Ta̱ David xíʼin ta̱ Saúl

Tándiʼi xa̱ʼní ta̱ David ta̱ Goliat, ta̱ rey Saúl ta̱xira ña̱ kaʼndachíñu ta̱ David nu̱ú na̱ xíka nu̱ú ku̱a̱chi. Ta̱ David ku̱a̱ʼání na̱ ñuu ka̱nitáʼanra xíʼin ta na̱kuchiñuvara xíʼinna ta va̱ʼaní káʼa̱nna xa̱ʼara. Tá ndi̱kó ta̱ David xíʼin na̱ xíka nu̱ú ku̱a̱chi xíʼinra, ná ñaʼá ñuu Israel xítaná yaa: “Ta̱ Saúl ku̱a̱ʼá na̱ yiví xa̱ʼníra, soo ta̱ David ku̱a̱ʼákana xa̱ʼníra”. Ta̱ Saúl ni̱sa̱a̱níra ta ki̱xaʼára kúni̱ra kaʼníra ta̱ David.

Ta̱ David va̱ʼaní sákaʼara tú arpa. Iin ki̱vi̱ tá sákaʼara iin yaa nu̱ú ta̱ Saúl, ta̱ rey yóʼo sa̱kánara yitu̱n tú ka̱a ña̱ kaʼníra ta̱ David. Ta̱ David kama ka̱vara miíra ta va̱ása níkaninúra, nama̱va ka̱ninú. Tá ni̱ya̱ʼa tiempo, ta̱ Saúl kúni̱ kaʼní tukura ta̱ David. Va̱ʼaka xi̱nu ta̱ David ku̱a̱ʼa̱nra chí ñuʼú yi̱chí.

Tasaá ta̱ Saúl nda̱kiʼinra 3,000 na̱ soldado ku̱a̱ʼa̱n xíʼinra sa̱tá ta̱ David. Soo kǒo níxini ta̱ Saúl ta ni̱ki̱ʼvira ini iin káva nu̱ú ndíka̱a̱ ta̱ David. Ta na̱ ta̱a xíka xíʼin ta̱ David ni̱ka̱ʼa̱nna: “Vitin kúú ña̱ va̱ʼaní kaʼníún ta̱ Saúl”. Ta̱ David ku̱yatinra nu̱ú ndíka̱a̱ ta̱ Saúl ta xa̱ʼndara loʼo yuʼú ti̱ko̱to̱ ta̱ Saúl. Soo tándi̱ʼi ni̱kusuchíní-inira chi kǒo ní ixato̱ʼóra ta̱ nda̱ka̱xin Jehová. Ña̱kán kǒo nítaxira kaʼnína ta̱ Saúl. Tá ki̱ta ta̱ Saúl ini kavá, ta̱ David ni̱ka̱ʼa̱nra: “Va̱ʼava kaʼníi̱ yóʼó soo va̱ása níkeʼi̱ña”. ¿Á kǒoka ña̱ keʼé ta̱ Saúl xíʼin ta̱ David vitin túviún?

Ta̱ Saúl kúni̱ tá kúni̱vara kaʼníra ta̱ David. Soo iin ñu̱ú ta̱ David xíʼin xa̱xi̱nra ni̱ki̱ʼvi se̱ʼéna nu̱ú ndíka̱a̱ ta̱ Saúl. Nda̱a̱ ta̱ Abner ta̱ ndáa ta̱ Saúl va̱ása níxinira tá ni̱ki̱ʼvi ta̱ David chi kísi̱nvara. Ta̱ Abisái ni̱ka̱ʼa̱nra xíʼin ta̱ David: “Vitin ná kaʼníyó ta̱ Saúl taxi ná kaʼníi̱ra”. Soo ta̱ David ni̱ka̱ʼa̱nra: “Mií Jehová xíni̱ ndáaña keʼéra xíʼin ta̱yóʼo. Va̱ʼaka kiʼin yitu̱n tú ka̱a xíʼin ña̱ ñúʼu ti̱kui̱í xíʼira ta ná ku̱ʼu̱nyó”.

Tándi̱ʼi ku̱a̱ʼa̱n ta̱ David chí xi̱ní iin yuku̱ ña̱ íyo yatin kán. Nda̱a̱ nu̱ú súkun túvi nu̱ú ndíka̱a̱ ta̱ Saúl. Ta̱ David ndeé va̱ʼa ni̱ka̱ʼa̱nra: “Abner, ¿nda̱chun va̱ása ndáún ta̱ rey? ¿Míí ku̱a̱ʼa̱n yitu̱n tú ka̱a xíʼin ña̱ ñúʼu ti̱kui̱í xíʼira?”. Ta̱ Saúl nda̱kunira tu̱ʼun ta̱ David ta ni̱ka̱ʼa̱nra xíʼinra: “Ni xa̱a̱ kiviva kaʼníún yi̱ʼi̱, va̱ása níxaʼníún yi̱ʼi̱. Vitin kúnda̱a̱-inii̱ ña̱yóʼo koo rey nu̱ú na̱ ñuu Israel”. Tasaá ndi̱kó ta̱ Saúl chí veʼera. Soo sava na̱ táʼan ta̱ Saúl va̱ása sáa̱-inina xínina ta̱ David.