱a̱ʼa̱nvañá ña̱ Siló, ta kán ni̱xi̱yoñá ndiʼi tiempo ka̱chíñuñá nu̱ú Jehová. Ta ná si̱ʼí ña̱ ñuu Israel xi̱xa̱ʼa̱nná ku̱mí yichi̱ nu̱ú ku̱i̱ya̱ xi̱toniʼnináñá ta ku̱a̱ʼá tiempo xi̱xiyoná xíʼinñá. Na̱ yiví kúni̱nína xíninañá, chi va̱ʼaní káchíñuñá nu̱ú Jehová.