Iin ángel ta̱ ni̱xa̱ʼa̱n xi̱toniʼni ñá María

MARÍA naní ñá ñaʼá livi yóʼo. Ñá ñuu Israel kúúñá, ta íyoñá ñuu ña̱ naní Nazaret. Ndióxi̱ xíni̱ra chi va̱ʼaní ñaʼá kúúñá. Ña̱kán chi̱ndaʼára iin ángel ta̱ naní Gabriel ña̱ ka̱ʼa̱nra xíʼinñá. ¿Á xíni̱ún ndáaña káʼa̱nra xíʼinñá? Yóʼo kunda̱a̱-iniyó xa̱ʼaña.

ʼKuaʼún ñá loʼo, Ndióxi̱ kúsi̱íní-inira xíʼún chi va̱ʼaní ñaʼá kúún ta vitin íyora xíʼúnʼ, káchi ta̱ ángel Gabriel xíʼinñá. Ñá María nda̱a̱ ni iin yichi̱ kǒo xíniñá ta̱yóʼo. Ta ndíʼi̱-iniñá chi kǒo kúnda̱a̱-iniñá ndáaña kúni̱ kachira. Soo ndi̱ku̱n kama sa̱ndíkora-iniñá.

Ta káchira xíʼinñá: ʼVa̱ása kundi̱ʼi̱ní-iniún María, Jehová kúsi̱íní-inira xíʼin ña̱ kéʼún. Íyo iin ña̱ va̱ʼa kúni̱ra taxira ndaʼún. Vitin koo iin se̱ʼún. Tá ná kakura, Jesús chinúún ki̱vi̱raʼ.

Ta̱ Ángel Gabriel káchira: ʼTa̱ loʼo yóʼo xa̱a̱ra kuura iin ta̱a káʼnu, ta kunaníra Se̱ʼe Ndióxi̱. Jehová taxira iin chiñu ndaʼa̱ra ña̱ kuura rey, táki̱ʼva ni̱xi̱yo ta̱ David. Soo ta̱yóʼo xa̱a̱ra kuura rey ndiʼi tiempo, ta ña̱ kaʼndachíñura kǒo ndiʼi-xa̱ʼañaʼ.

Ñá María ni̱nda̱ka̱tu̱ʼunñá ta̱ ángel: ʼ¿Á ña̱ ndixa kúú ña̱ káʼún xíʼi̱n? Chi kúma̱níva tindaʼíi̱ ta kǒo íyoi̱ xíʼin iin ta̱a, ¿ndachun káʼún ña̱ koo iin se̱ʼi̱?ʼ, káchiñá xíʼinra.

ʼMií espíritu yi̱i̱ Ndióxi̱ koo xíʼún. Ña̱kán ta̱ loʼo yóʼo, Se̱ʼe Ndióxi̱ ka̱ʼa̱nna xíʼinra. ¿Á ndákaʼún xa̱ʼa ñá táʼún ñá Elizabet? Na̱ yiví káchina xa̱chéeníñá ña̱ koo iin se̱ʼeñá. Soo vitin koo iin se̱ʼeñá. Ña̱kán, kuniún kǒo ña̱ʼa íxaa yo̱ʼvi xíʼin Ndióxi̱ chi va̱ʼava keʼéra ndiʼi ña̱ʼa ña̱ kúni̱ra kooʼ, káchi ta̱ ángel xíʼiñá.

Ndi̱ku̱n saá ni̱ka̱ʼa̱n ñá María xíʼinra: ʼNá koo ña̱ ni̱ka̱ʼún xíʼi̱n chi ñá xa̱káchíñu nu̱ú Jehová kúi̱ʼ. Tasaá nda̱kiʼin ta̱ ángel ku̱a̱ʼa̱nvara.

Ñá María ndi̱ku̱n nda̱kiʼinñá ku̱a̱ʼa̱nñá kotoñá ñá Elizabet. Tá xi̱niso̱ʼo ñá Elizabet tu̱ʼun ñá María, ta̱ loʼo ndíka̱a̱ ti̱xinñá ni̱kusi̱íní-inira ta ka̱nditara. Ñá Elizabet ni̱ki̱ʼvi espíritu yi̱i̱ Ndióxi̱ miíñá, ta káchiñá: ʼKáʼnuní yóʼó nu̱ú ndiʼi ná si̱ʼíʼ. Ñá María ni̱xi̱yoñá u̱ni̱ yo̱o̱ xíʼin ñá Elizabet, tasaá ndi̱kóñá chí ñuuñá ña̱ Nazaret.

Xa̱ni̱nu̱mí tindaʼa̱ ñá María xíʼin ta̱ José. Soo tá na̱kunda̱a̱-inira ña̱ ñúʼu se̱ʼeñá, kǒo níxiinkara tindaʼa̱ra xíʼinñá. Tasaá ta̱ ángel ni̱ka̱ʼa̱nra xíʼin ta̱ José: ʼKǒo yi̱ʼvíún tindaʼún xíʼin ñá María. Chi Ndióxi̱ ta̱xi ña̱ va̱ʼa koo se̱ʼeñáʼ. Ta vitin ta̱ José xíʼin ñá María ti̱ndaʼa̱vana, ta ndátuna ña̱ kaku ta̱ Jesús.