Ta̱ loʼo ta̱ ni̱ki̱si̱

TA̱ Pablo ndíka̱a̱ra káʼa̱nndosóra ñuu Troas nu̱ú na̱ discípulo. Saáchi xa̱xíni̱ra ku̱a̱ʼání tiempo ya̱ʼa ña̱ kǒo kunikarana, chi inka ki̱vi̱ ku̱ʼu̱nra xíʼin barco. Xa̱sava ñu̱úva kúúña ta káʼa̱nndosókara.

Koto nu̱ú na̱ʼná. Yóʼo kíta ta̱ Pablo xíʼin ta̱ Timoteo va̱xina, ¿ndáaña ku̱u yóʼo? ¿Á ta̱ nda̱kava kúú ta̱ loʼo yóʼo?

Chí ventana ke̱era nda̱kavara, Eutico naníra. Yu̱ʼu̱ ventana ña̱ piso u̱ni̱ níndúʼura ta kán ke̱era nda̱kavara, chi ta̱ ni̱ki̱si̱ kúúra. Koto, na̱ yiví yóʼo ndíʼi̱kaví-inina xa̱ʼara. Tá nda̱niʼinara xa̱ni̱xi̱ʼi̱vara.

Tá xi̱ni ta̱ Pablo ni̱xi̱ʼi̱ ta̱ loʼo yóʼo, nu̱mirara. Tasaá ni̱ka̱ʼa̱nra xíʼinna: ʼKǒo kundi̱ʼi̱-inindó. Chi kǒo ña̱ʼa níndóʼoraʼ. Ta ña̱ nda̱a̱ kúúña kǒo ña̱ʼa níndóʼora, ta̱ Pablo sa̱ndátakuñaʼá. Ndiʼina ni̱kusi̱íkaví-inina.

Tándi̱ʼi nda̱taku ta̱ loʼo yóʼo ni̱ndi̱ʼvina ini veʼe ta ki̱xaʼána xíxina. Ta̱ Pablo káʼa̱nndosókara nda̱a̱ tá ni̱tu̱vi. Soo ta̱ loʼo kǒo níki̱si̱kara. Tándi̱ʼi ta̱ Pablo xíʼin ta̱ Timoteo xíʼin na̱ xíka xíʼinna nda̱ana tú barco ta ku̱a̱ʼa̱nvana. ¿Á xíni̱ún ndáa ñuu ku̱a̱ʼa̱nna?

Loʼova tiempo ki̱ta ta̱ Pablo tá ni̱xa̱ʼa̱nra sa̱náʼa̱ra na̱ yiví ña̱ yichi̱ u̱vi̱. Ta ña̱ yichi̱ u̱ni̱ ku̱a̱ʼáka tiempo ni̱xa̱ʼa̱nra. Chi u̱ni̱ví ku̱i̱ya̱ ni̱xi̱yora ñuu Éfeso, ñuu yóʼo kúú nu̱ú sa̱ndíʼira ña̱ yichi̱ u̱ni̱.

Tá ki̱tara ñuu Troas, tú barco tú ku̱a̱ʼa̱nra xíʼin ni̱xa̱a̱nú ñuu Mileto, ta kán ki̱ndo̱onú loʼo tiempo. Ta ñuu yóʼo yatinva ndíka̱a̱ña xíʼin ñuu Éfeso. Ña̱kán ka̱na ta̱ Pablo ndiʼi na̱ xi̱ku̱aʼa na̱ ñúʼu congregación ñuu Éfeso ña̱ ná kixina ñuu Mileto ña̱ ka̱ʼa̱nra xíʼinna ta nda̱yírana. Chi kǒo ndikókara kunirana. Tá nda̱kanda̱ tú Barco ku̱a̱ʼa̱nnú, ni̱kusuchíkaví-inina xa̱ʼara.

Nda̱a̱ vitinví ndi̱kó tú barco xíʼin ta̱ Pablo chí ñuu Cesarea. Tá níndúʼu ta̱ Pablo veʼe ta̱ discípulo ta̱ naní Felipe, saá ni̱ka̱ʼa̱n ta̱ profeta Ágabo xíʼinra tá ná ku̱ʼu̱nra chí ñuu Jerusalén kán tiinnara chika̱a̱na veʼeka̱a. Míí ña̱ ni̱ka̱ʼa̱n ta̱ Ágabo kúú míí ña̱ ku̱uva. U̱vi̱ ku̱i̱ya̱ xi̱ndika̱a̱ra veʼeka̱a ña̱ ñuu Cesarea, saáví chi̱ndaʼánara ku̱a̱ʼa̱nra nu̱ú na̱ xáʼndachíñu chí ñuu Roma ña̱ tiinna ku̱a̱chi xíʼinra. Ná kotoyó ndáaña ndo̱ʼora yichi̱.