¿Á íyo nu̱ú ku̱a̱ʼa̱nyó tá xa̱a̱ xíʼi̱yó?

¿Á xa̱a̱ ni̱xi̱ʼi̱ iin na̱ táʼún na̱ kúni̱níún xíniún? Tá ni̱ya̱ʼún nu̱ú ña̱ yo̱ʼvi̱ní yóʼo sana nda̱kanixi̱níún ña̱yóʼo: “¿Á íyo iin lugar nu̱ú ku̱a̱ʼa̱nyó tá xa̱a̱ xíʼi̱yó? ¿Á kivi ndikói̱ kunii̱ na̱ táʼi̱n na̱ ni̱xi̱ʼi̱?”. Nu̱ú lección yóʼo ta saátu ña̱ va̱xi ka̱ʼa̱nyó xa̱ʼa̱ ña̱ viíní káʼa̱n ña̱ Biblia xa̱ʼa̱ ña̱yóʼo ña̱ kivi chindeétáʼan xíʼinyó.

1. ¿Á íyo nu̱ú ku̱a̱ʼa̱nyó tá xa̱a̱ xíʼi̱yó?

Ta̱ Jesús chi̱táʼanra ña̱ xíʼi̱yó xíʼin ki̱ʼva íyo ña̱ kísi̱yó, tá iin na̱ yiví ndeéní kísi̱na va̱ása kúnda̱a̱-inina ndáaña kúu, tá iinna xíʼi̱na va̱ása xóʼvi̱kana ta ní kǒo ndóʼoka-inina. Ña̱ Biblia káchiña “na̱ ni̱xi̱ʼi̱ kǒo nda̱a̱ ni iin ña̱ʼa xíni̱kana xa̱ʼa̱” (kaʼvi Eclesiastés 9:5).

2. Ña̱ nda̱a̱ xa̱ʼa̱ ña̱ xíʼi̱yó, ¿ndáa ki̱ʼva chíndeétáʼanña xíʼinyó?

Ku̱a̱ʼání na̱ yiví yíʼvina kuvina ta saátu yíʼvina na̱ xa̱a̱ ni̱xi̱ʼi̱, tá saá ndóʼún ña̱ káʼa̱n Biblia xa̱ʼa̱ ña̱ xíʼi̱yó kivi chindeétáʼanña xíʼún ña̱ vií koún. Ta̱ Jesús ni̱ka̱ʼa̱nra: “Tá ná kunda̱a̱-inindó xa̱ʼa̱ ña̱ nda̱a̱ sa̱ñándó” (Juan 8:​32). Ni xa̱a̱ síín síín íyo ña̱ sánáʼa̱ na̱ religión, savana sánáʼa̱na ña̱ tá xíʼi̱yó kíndo̱ova níma̱yó xíkaña soo su̱ví ña̱yóʼo kúú ña̱ sánáʼa̱ Biblia, ña̱kán nda̱a̱ ni iinna kǒo xóʼvi̱na tá xa̱a̱ ni̱xi̱ʼi̱na. Xa̱ʼa̱ ña̱ kǒo kúnda̱a̱ka-ini na̱ xa̱a̱ ni̱xi̱ʼi̱ xa̱ʼa̱ ni iin ña̱ʼa, kǒo nda̱a̱ ni iin ña̱ va̱ása va̱ʼa kivi keʼéna xíʼinyó, ña̱kán va̱ása xíniñúʼuví ndakuatiyó nu̱úna ña̱ va̱ása sáxo̱ʼvi̱na miíyó á ña̱ ixato̱ʼóyóna.

Sava na̱ yiví káchina ña̱ kivi ka̱ʼa̱nna xíʼin na̱ ni̱xi̱ʼi̱, soo su̱ví ña̱ ndixa kúú ña̱yóʼo. Nda̱a̱ táki̱ʼva xa̱a̱ sa̱kuaʼayó, na̱ ni̱xi̱ʼi̱ kǒo nda̱a̱ ni iin ña̱ʼa kúnda̱a̱ka-inina xa̱ʼa̱. Na̱ kándíxa na̱ káʼa̱n xíʼin na̱ táʼanna na̱ xa̱a̱ ni̱xi̱ʼi̱, sana xíʼin na̱ ta̱chí ndi̱va̱ʼa kúú na̱ káʼa̱nna xíʼin, saáchi na̱yóʼo ndákiʼinna nu̱ú na̱ xa̱a̱ ni̱xi̱ʼi̱. Ña̱ kúnda̱a̱-iniyó xa̱ʼa̱ ña̱ nda̱a̱ ña̱ ndóʼoyó tá xa̱a̱ xíʼi̱yó ndáaña miíyó nu̱ú na̱ ta̱chí ndi̱va̱ʼa. Jehová káʼa̱nra xíʼinyó ña̱ ná va̱ása kuni̱yó ka̱ʼa̱nyó xíʼin na̱ xa̱a̱ ni̱xi̱ʼi̱, saáchi tá ná keʼéyó ña̱yóʼo xíʼin na̱ ta̱chí ndi̱va̱ʼava ka̱ʼa̱nyó ta iin ña̱ i̱yoní kúú ña̱yóʼo (kaʼvi Deuteronomio 18:​10-​12).

3. Ña̱ ndixa kúu tá xíʼi̱yó

Nu̱ú iníísaá ñuyǐví xa̱a̱ síín síín íyo ña̱ kándíxana xa̱ʼa̱ ña̱ kúu tá xíʼi̱yó, soo su̱ví ndiʼi ña̱ kándíxana ña̱ nda̱a̱ kúúña.

• Ñuu nu̱ú íyoún, ¿ndáaña kándíxana xa̱ʼa̱ na̱ xa̱a̱ ni̱xi̱ʼi̱?

VIDEO: ¿Ndáaña ndóʼo na̱ xíʼi̱? (iin táʼvíña) (1:​19)

Kaʼvindó Eclesiastés 3:​20 ta ka̱ʼa̱nndó xa̱ʼa̱ ña̱yóʼo:

• Nda̱a̱ táki̱ʼva káchi versículo yóʼo, ¿ndáaña ndóʼo na̱ yiví tá xíʼi̱na?

• Tá ni̱xi̱ʼi̱ iin na̱ yiví, ¿á kíndo̱o níma̱na á espírituna iin lugar?

Ña̱ Biblia káʼa̱nña xa̱ʼa̱ ña̱ ni̱xi̱ʼi̱ ta̱ Lázaro, iin ta̱ va̱ʼaní xi̱kitáʼan xíʼin ta̱ Jesús. ¿Ndáa ki̱ʼva ni̱xi̱yo ta̱ Lázaro tá ni̱xi̱ʼi̱ra ka̱chi ta̱ Jesús? Kaʼvindó Juan 11:​11-​14 ta ka̱ʼa̱nndó xa̱ʼa̱ ña̱yóʼo:

• ¿Ndáaña chi̱táʼan ta̱ Jesús xíʼin ña̱ xíʼi̱yó?

• Ña̱ ni̱ka̱ʼa̱nra yóʼo, ¿ndáaña sánáʼa̱ña miíyó xa̱ʼa̱ ña̱ xíʼi̱yó?

• ¿Á ndixa kúú ña̱ káʼa̱n ña̱ Biblia xa̱ʼa̱ ña̱ xíʼi̱yó?

4. Tá kúnda̱a̱-iniyó ña̱ nda̱a̱ xa̱ʼa̱ ña̱ xíʼi̱yó sáñáña miíyó

Tá kúnda̱a̱-iniyó ña̱ nda̱a̱ xa̱ʼa̱ ña̱ xíʼi̱yó va̱ása yíʼvikayó na̱ xa̱a̱ ni̱xi̱ʼi̱. Kaʼvindó Eclesiastés 9:​10 ta ka̱ʼa̱nndó xa̱ʼa̱ ña̱yóʼo:

• ¿Á kivi keʼé na̱ xa̱a̱ ni̱xi̱ʼi̱ ña̱ va̱ása va̱ʼa xíʼinyó?

Ta saátu ña̱ nda̱a̱ ña̱ sánáʼa̱ ña̱ Biblia sáñáña miíyó nu̱ú ña̱ kándíxa na̱ yiví, ña̱ xíniñúʼu taxiyó ña̱ʼa ndaʼa̱ na̱ xa̱a̱ ni̱xi̱ʼi̱ á ña̱ xíniñúʼu ixato̱ʼóyóna. Kaʼvindó Isaías 8:​19 xíʼin Apocalipsis 4:​11, ta ka̱ʼa̱nndó xa̱ʼa̱ ña̱yóʼo:

• ¿Ndáaña ndóʼo Jehová tá iin na̱ yiví ndásakáʼnuna na̱ ni̱xi̱ʼi̱ á ndúkúna ña̱ ná chindeétáʼan na̱yóʼo xíʼinna?

5. Ña̱ nda̱a̱ ña̱ káʼa̱n xa̱ʼa̱ na̱ ni̱xi̱ʼi̱ sándi̱koña-iniyó

Ku̱a̱ʼánína káʼa̱nna, tá xíʼi̱ iin na̱ yiví xóʼvi̱na xa̱ʼa̱ ndiʼi ña̱ va̱ása va̱ʼa ke̱ʼéna. Soo va̱ʼaní kúniyó tá kúnda̱a̱-iniyó ña̱ ni iinna va̱ása xo̱ʼvi̱ tá ná kuvina, ni na̱ ke̱ʼé ña̱ va̱ása va̱ʼa. Kaʼvindó Romanos 6:7 ta ka̱ʼa̱nndó xa̱ʼa̱ ña̱yóʼo:

• Nda̱a̱ táki̱ʼva káchi ña̱ Biblia, tá xíʼi̱ iin na̱ yiví ndíʼi-xa̱ʼa̱ ku̱a̱china á sáña̱na nu̱úña. Tá saá, ¿á kándíxaún ña̱ xóʼvi̱ na̱ xa̱a̱ ni̱xi̱ʼi̱ ña̱ va̱ʼa chaʼvina xa̱ʼa̱ ña̱ va̱ása va̱ʼa ke̱ʼéna tá ya̱chi̱?

Tá kúnda̱a̱ka-iniyó xa̱ʼa̱ Jehová káxika kúnda̱a̱-iniyó ña̱ va̱ása sáxo̱ʼvi̱ra na̱ xa̱a̱ ni̱xi̱ʼi̱. Kaʼvindó Deuteronomio 32:4 xíʼin 1 Juan 4:8, ta ka̱ʼa̱nndó xa̱ʼa̱ ña̱yóʼo:

• Nda̱a̱ táki̱ʼva káʼa̱n ña̱ versículo yóʼo, ¿á taxi Ndióxi̱ ta̱ va̱ʼa-ini ña̱ ná xo̱ʼvi̱ na̱ xa̱a̱ ni̱xi̱ʼi̱?

• Tá kúnda̱a̱-iniyó ña̱ nda̱a̱ xa̱ʼa̱ ña̱ xíʼi̱yó, ¿á sándi̱koña-iniyó? ¿Nda̱chun?

ÑA̱ XA̱A̱ SA̱KUAʼAYÓ

Tá iinna xíʼi̱na, kǒoka ña̱ kivi keʼéna. Na̱ xa̱a̱ ni̱xi̱ʼi̱ va̱ása xóʼvi̱kana ta ni va̱ása kivi sandóʼona inka yiví.

Ná ndakaʼányó xa̱ʼa̱ ña̱yóʼo

• ¿Á íyo nu̱ú ku̱a̱ʼa̱nyó tá xa̱a̱ ni̱xi̱ʼi̱yó?

• Ña̱ kúnda̱a̱-iniyó ña̱ nda̱a̱ xa̱ʼa̱ ña̱ xíʼi̱yó, ¿ndáa ki̱ʼva sáñáña miíyó?

• Ña̱ kúnda̱a̱-iniyó ña̱ nda̱a̱ xa̱ʼa̱ ña̱ xíʼi̱yó, ¿ndáa ki̱ʼva sándi̱koña-iniyó?

NANDUKÚKA XA̱ʼA̱ÑA

Sakúaʼa ndáaña kúni̱ kachi tu̱ʼun alma ña̱ va̱xi nu̱ú Biblia.

“¿Ndáaña kúú alma?” (Artículo ña̱ va̱xi nu̱ú jw.org)

Koto á táxi Ndióxi̱ castigo ndaʼa̱ na̱ yiví ti̱xin infierno.

Ña̱ infierno, ¿á iin lugar nu̱ú xóʼvi̱na kúúña? (3:​07)

¿Á xíniñúʼu yi̱ʼvíyó na̱ xa̱a̱ ni̱xi̱ʼi̱?

Espíritu na̱ xa̱a̱ ni̱xi̱ʼi̱... ¿á kivi chindeétáʼanna xíʼinyó?, ¿á sándóʼona miíyó? ¿Á ndixa íyona? (Folleto)

Kaʼvi xa̱ʼa̱ iin ta̱a, tá na̱kunda̱a̱-inira ña̱ nda̱a̱ xa̱ʼa̱ ña̱ xíʼi̱yó sa̱ndíkoña-inira.

“Nda̱kandaní-inii̱ xíʼin ña̱ káxi káʼa̱n ña̱ Biblia” (La Atalaya, 1 tí febrero ku̱i̱ya̱ 2015)