LECCIÓN 4
Yiváñá xíʼin Jehová xi̱kusi̱í-inina xíʼinñá
¿Ndáaña káʼa̱n ta̱ Jefté xíʼin Jehová?
Ni i̱xayo̱ʼviña xíʼin ñá se̱ʼe ta̱ Jefté sa̱xinuvañá ña̱ ni̱ka̱ʼa̱n yiváñá
¿Á xíni̱ún ndáañá kúú ñá loʼo ñá va̱xi nu̱ú na̱ʼná yóʼo?... Ña̱ Biblia va̱ása káʼa̱nña ki̱vi̱ñá, káʼa̱n kuitíña xíʼinyó yiváñá Jefte xi̱naníra. Ta̱ Jefté xíʼin Jehová ni̱kusi̱íní-inina xíʼinñá xa̱ʼa iin ña̱ʼa ña̱ ke̱ʼéñá. ¿Á kúni̱ún kunda̱a̱ka-iniún xa̱ʼa ta̱ Jefté xíʼin ñá loʼo se̱ʼera?
Ta̱ Jefté iin ta̱a va̱ʼa xi̱kuura. Ta ku̱a̱ʼá tiempo xi̱niñúʼura ña̱ sa̱náʼa̱ra ñá loʼo se̱ʼera xa̱ʼa Jehová. Xi̱kuutura iin ta̱a ta̱ ndakú ta va̱ʼa xi̱niʼira yichi̱ nu̱ú na̱ ñuura. Ña̱kán ni̱ka̱ʼa̱n na̱ ñuu Israel xíʼinra: “¿Á kúni̱ún kuniʼún yichi̱ nu̱úndi̱ ña̱ ku̱ʼu̱nyó kanitáʼanyó xíʼin na̱ inka ñuu?”.
Ta̱ Jefté ni̱ka̱ʼa̱nra xíʼin Jehová ña̱ ná chindeérara ña̱ va̱ʼa kanitáʼanna xíʼin na̱ inka ñuu. Tá ná chindeéra ta̱ Jefté, ña̱yóʼo keʼéra káchira: tá ná ndikóra veʼera na̱ siʼna kita ndakiʼin-ñaʼá na̱yóʼo taxira ndaʼa̱ Jehová. ¿Ndáaña kúni̱ kachi ña̱yóʼo? Kúni̱ kachiña taxirana ndaʼa̱ Jehová ña̱ kachíñuna nu̱úra ini tabernáculo ndiʼi tiempo. Tabernáculo yóʼo kúú nu̱ú xi̱xa̱ʼa̱n na̱ yiví xi̱ndasakáʼnuna Jehová. ¿Á ni̱kuchiñu ta̱ Jefté ka̱nitáʼanra xíʼin na̱ ñuu nu̱ú ni̱xa̱ʼa̱nra? Ni̱kuchiñuvara. Tá ndi̱kóra veʼera, ¿á xíni̱ún yukú na̱ siʼna ki̱ta nda̱kiʼin-ñaʼá?...
Ñá loʼo se̱ʼéra kúú ñá siʼna ki̱ta. Iinlá saá kúú se̱ʼera, ta vitin xíniñúʼu taxira ku̱ʼu̱nñá tabernáculo kachíñuñá. Ni̱kusuchíkaví-inira, ¿á ndákaʼún xa̱ʼa ña̱ ni̱ka̱ʼa̱nra xíʼin Jehová na̱ siʼna kita ndakiʼin-ñaʼá taxira ndaʼa̱ Jehová? Tasaá ni̱ka̱ʼa̱n ñá loʼo se̱ʼera xíʼinra: “Yivá tu̱ʼun ña̱ ni̱ka̱ʼún xíʼin Jehová xíniñúʼu saxinúnña”.
Ñá se̱ʼe ta̱ Jefté ku̱i̱ya̱ tá ku̱i̱ya̱ xi̱xa̱ʼa̱n ná migañá xi̱toniʼnináñá
¿Á ni̱kusuchí-ini ñá loʼo yóʼo tá na̱kunda̱a̱-iniñá ña̱ kooñá tabernáculo? Ni̱kusuchíva-iniñá chi tá ná kooñá tabernáculo kǒo kívi tindaʼa̱ñá ni kǒo kívi koo se̱ʼeñá. Soo ñáyóʼo kúni̱vañá saxinuñá tu̱ʼun ña̱ ni̱ka̱ʼa̱n yiváñá ta kúni̱tuñá sakusi̱íñá ini Jehová. Ña̱yóʼo kúú ña̱ ndáyáʼvika nu̱úñá su̱víka ña̱ tindaʼa̱ñá á ña̱ koo se̱ʼeñá. Xa̱ʼa ña̱yóʼo ni̱xi̱yoñá ndiʼi tiempo ini tabernáculo.
¿Á ni̱kusi̱í-ini Jehová xíʼin ta̱ Jefté yiváñá xíʼin ña̱ ke̱ʼéñá túviún?... Ni̱kusi̱íva-inina. Saátu miíún kivi koún táki̱ʼva ni̱xi̱yo ñá loʼo se̱ʼe ta̱ Jefté. Tá ná kuniso̱ʼún ña̱ káʼa̱n Jehová ta kuʼvi̱-iniún kuniúnra, kusi̱í-inira xíʼún. Saátu ndi̱ʼi̱ kusi̱íní-inindi̱ xíʼún.