¿Ndachun xínu ta̱ David ku̱a̱ʼa̱nra?

TÁNDI̱ʼI xa̱ʼní ta̱ David ta̱ Goliat, ku̱a̱ʼa̱nra xíʼin ta̱ Abner ta̱ xáʼndachíñu nu̱ú na̱ xíka ku̱a̱chi ñuu Israel nu̱ú ta̱ Saúl. Ta̱ Saúl ta̱xira chiñu ndaʼa̱ ta̱ David ña̱ kaʼndachíñura nu̱ú na̱ xíka ku̱a̱chi ta ta̱xitura ña̱ koo ta̱ David veʼera.

Tándi̱ʼi, tá ndi̱kó ta̱ David xíʼin na̱ xíka ku̱a̱chi tá ni̱xa̱ʼa̱nna ka̱nitáʼanna xíʼin na̱ ñuu Filisteo, ná si̱ʼí ñuu Israel xítaná yaa: ʼTa̱ Saúl ku̱a̱ʼá na̱ yiví xa̱ʼníra, soo ta̱ David ku̱a̱ʼákana xa̱ʼní ta̱yóʼoʼ. Ta̱ Saúl ni̱sa̱a̱ní-inira xa̱ʼa ña̱ ni̱ka̱ʼa̱n ná si̱ʼí yóʼo, chi ni̱ka̱ʼa̱n va̱ʼakaná xa̱ʼa ta̱ David su̱víka xa̱ʼa miíra. Soo ta̱ Jonatán se̱ʼe ta̱ Saúl kǒo nísáa̱-inira xa̱ʼa ña̱yóʼo. Chi ta̱ Jonatán xíʼin ta̱ David kúʼvi̱-inira xínitáʼanra. Migo kooyó ndiʼi tiempo káchira xíʼin táʼanra.

Ta̱ David va̱ʼaní sákaʼara tú arpa, ta ta̱ Saúl kútóora yaa ña̱ sákaʼa ta̱yóʼo. Ta iin ki̱vi̱, xa̱ʼa ña̱ sáa̱ní-ini ta̱ Saúl xínira ta̱ David kúni̱ra kaʼníra ta̱yóʼo. Tá níndúʼu ta̱ David sákaʼara tú arpa, ta̱ Saúl sa̱kánara yitu̱n tú ka̱a ña̱ kaʼníra ta̱ David ta ndákanixi̱níra: ʼKaʼníra vitinʼ. Ta̱ David kama ka̱vara miíra ta va̱ása níkaniña miíra. Tá ni̱ya̱ʼa tiempo, ta̱ Saúl kúni̱ kaʼní tukura ta̱ David, soo vitin ta̱ David kíʼinra kuenta xíʼin miíra.

¿Á ndákaʼún xa̱ʼa ña̱ ni̱ka̱ʼa̱n ta̱ Saúl? Ni̱ka̱ʼa̱nra taxira se̱ʼera ña̱ tindaʼa̱ñá xíʼin ta̱ kuchiñu kaʼní ta̱ Goliat. Ta vitinví ni̱ka̱ʼa̱n ta̱ Saúl xíʼin ta̱ David ña̱ kivi tindaʼa̱ra xíʼin ñá Mical se̱ʼera. Soo siʼna xíniñúʼu kaʼníra iin 100 na̱ ñuu Filisteo. Ndakanixi̱níún, ña̱ kúni̱ ta̱ Saúl kúúña, na̱ ñuu Filisteo ná kaʼnína ta̱ David. Soo ta̱ David kǒo níxi̱ʼi̱ra, ta̱ Saúl ta̱xivara se̱ʼera ti̱ndaʼa̱ñá xíʼin ta̱yóʼo.

Iin ki̱vi̱ ta̱ Saúl ni̱ka̱ʼa̱nra xíʼin ta̱ Jonatán xíʼin ndiʼi na̱ káchíñu nu̱úra ña̱ kúni̱ra kaʼníra ta̱ David. Soo ta̱ Jonatán káchira xíʼinra: ʼVa̱ása kaʼníún ta̱ David. Chi kǒo ña̱ʼa kéʼéra xíʼún. Nda̱a̱ chi̱ndeéra yóʼó. Va̱ása níyi̱ʼvíra ku̱ʼu̱nra kaʼníra ta̱ Goliat, tá xi̱niún ni̱kuchiñura xa̱ʼníra ta̱yóʼo, nda̱a̱ ni̱kusi̱íkaví-iniúnʼ.

Ta̱ Saúl xi̱niso̱ʼora ña̱ ni̱ka̱ʼa̱n ta̱ Jonatán xíʼinra, ta ni̱ka̱ʼa̱nra ña̱ kǒo kaʼníra ta̱ David. Tuku ki̱xa̱a̱ ta̱ David ña̱ kachíñura nu̱ú ta̱ Saúl. Tasaá, iin ki̱vi̱ tá níndúʼu ta̱ David sákaʼara, ta̱ Saúl tuku sa̱kánara ka̱a ku̱a̱ʼa̱nña sa̱tá ta̱yóʼo. Ta̱ David kama ka̱vara miíra, ta tú yitu̱n ka̱a yóʼo kandíka veʼeva ka̱a̱nnú. Ta vitin xa̱u̱ni̱ yichi̱ kúú ña̱yóʼo. Ta̱ David xíni̱ra ña̱ va̱ása kívika koora veʼe ta̱ Saúl.

Ta míí ñu̱ú saá ku̱a̱ʼa̱nva ta̱ David chí veʼera, soo ta̱ Saúl chi̱ndaʼára ta̱a ña̱ ku̱a̱ʼa̱nna kaʼnína ta̱yóʼo. Ñá Mical kúnda̱a̱va-iniñá ña̱ kúni̱ yiváñá kaʼníra ta̱ David. Ña̱kán ni̱ka̱ʼa̱nñá xíʼin ta̱ David: ʼÑu̱ú vitin xíniñúʼu ku̱ʼún chi tá ná kǒo ku̱ʼún ta̱an xa̱ni̱xi̱ʼi̱vaúnʼ. Ta ñu̱ú saá, ñá Mical ta̱vá se̱ʼéñá ta̱ David chí ventana ku̱a̱ʼa̱nra. Xa̱kúyatin u̱xa̱ ku̱i̱ya̱ xíka se̱ʼéra nu̱ú ta̱ Saúl, xíkara yóʼo ta xíkara chí káa.