Kándíxana ña̱ chindeé Ndióxi̱ miína

KUAʼÁNÍ na̱ yiví ke̱e ñuu Babilonia ta ku̱a̱ʼa̱nna chí ñuu Jerusalén. Soo tá ni̱xa̱a̱na ñuu Jerusalén xa̱ndi̱ʼi-xa̱ʼa ndiʼivaña. Ni iin na̱ yiví kǒo ndóo nu̱úña. Na̱ ñuu Israel xíniñúʼu ndasava̱ʼa xa̱á tukunaña.

Míí ña̱ nu̱ú va̱ʼa ke̱ʼéna tá ni̱xa̱a̱na, kúú iin altar. Yóʼo kúú nu̱ú xáʼmina kití á ña̱ʼa táxina ndaʼa̱ Jehová. Loʼo yo̱o̱ ni̱ya̱ʼa ta ki̱xaʼána íxava̱ʼana templo. Soo na̱ ñuu na̱ sáa̱-ini xíniñaʼá sáyi̱ʼvínana ña̱ ná kǒo keʼéna ña̱yóʼo. Ta na̱yóʼo sa̱xinu̱na-ini ta̱ rey xa̱á ta̱ ñuu Persia ña̱ keʼéra iin ley ña̱ ka̱ʼa̱n ña̱ kǒo keʼékana chiñu yóʼo.

Xa̱ni̱ya̱ʼa 17 ku̱i̱ya̱ tá ke̱e na̱ ñuu Israel ñuu Babilonia. Ndióxi̱ chi̱ndaʼára ta̱ profeta Ageo xíʼin ta̱ Zacarías ña̱ ka̱ʼa̱nna xíʼin na̱ yiví ña̱ ná keʼé tukuna templo. Na̱ yiví kándíxana Ndióxi̱ ña̱ chindeéra miína ta xíniso̱ʼona ña̱ káʼa̱nra. Ki̱xaʼá íxava̱ʼa tukuna templo, ni íyo iin ley ña̱ káʼa̱n ña̱ ná kǒo keʼénaña.

Xa̱ʼa ña̱yóʼo va̱xi iin ta̱ xáʼndachíñu ñuu Persia ta̱ naní Tatenai, ta káchira xíʼinna yukú xa̱ʼndachíñu ña̱ keʼéna templo yóʼo. Na̱ ñuu Israel ni̱ka̱ʼa̱nna xíʼinra ta̱ Ciro ta̱ rey ñuu Babilonia ni̱ka̱ʼa̱n xíʼinna keʼénaña, ta káchira xíʼinna káchina: ʼKuaʼándó ñuu Jerusalén ta keʼéndó templo Jehová Ndióxi̱ndóʼ.

Ta̱ Tatenai chi̱ndaʼára iin carta ku̱a̱ʼa̱nña ñuu Babilonia ña̱ ndáka̱tu̱ʼunra, á ndixa xa̱ʼnda ta̱ Ciro chiñu ña̱ keʼéna veʼe yóʼo, chi ta̱ Ciro xa̱ni̱xi̱ʼi̱vara. Ta kama ki̱xa̱a̱ iin carta ta̱ rey xa̱á ta̱ ñuu Persia, ta ña̱yóʼo káchiña ña̱ ndixa kúú ña̱ ni̱ka̱ʼa̱n ta̱ Ciro keʼénaña. Xa̱ʼa ña̱yóʼo ni̱ka̱ʼa̱nra xíʼin ta̱ Tatenai: ʼKǒo keʼéndó na̱ ñuu Israel ná keʼéna veʼe Ndióxi̱na. Ta xa̱ʼndara chiñu ná chindeé táʼanna xíʼinnaʼ. Ta ti̱xin ku̱mí ku̱i̱ya̱ ni̱kuchiñuna sa̱xínuna templo, ta kúsi̱íkaví-inina.

Xa̱ni̱ya̱ʼa 48 ku̱i̱ya̱ ña̱ ni̱xi̱nu templo. Na̱ yiví na̱ ñuu Jerusalén na̱ ndáʼvi kúúna ta ñuuna xíʼin templo Jehová ndáʼvi náʼa̱ña. Ta̱ Esdras ta̱ ñuu Israel ta̱ íyo ñuu Babilonia na̱kunda̱a̱-inira ña̱ xíniñúʼu ndasaviína templo Jehová. Xa̱ʼa ña̱yóʼo, ¿á xíni̱ún ndáaña ke̱ʼéra?

Ku̱a̱ʼa̱nra nu̱ú ta̱ rey Artajerjes ta̱ ñuu Persia, ta̱ rey yóʼo va̱ʼaní ta̱a kúúra chi ku̱a̱ʼání ña̱ʼa ta̱xira ndaʼa̱ ta̱ Esdras ña̱ ku̱ʼu̱n xíʼinra chí ñuu Jerusalén. Ta̱ Esdras ni̱ka̱ʼa̱nra xíʼin na̱ ñuu Israel na̱ ndóo ñuu Babilonia ña̱ ná chindeé táʼanna xíʼinra, ta 6,000 kúú na̱ ni̱ka̱ʼa̱n ku̱ʼu̱n xíʼinra. Ta ku̱a̱ʼání plata xíʼin oro xíʼin inkaka ña̱ʼa ku̱a̱ʼa̱n xíʼinna.

Ta̱ Esdras ndíʼi̱ní-inira, chi yichi̱ nu̱ú ku̱a̱ʼa̱nna íyoní na̱ ndi̱va̱ʼa-ini. Ta kivi kindaana oro xíʼin ña̱ plata ndaʼa̱na ta nda̱a̱ kivi kaʼnínana. Xa̱ʼa ña̱yóʼo, ta̱yóʼo nda̱kayara na̱ yiví táki̱ʼva xítoún nu̱ú na̱ʼná yóʼo. Tasaá ni̱ka̱ʼa̱nna xíʼin Jehová ña̱ ná kundaarana chi káni̱ní yichi̱ ku̱ʼu̱nna chí ñuu Jerusalén.

Ta xi̱ndaava Jehová miína. Ku̱mí yo̱o̱ ni̱xi̱kana yichi̱, ta vitin ni̱xa̱a̱ va̱ʼavana chí ñuu Jerusalén. ¿Á kǒo sánáʼa̱ ña̱yóʼo miíyó ña̱ kíʼinva Jehová kuenta xíʼin na̱ kándíxañaʼá?