LECCIÓN 16

¿Ndáaña kéʼé na̱ chindeé congregación?

Iin ta̱ chíndeé congregación táxira tutu ndaʼa̱na — Myanmar

Káʼa̱nndosó iin ta̱ chíndeé congregación — Nu̱ú káʼa̱nndosóna

Ta̱ chíndeé congregación távara grupo na̱ ku̱ʼu̱n xíʼinra sanáʼa̱na na̱ yiví — Ndátakana ña̱ ku̱ʼu̱nna sanáʼa̱na na̱ yiví

Iin ta̱ chíndeé congregación tíʼvíra veʼe nu̱ú ndátakana — Tíʼvína Veʼe nu̱ú Ndákutáʼan na̱ Testigo Jehová

Ña̱ Biblia káʼa̱nña xa̱ʼa u̱vi̱ grupo iin na̱ kúú na̱ xi̱ku̱aʼa na̱ kíʼin kuenta xíʼin congregación ta inkana chíndeé táʼan xíʼinña (Filipenses 1:1). Sava congregación ku̱a̱ʼá na̱yóʼo íyo. ¿Ndáaña kéʼé na̱ chindeé congregación?

Chíndeéna na̱ xi̱ku̱aʼa na̱ kíʼin kuenta xíʼin congregación. Na̱ chíndeé congregación chíka̱a̱na ndée ña̱ kéʼéna ña̱ káʼa̱n Biblia, ta va̱ʼa kandíxayóna chi vií kéʼéna chiñu ña̱ táxina ndaʼa̱na ti̱xin congregación, ta su̱ví iinúú ku̱i̱ya̱ ndiʼi na̱yóʼo savana xa̱chéevana. Ku̱a̱ʼání chiñu kéʼéna ta ndiʼi chiñu na̱yóʼo ndáyáʼviña. Xa̱ʼa ña̱yóʼo na̱ xi̱ku̱aʼa na̱ kíʼin kuenta xíʼin congregación íyoka tíempona ña̱ kiʼinna kuenta xíʼinña ta sánáʼa̱na na̱ ku̱a̱ʼa̱n yóʼo.

Chiñu kéʼéna ndáyáʼviña. Na̱ xi̱ku̱aʼa na̱ kíʼin kuenta xíʼin congregación sava káʼa̱nna xíʼin na̱ chíndeé congregación ná koo tu̱ʼvana ndakiʼinna miíyó ta ndukúna nu̱ú kundooyó tá xáʼa̱nyó veʼe nu̱ú sákuaʼayó xa̱ʼa Ndióxi̱. Ta savakana kíʼin kuenta xíʼin ndusu, na̱ kíʼin kuenta xíʼin tutu ña̱ káʼviyó, na̱ kíʼin kuenta xíʼin xu̱ʼún, na̱ kíʼin kuenta xíʼin chiñu ña̱ míí ku̱ʼu̱nna natúʼunna xíʼin na̱ yiví xa̱ʼa Ndióxi̱. Íyotu na̱ xáʼa̱n káchíñu veʼe nu̱ú ndátakayó tá xa̱a̱ íyo chiñu, ta inkana chíndeé na̱ ñaniyó á na̱ ku̱ʼvayó na̱ xa̱chée. Nda̱a̱ ndáaka chiñu táxina ndaʼa̱ na̱yóʼo va̱ʼaní kéʼénaña, ña̱kán ndiʼina íxatǒʼona na̱yóʼo xa̱ʼa ña̱ kéʼéna (1 Timoteo 3:13).

Chínúúna iin yichi̱ nu̱úyó xa̱ʼa ña̱ kéʼéna chiñu Ndióxi̱. Xa̱ʼa ña̱ va̱ʼa kéʼéna chiñu Ndióxi̱ ña̱kán ndáka̱xinna na̱yóʼo ña̱ va̱ʼa chindeéna na̱ congregación. Ndiʼi ña̱ káʼa̱nna tá yáʼana káʼa̱nndosóna chíndeéña miíyó ña̱ sákuaʼakayó xa̱ʼa Ndióxi̱. Xa̱ʼa ña̱ kéena nátúʼunna xíʼin na̱ yiví xa̱ʼa Ndióxi̱ ña̱yóʼo sákusi̱íkaña-iniyó ña̱ kéekayó natúʼunyó xíʼin na̱ yiví. Xa̱ʼa ña̱ chíndeéna na̱ xi̱ku̱aʼa na̱ kíʼin kuenta xíʼin congregación, ña̱yóʼo sákusi̱íña-iniyó ta chíndeéña miíyó ña̱ va̱ʼa kutáʼankayó xíʼin na̱ káʼvi xíʼinyó (Efesios 4:16). Ta chí nu̱únínu kivi xa̱a̱na koona na̱ xi̱ku̱aʼa na̱ kiʼin kuenta xíʼin congregación.

¿Nda̱saa íyo na̱ chíndeé congregación?
¿Ndáaña kéʼé na̱yóʼo ti̱xin congregación?