Ta̱ ángel Gabriel ni̱xa̱ʼa̱nra xi̱tora ñá María

Ñá María iin ñá loʼo ñá ni̱xi̱yo ñuu Nazaret xi̱kuuñá ta táʼan ñá Elisabet xi̱kuuñá. Ñá María xíʼin iin ta̱ carpintero ta̱ naní José tindaʼa̱ñá. Tá xa̱a̱ ni̱ya̱ʼa i̱ñu̱ yo̱o̱ ña̱ ñúʼu se̱ʼe ñá Elisabet, ta̱ ángel Gabriel ni̱xa̱ʼa̱nra xi̱tora ñá María ta ni̱ka̱ʼa̱nra xíʼinñá: “Kúaʼún María, ku̱a̱ʼání ña̱ va̱ʼa ta̱xi Jehová ndaʼún”. Ñáyóʼo kǒo níkunda̱a̱-iniñá nda̱chun káʼa̱nra ña̱yóʼo, xa̱ʼa ña̱yóʼo ni̱ka̱ʼa̱nra xíʼinñá: “Koo iin se̱ʼún. Ta xíniñúʼu kunaníra Jesús. Ta̱yóʼo koo rey, ta ña̱ kuniʼi chíñura va̱ása ndiʼi-xa̱ʼaña”.

Ñá María ni̱ka̱ʼa̱nñá: “Soo ñá kúa̱anva kúi̱. ¿Nda̱chun va̱ʼa koo se̱ʼi̱?”. Ta̱ Gabriel ni̱ka̱ʼa̱nra: “Ndiʼi ña̱ʼa kivi keʼé Jehová. Mií espíritu Ndióxi̱ koo xíʼún ta koo iin se̱ʼún. Ñá Elisabet táʼún ñúʼutu se̱ʼe ñáyóʼova”. Ñá María nda̱kuiinñá: “Nda̱a̱ táki̱ʼva ni̱ka̱ʼún ná kuu, chi ñá xa̱a̱ káchíñu nu̱ú Jehová kúi̱.”

Ñá María ni̱xa̱ʼa̱nñá xi̱toñá ñá Elisabet iin ñuu ña̱ kíndo̱o chí sa̱tá yuku̱. Tá ni̱xa̱a̱ñá kán, chi̱ndeéñá, ta ni̱kanda ña̱ loʼo ndíka̱a̱ ti̱xin ñá Elisabet. Tasaá nda̱kiʼinñá espíritu Ndióxi̱ ta ni̱ka̱ʼa̱nñá: “María, ku̱a̱ʼání ña̱ va̱ʼa ta̱xi Jehová ndaʼún. Iin ña̱ va̱ʼaní kúú ña̱ ki̱xa̱ún nu̱úi̱ chi siʼí iin ta̱ káʼnuní koún”. Ta nda̱kuiin ñá María: “Ndásakáʼnui̱ Jehová xíʼin ndiʼi níma̱i̱”. Kán ni̱xi̱yoñá u̱ni̱ yo̱o̱ tasaá ndi̱kóñá chí veʼeñá.

Tá na̱kunda̱a̱-ini ta̱ José ña̱ ñúʼu se̱ʼe ñá María kǒo níxiinkara tindaʼa̱ra xíʼinñá. Soo ta̱ ángel ni̱ka̱ʼa̱n xíʼinra: “Va̱ása yi̱ʼvíún ña̱ tindaʼún xíʼin ñá María. Kǒo ni iin ña̱ va̱ása va̱ʼa níkeʼéñá”. Tasaá ti̱ndaʼa̱ ta̱ José xíʼin ñá María ta nda̱kiʼinrañá ku̱a̱ʼa̱n xíʼinra chí veʼera.