¿Ndíá ña̱ ndóʼoyó tá xa̱ ni̱xi̱ʼi̱yó?

Ña̱ xíʼi̱yó síín íyoña nu̱ú ña̱ tiákuyó. Ndi̱a̱ tá íyo ña̱ kíxi̱níyó saá íyoña tá xíʼi̱yó (Juan 11:11-14). Na̱ xa̱ ni̱xi̱ʼi̱ kǔví kuniso̱ʼona, ní kǔví kotona, ní kǔví ka̱ʼa̱na, ní kǔví ndakanixi̱nína (Eclesiastés 9:5, 10). Veñu̱ʼu ña̱ vatá sánáʼa̱ña ndí, tá xíʼi̱ na̱ yiví ndóo níma̱na ta kua̱ʼa̱ña chí ñuu ndi̱i xíʼin na̱ táʼana na̱ ni̱xi̱ʼi̱. Su̱ví ña̱yóʼo sánáʼa̱ Tu̱ʼun Ndióxi̱.

Na̱ xa̱ ni̱xi̱ʼi̱ va̱ása kuvi chindiétáʼana xíʼinyó ní kǔvi keʼéna ña̱ vǎʼá xíʼinyó. Na̱ yiví távana vikó ndi̱i, íxava̱ʼana iin yitún tooso xíʼin ita kuaún, ta chíndoona ña̱ʼa kuxi na̱ ndi̱i, chi káʼa̱na ndí, kútóo na̱ ndi̱i ña̱yóʼo. Ndióxi̱ kǒó kútóora ña, saáchi ña̱yóʼo kúú ña̱ vatá ña̱ xíniñúʼu ra̱ Ndiva̱ʼa. Ní va̱ása kútóo na̱ ni̱xi̱ʼi̱ ña̱yóʼo chi va̱ása tiákukana. Va̱ása yiʼviyóna, ní ndǎsakáʼnuyó na. Iinda̱á Ndióxi̱ kañúʼuyó (Mateo 4:10).

Na̱ ni̱xi̱ʼi̱ ndatiakuna. Ki̱ví va̱xi, Jehová sandatiakura na̱ ni̱xi̱ʼi̱ ta kundoona nu̱ú Ñuʼú luvi (Juan 5:28, 29; Hechos 24:15). Ndióxi̱ kuvi sandatiakura na̱ ni̱xi̱ʼi̱ ndi̱a̱ tá íxaayó tá ndániʼiyó iin na̱ kíxi̱ní (Marcos 5:22, 23, 41, 42).

Ña̱ ndóo níma̱yó tá xa̱ ni̱xi̱ʼiyó, ña̱ vatá kúúña, ña̱yóʼo xíniñúʼu ra̱ Ndiva̱ʼa ta ku̱a̱ʼání na̱ yiví kándixa ña. Ra̱ Ndiva̱ʼa xíʼin na̱ tachí ndiva̱ʼa na̱ ndíkun sa̱tára sándáʼvina na̱ yiví ña̱ ná kandixana ndí, níma̱ na̱ ni̱xi̱ʼi̱ kuvi taxiña kue̱ʼe̱ á kua̱chi ndaʼá na̱ tiáku. Sándáʼvitura na̱ yiví xíʼin xa̱ni á sátu̱vira nu̱ú na. Ña̱kán Jehová sandiʼira xa̱ʼá na̱ yiví ndákuatu á káʼa̱n xíʼin na̱ ni̱xi̱ʼi̱ (Deuteronomio 18:10-12).