Íyo ta̱a na̱ íyo nda̱a̱ táki̱ʼva íyo iin bendición

1. ¿Ndáaña va̱ʼa kúú ña̱ xa̱a̱ táxi ta̱ Jesús ndaʼa̱yó?

KǑO na̱ íyo nda̱a̱ táki̱ʼva íyo ta̱ Jesús saáchi iinlá ta̱kán kúú ta̱ va̱ʼaní-ini. Tá kúú, tá ni̱xi̱yora nu̱ú ñuʼú yóʼo xi̱niñúʼura ndee̱ ña̱ xi̱kuumiíra ña̱ ke̱ʼéra milagro tasaá chi̱ndeétáʼanra xíʼin ku̱a̱ʼání na̱ yiví (Luc. 9:​12-17). Ta iin ña̱ ndáyáʼviníka ke̱ʼéra kúú ña̱ ni̱xi̱ʼi̱ra xa̱ʼa̱yó (Juan 15:13). Ta nda̱a̱ vitin va̱ʼa-inira xíʼinyó ta nda̱a̱ táki̱ʼva ki̱ndoora xíʼinyó, káʼa̱nra xíʼin Jehová ña̱ ná kuniñúʼura espíritu santo ña̱ va̱ʼa sandíkora-iniyó ta sanáʼa̱ra miíyó (Juan 14:​16, 17; 16:13). Ta ti̱xin reunión sákuaʼayó ndáa ki̱ʼva sanáʼa̱yó na̱ yiví ña̱ va̱ʼa xa̱a̱na koona discípulo ta̱ Jesús (Mat. 28:​18-20).

2. ¿Ndáana kúú na̱ íyo nda̱a̱ táki̱ʼva íyo iin “bendición”? (Efesios 4:​7, 8).

² Soo su̱ví ña̱yóʼo kúú ndiʼi ña̱ táxi ta̱ Jesús ndaʼa̱yó. Ta̱ apóstol Pablo ka̱ʼyíra ña̱ tá nda̱a ta̱ Jesús ku̱a̱ʼa̱nra chí ndiví ta̱xira na̱ ta̱a ña̱ “koona iin bendición” (kaʼvi Efesios 4:​7, 8). Ni̱ka̱ʼa̱nra ña̱ ta̱xira na̱yóʼo ña̱ chindeétáʼanna xíʼinyó ti̱xin ña̱ congregación (Efes. 1:​22, 23; 4:​11-13). Na̱ kúú iin “bendición” tiempo vitin kúú na̱ siervo ministerial, na̱ anciano xíʼin na̱ superintendente ña̱ circuito.a Xa̱ʼa̱ ña̱ kúúna na̱ yiví ku̱a̱chi sava yichi̱ kǒo kéʼé viína sava ña̱ʼa (Sant. 3:2). Soo tátayó Jesucristo xíniñúʼura na̱yóʼo ña̱ va̱ʼa chindeétáʼanna xíʼinyó.

3. Ka̱ʼa̱n xa̱ʼa̱ iin ejemplo ña̱ náʼa̱ ndáa ki̱ʼva kivi chindeétáʼanyó xíʼin na̱ ta̱a na̱ ta̱xi ta̱ Jesús ndaʼa̱yó.

³ Mií ta̱ Jesús ta̱xi na̱ ta̱a yóʼo ña̱ va̱ʼa chindeétáʼanna xíʼin na̱ congregación (Efes. 4:12). Ta ndiʼivayó kivi chindeétáʼan xíʼinna ña̱ vií keʼéna chiñuna. Ña̱ va̱ʼa kunda̱a̱-iniyó xa̱ʼa̱ ña̱yóʼo ná ndakanixi̱níyó xa̱ʼa̱ na̱ íxava̱ʼa iin salón. Savana íxava̱ʼanaña, savana kéʼéna comida ña̱ kuxuna ta savana xíkona ña̱ʼa á kéʼéna inkaka chiñu válí. Ta ki̱ʼva saá kéʼé na̱ siervo ministerial, na̱ anciano xíʼin na̱ superintendente ña̱ circuito. Ku̱a̱ʼá chiñu kéʼé iin tá iinna ta ndiʼiyó kivi chindeétáʼanyó xíʼinna xíʼin ña̱ kéʼéyó á ña̱ káʼa̱nyó. Ná kotoyó ndáa ki̱ʼva chíndeétáʼan chiñu ña̱ kéʼéna xíʼinyó, ta saátu ná kotoyó ndáa ki̱ʼva na̱ʼa̱yó ña̱ táxiyó tíxa̱ʼvi ndaʼa̱na, ta saátu ná taxiyó tíxa̱ʼvi ndaʼa̱ ta Jesús xa̱ʼa̱ ña̱ ta̱xirana ndaʼa̱yó.

NA̱ SIERVO MINISTERIAL VA̱ʼANÍ CHÍNDEÉTÁʼANNA XÍʼINYÓ

4. ¿Ndáa chiñu xi̱keʼé na̱ siervo ministerial tá siglo nu̱ú?

⁴ Tá siglo nu̱ú, xi̱ndaka̱xinna sava na̱ hermano ña̱ va̱ʼa koona siervo ministerial (1 Tim. 3:8). Sana na̱yóʼo kúú na̱ ni̱ka̱ʼa̱n ta̱ apóstol Pablo xa̱ʼa̱ nu̱ú 1 Corintios 12:28 ña̱ nda̱kaxinnana ña̱ chindeétáʼanna xíʼin inkana. Na̱yóʼo kúú na̱ xi̱keʼé sava chiñu ta xa̱ʼa̱ ña̱yóʼo ni̱xi̱yo tiempo nu̱ú na̱ anciano ña̱ va̱ʼa sanáʼa̱na ta kotona ndáaña xíniñúʼu na̱ hermano. Na̱ siervo ministerial xi̱keʼéna copia tu̱ʼun Ndióxi̱ á xi̱satána ña̱ʼa ña̱ xi̱xiniñúʼuna ña̱ va̱ʼa kaʼyína ña̱yóʼo.

5. ¿Ndáa chiñu kúú ña̱ kéʼé na̱ siervo ministerial tiempo vitin?

⁵ ¿Ndáa chiñu kúú ña̱ kéʼé na̱ siervo ministerial tiempo vitin? (1 Ped. 4:10). Kíʼinna kuenta xíʼin donación ña̱ táxi na̱ congregación ta xítona ndáa territorio ku̱ʼu̱nna natúʼunna xíʼin na̱ yiví. Ndúkúna revista xíʼin libro ña̱ xíniñúʼu na̱ publicador ta táxinaña ndaʼa̱na, káchíñuna xíʼin audio xíʼin video, kúúna acomodador ta saátu chíndeétáʼanna tá ndúvií veʼe nu̱ú ndátakayó. Ndiʼi chiñu yóʼo xíniñúʼu keʼéna ña̱ va̱ʼa kǒo ña̱ʼa kuma̱ní ti̱xin congregación (1 Cor. 14:40). Sava na̱ siervo ministerial yáʼana ti̱xin reunión ña̱ xíyo ma̱ʼñú semana ta saátu táxina discurso. Ta saátu kivi chindeétáʼanna xíʼin ta̱ hermano ta̱ kíʼin kuenta xíʼin grupo ña̱ predicación. Ta sava yichi̱ iin ta̱ anciano kivi ka̱ʼa̱nra xíʼin iin ta̱ siervo ministerial ná ku̱ʼu̱nra xíʼinra ña̱ va̱ʼa keʼéra visita ña̱ pastoreo.

6. ¿Nda̱chun ndáyáʼviní chiñu ña̱ kéʼé na̱ siervo ministerial nu̱úyó?

⁶ ¿Nda̱chun ndáyáʼviní chiñu ña̱ kéʼé na̱ siervo ministerial nu̱úyó? Ná kotoyó ña̱ káʼa̱n sava na̱ hermano. Iin ñá hermana ñá naní Beberlyb ñá íyo chí Bolivia káʼa̱nñá ña̱yóʼo: “Xa̱ʼa̱ ña̱ va̱ʼaní kéʼé na̱ siervo ministerial chiñuna, va̱ʼa xíniso̱ʼi̱ iníísaá reunión. Ta xa̱ʼa̱ ña̱ viíní kéʼéna chiñu tá xíyo reunión, va̱ʼa xítai̱, táxii̱ comentario, xíniso̱ʼi̱ discurso, xítoi̱ video xíʼin na̱ʼná ña̱ yáʼa ti̱xin reunión. Sava na̱ hermano yóʼo ndáana yéʼé salón, tasaá kǒo ña̱ kundoʼo na̱ hermano ta saátu chíndeétáʼanna xíʼin na̱ xíto reunión chí internet. Tá ndíʼi reunión, ndáya̱kúnna veʼe nu̱ú ndákutáʼanyó, ndákaʼvina donación ta saátu táxina tutu ña̱ xíniñúʼuyó. Ña̱kán táxiníi̱ tíxa̱ʼvi ndaʼa̱na”. Ñá Leslie íyoñá ñuu Colombia ta yii̱ñá kúúra anciano, ñáyóʼo káʼa̱nñá: “Va̱ʼaní chíndeétáʼan na̱ siervo ministerial xíʼin yiíi̱. Tá ná kǒo chindeétáʼanna xíʼinra ña̱ keʼéra chiñu, sana ku̱a̱ʼání chiñu koo nu̱úra. Táxii̱ tíxa̱ʼvi ndaʼa̱na xa̱ʼa̱ ña̱ kúsi̱í-inina káchíñuna nu̱ú Jehová ta saátu xa̱ʼa̱ ña̱ kamaní kéʼéna chiñu”. Ndiʼi miíyó táxiyó tíxa̱ʼvi ndaʼa̱ na̱ siervo ministerial xa̱ʼa̱ ndiʼi chiñu ña̱ kéʼéna (1 Tim. 3:13).

7. ¿Ndáaña kivi keʼéyó ña̱ va̱ʼa na̱ʼa̱yó ña̱ táxiyó tíxa̱ʼvi ndaʼa̱ na̱ siervo ministerial? (Koto na̱ʼná).

⁷ Sana ndáyáʼviníva chiñu ña̱ kéʼé na̱ siervo ministerial nu̱úyó soo Biblia káʼa̱nña ña̱ ná ka̱ʼa̱nyó xíʼinna ña̱ va̱ʼaní íyo chiñu ña̱ kéʼéna (Col. 3:15). Ná kotoyó ndáa ki̱ʼva kéʼé iin ta̱ anciano ta̱ naní Daavid ta̱ íyo chí Finlandia ña̱yóʼo, ta̱yóʼo káchira: “Káʼyíi̱ carta á mensaje ku̱a̱ʼa̱n nu̱ú ta̱ siervo ministerial ta nu̱ú ña̱yóʼo káʼyíi̱ texto ña̱ va̱xi nu̱ú Biblia. Káxi káʼi̱n xíʼinra ndáa ki̱ʼva xa̱a̱ chíkaa̱ra ndee̱ xíʼi̱n ta táxii̱ tíxa̱ʼvi ndaʼa̱ra xa̱ʼa̱ chiñu ña̱ kéʼéra”. Ta̱ Pascal xíʼin ñá Jael, na̱ íyo ñuu Nueva Caledonia, káʼa̱nna xíʼin Jehová xa̱ʼa̱ na̱ siervo ministerial, na̱yóʼo káchina: “Táxiníndi̱ tíxa̱ʼvi ndaʼa̱ Jehová xa̱ʼa̱ na̱ siervo ministerial na̱ íyo ti̱xin congregaciónndi̱ ta káʼa̱n-ndáʼvindi̱ xíʼinra ña̱ ná chindeétáʼanra xíʼinna”. Jehová xíniso̱ʼora oración yóʼo ta chíndeétáʼanra xíʼin na̱ hermano (2 Cor. 1:11).

KU̱A̱ʼÁNÍ CHIÑU KÉʼÉ NA̱ ANCIANO

8. ¿Ndáa chiñu xi̱keʼé na̱ anciano na̱ ni̱xi̱yo tá siglo nu̱ú? (1 Tesalonicenses 5:​12, 13).

⁸ Na̱ anciano na̱ ni̱xi̱yo tá siglo nu̱ú, ku̱a̱ʼání chiñu xi̱keʼéna (kaʼvi 1 Tesalonicenses 5:​12, 13; 1 Tim. 5:17). Na̱yóʼo xi̱niʼina yichi̱ nu̱ú na̱ congregación, xi̱kaʼa̱nna ndáaña sakúaʼana tá xi̱ndatakana, ta saátu xi̱ndatakana ña̱ va̱ʼa ndaka̱xinna ndáaña keʼéna. Xi̱taxina consejo ndaʼa̱ na̱ hermano xíʼin ná hermana, káxi xi̱kaʼa̱nna xíʼinna soo vií ni̱xi̱yo ña̱yóʼo ña̱ va̱ʼa kundaana na̱ congregación (1 Tes. 2:​11, 12; 2 Tim. 4:2). Saátu xi̱chikaa̱na ndee̱ ña̱ vií kutáʼanna xíʼin Jehová ta saátu ña̱ kundaana na̱ veʼena (1 Tim. 3:​2, 4; Tito 1:​6-9).

9. ¿Ndáa chiñu kúú ña̱ kéʼé na̱ anciano tiempo vitin?

⁹ Saátu tiempo vitin ku̱a̱ʼání chiñu kéʼé na̱ anciano, saáchi sánáʼa̱na na̱ yiví xa̱ʼa̱ Ndióxi̱ (2 Tim. 4:5). Xítona ndáa territorio ku̱ʼu̱nyó natúʼunyó xíʼin na̱ yiví, kéena xíʼinyó predicación ta saátu sánáʼa̱na miíyó ndáa ki̱ʼva natúʼunyó xíʼin na̱ yiví tá sánáʼa̱yóna. Saátu nda̱kúní ndátiinna ku̱a̱chi ta kúndáʼvi-inina xínina miíyó. Tá iinna ni̱ki̱ʼvina ku̱a̱chi ndeé chíndeétáʼanna xíʼinna ña̱ va̱ʼa ndikó tukuna vií kutáʼanna xíʼin Jehová. Ta saátu chíndeétáʼanna xíʼin na̱ hermano ña̱ kǒo keʼéna ña̱ kini (1 Cor. 5:​12, 13; Gál. 6:1). Ndíʼi̱ní-inina xa̱ʼa̱yó ta va̱ʼaní ndáana miíyó (1 Ped. 5:​1-3). Viíní káʼa̱nna xa̱ʼa̱ ña̱ va̱xi nu̱ú Biblia tá táxina discurso, chíkaa̱na ndee̱ ña̱ kuxini̱na ndiʼi na̱ hermano ta saátu kéʼéna visita ña̱ pastoreo. Sava na̱ anciano káchíñuna nu̱ú kúva̱ʼa veʼe nu̱ú ndátakayó, ta savana káchíñuna ña̱ va̱ʼa nduviíña ta saátu íxatu̱ʼvana ndiʼi ña̱ʼa ña̱ va̱ʼa koo asamblea regional, saátu káchíñuna xíʼin na̱ Comité de Enlace con los Hospitales. Savatuna ñúʼuna ti̱xin grupo na̱ xáʼa̱n xíto na̱ kúúmií kue̱ʼe̱ á kéʼéna inkaka chiñu. Ña̱kán, ku̱a̱ʼáníva chiñu kéʼéna xa̱ʼa̱yó.

10. ¿Ndáa xa̱ʼa̱ kúú ña̱ kúni̱níyó xíniyó na̱ anciano?

¹⁰ Xa̱a̱ ya̱chi̱ví ni̱ka̱ʼa̱n Jehová ña̱ viíní kundaana ndikachi á levo sa̱na̱ra ta nda̱a̱ ni̱ka̱ʼa̱nra ña̱ va̱ása yi̱ʼvírí (Jer. 23:4). Na̱ anciano va̱ʼaní chi̱ndeétáʼanna xíʼin iin ñá hermana ñá ñuu Finlandia ñá naní Johanna tá ki̱ʼin kue̱ʼe̱ siʼíñá. Ñáyóʼo káchiñá: “Íxayo̱ʼvi̱níña xíʼi̱n ña̱ ka̱ʼi̱n xíʼin inkana xa̱ʼa̱ ña̱ ndóʼi̱. Soo iin ta̱ anciano ta̱ va̱ása xínii̱, viíní xi̱niso̱ʼora tá na̱túʼi̱n xíʼinra xa̱ʼa̱ ña̱ ndóʼi̱, ke̱ʼéra oración xíʼi̱n ta ni̱ka̱ʼa̱nra xíʼi̱n ña̱ kúni̱ní Jehová xínira yi̱ʼi̱. Kǒo ndákaʼíi̱n xa̱ʼa̱ ña̱ ni̱ka̱ʼa̱nra xíʼi̱n soo ndákaʼíi̱n ndáa ki̱ʼva ku̱nii̱ chi kǒo níyi̱ʼvíi̱”. Ta miíún, ¿ndáa ki̱ʼva xa̱a̱ chíndeétáʼan na̱ anciano xíʼún?

11. ¿Ndáa ki̱ʼva na̱ʼa̱yó ña̱ ndáyáʼviní chiñu ña̱ kéʼé na̱ anciano? (Koto na̱ʼná).

¹¹ Jehová kúni̱ra ña̱ ná taxiyó tíxa̱ʼvi ndaʼa̱ na̱ anciano xa̱ʼa̱ ndiʼi chiñu ña̱ kéʼéna (1 Tes. 5:​12, 13). Ñá Henrietta, ñá íyo ñuu Finlandia káʼa̱nñá: “Kúsi̱íní-ini na̱ anciano tá chíndeétáʼanna xíʼin inkana, soo ña̱yóʼo kǒo kúni̱ kachiña ña̱ íyoní tiempo nu̱úna á ña̱ kǒo kúnaána á ña̱ kǒo tu̱ndóʼo nu̱úna. Xa̱ʼa̱ ña̱kán, sava yichi̱ káʼi̱n xíʼin na̱ anciano: ‘Va̱ʼaní chiñu kéʼún’”. Ta iin ñá hermana ñá íyo ñuu Turquía ñá naní Sera káchiñá: “Xíniñúʼu chikaa̱yó ndee̱ xíʼin na̱ anciano ña̱ va̱ʼa vií keʼéna chiñuna. Káʼyíi̱ carta nu̱úna, kánai̱na kuxuna veʼi̱ ta saátu xáʼi̱n xíʼinna predicación”. ¿Á íyo iin ta̱ anciano ta̱ va̱ʼaní chíndeétáʼan xíʼún ta xa̱ʼa̱ ña̱kán kúni̱ún taxiún tíxa̱ʼvi ndaʼa̱ra? ¿Ndáa ki̱ʼva na̱ʼún ña̱ táxiún tíxa̱ʼvi ndaʼa̱ra? (1 Cor. 16:18).

NA̱ SUPERINTENDENTE ÑA̱ CIRCUITO CHÍKAA̱NA NDEE̱ XÍʼIN NA̱ CONGREGACIÓN

12. ¿Ndáa inka ña̱ va̱ʼa ta̱xi ta̱ Jesús ndaʼa̱ na̱ congregación ña̱ va̱ʼa chikaa̱ra ndee̱ xíʼinna? (1 Tesalonicenses 2:​7, 8).

¹² Íyo inka ña̱ va̱ʼa ta̱xi ta̱ Jesús ndaʼa̱ na̱ congregación. Tá siglo nu̱ú, ta̱ Jesús chi̱ndeétáʼanra xíʼin na̱ anciano na̱ ni̱xi̱yo ñuu Jerusalén ña̱ va̱ʼa ndaka̱xinna ta̱ Pablo, ta̱ Bernabé xíʼin inka na̱ hermano ña̱ va̱ʼa koona superintendente ta ku̱ʼu̱nna kotona na̱ congregación (Hech. 11:22). ¿Nda̱chun nda̱kaxinnana? Nda̱kaxinnana ña̱ va̱ʼa keʼéna chiñu táʼan ña̱ kéʼé na̱ siervo ministerial xíʼin na̱ anciano: ña̱ chikaa̱na ndee̱ xíʼin na̱ congregación (Hech. 15:​40, 41). Ku̱a̱ʼání chiñu ke̱ʼé na̱ cristiano na̱ ni̱xi̱yo tá siglo nu̱ú, ta sava yichi̱ nda̱a̱ i̱yo kuvina yichi̱ xa̱ʼa̱ ña̱ xi̱xa̱ʼa̱nna xi̱sanáʼa̱na na̱ hermano ta saátu ña̱ chikaa̱na ndee̱ xíʼinna (kaʼvi 1 Tesalonicenses 2:​7, 8).

13. ¿Ndáaña kúú sava chiñu ña̱ kéʼé na̱ superintendente ña̱ circuito?

¹³ Na̱ superintendente ña̱ circuito, xa̱a̱ síín síín congregación xáʼa̱nna xítona ta sava ña̱yóʼo xíkání kíndo̱oña. Ndiʼi semana xíniñúʼu taxina ku̱a̱ʼá discurso, kéʼéna visita ña̱ pastoreo, xíkuumiína reunión xíʼin na̱ precursor ta saátu xíʼin na̱ anciano ta távána grupo ña̱ predicación. Káʼvina ña̱ va̱ʼa taxina discurso ta saátu íxatu̱ʼvana ña̱ʼa ña̱ va̱ʼa koo asamblea ña̱ circuito xíʼin ña̱ regional. Ta saátu sánáʼa̱na ti̱xin escuela ña̱ precursor, íxatu̱ʼvatuna reunión ña̱ kuumiína xíʼin ndiʼi na̱ precursor na̱ ñúʼu circuito nu̱ú ñuʼúna, ta saátu kéʼéna inka chiñu ña̱ ndáyáʼviní ña̱ táxi na̱ hermano na̱ káchíñu Betel ndaʼa̱na.

14. ¿Nda̱chun ndáyáʼvi chiñu ña̱ kéʼé na̱ superintendente ña̱ circuito nu̱úyó?

¹⁴ ¿Ndáaña va̱ʼa ndákiʼin na̱ hermano xa̱ʼa̱ ña̱ viíní kéʼé na̱ superintendente ña̱ circuito chiñuna? Iin ta̱ hermano ta̱ ñuu Turquía káchira: “Tá xa̱a̱ kíxira xítora ndi̱ʼi̱, chíkaa̱níra ndee̱ xíʼi̱n ña̱ viíka kutáʼi̱n xíʼin na̱ hermano ta chindeétáʼi̱n xíʼinna. Xa̱a̱ ku̱a̱ʼání na̱ superintendente ña̱ circuito xíni̱i̱, ta ndiʼina tává tiempo ña̱ kuniso̱ʼona yi̱ʼi̱ tá xa̱a̱ kúni̱i̱ ka̱ʼi̱n xíʼinna”. Ñá Johanna, ñá ni̱ka̱ʼa̱nyó xa̱ʼa̱ nu̱ú párrafo 10, ki̱tañá predicación xíʼin iin ta̱ superintendente ña̱ circuito, soo kǒo ni iin na̱ yiví níkivi ka̱ʼa̱nna xíʼin, saáchi kǒo nda̱a̱ ni iinna níndani̱ʼína. Ñáyóʼo káchiñá: “Soo ni saá, ndákaʼánníi̱ xa̱ʼa̱ ki̱vi̱ kán. U̱vi̱ ná ku̱ʼvi̱i̱ ku̱a̱ʼa̱nná kooná inka ñuu ta xi̱ndakaʼánníi̱ xa̱ʼa̱ná. Viíní ni̱ka̱ʼa̱n ta̱ superintendente ña̱ circuito xíʼi̱n ta ni̱ka̱ʼa̱nra ña̱ tiempo vitin loʼova tiempo ku̱a̱ʼa̱nná nu̱úi̱, soo nu̱ú ñuyǐví xa̱á ku̱a̱ʼáníva tiempo koo xíʼin táʼanndi̱”. Kúni̱níva na̱ hermano xínina na̱ superintendente ña̱ circuito saáchi va̱ʼaní chíndeétáʼanna xíʼinna (Hech. 20:​37–21:1).

15. a) ¿Ndáa ki̱ʼva keʼéyó ña̱ káʼa̱n 3 Juan 5-8 tasaá na̱ʼa̱yó ña̱ táxiyó tíxa̱ʼvi ndaʼa̱ na̱ superintendente ña̱ circuito? (Koto na̱ʼná). b) ¿Ndáa ki̱ʼva chindeétáʼanyó xíʼin ñá síʼina? (Koto recuadro ña̱ naní “Ná chindeétáʼanyó xíʼin ñá síʼina”).

¹⁵ Ta̱ apóstol Juan ni̱ka̱ʼa̱nra xíʼin ta̱ Gayo ña̱ va̱ʼaka ná koo inira xíʼin na̱ xáʼa̱n xíto congregación, ta ni̱ka̱ʼa̱nra xíʼinra: “Chindeétáʼún xíʼinna ña̱ kǒo kuma̱ní ni iin ña̱ʼa nu̱úna yichi̱ nu̱ú ku̱ʼu̱nna, ta keʼúnña nda̱a̱ táki̱ʼva kútóo mií Ndióxi̱” (kaʼvi 3 Juan 5-8). ¿Ndáa ki̱ʼva keʼé miíyó táʼan ña̱yóʼo? Kivi kanayó na̱ superintendente ña̱ circuito kuxuna xíʼinyó, ta ku̱a̱ʼáka ki̱vi̱ ná keeyó semana ña̱ kíxina xítona miíyó. Ná kotoyó ña̱ ke̱ʼé ñá Leslie ñá ni̱ka̱ʼa̱nyó xa̱ʼa̱ nu̱ú párrafo 6 ña̱ va̱ʼa na̱ʼa̱ñá ña̱ táxiñá tíxa̱ʼvi ndaʼa̱na. Ñáyóʼo káchiñá: “Káʼi̱n xíʼin Jehová ña̱ chindeétáʼanra xíʼinna ña̱ kǒo kuma̱ní ni iin ña̱ʼa nu̱úna. Yiíi̱ xíʼin miíi̱ káʼyíndi̱ carta nu̱úna ta káʼa̱nndi̱ xíʼinna ña̱ chíkaa̱nína ndee̱ xíʼinndi̱ tá kíxina xítona ndi̱ʼi̱”. Na̱ superintendente ña̱ circuito íyona nda̱a̱ táki̱ʼva íyo miíyó, saáchi kíʼin kue̱ʼe̱ miína, íyo ña̱ ndíʼi-inina xa̱ʼa̱ ta saátu ndákava-inina sava yichi̱. Kivi kuniñúʼu Ndióxi̱ yóʼó ña̱ sandíkoún-inina á kivitu taxiún iin regalo loʼo ndaʼa̱na (Prov. 12:25).

ÍXAMA̱NÍ KU̱A̱ʼÁ TA̱A TA̱ KACHÍÑU NU̱Ú JEHOVÁ

16. Tá xa̱a̱ nda̱kuchiún, ¿ndáaña xíniñúʼu ndakanixi̱níún xa̱ʼa̱? (Proverbios 3:27).

¹⁶ Ndiʼi congregación ña̱ íyo iníísaá ñuyǐví íxama̱ní ku̱a̱ʼá ta̱a ta̱ kachíñu nu̱ú Jehová. Tá xa̱a̱ nda̱kuchiún ¿á kivi chikaún ndee̱ ña̱ kachíñu ku̱a̱ʼákaún nu̱ú Jehová? (kaʼvi Proverbios 3:27).c ¿Á xa̱a̱ chíka̱ún ndee̱ ña̱ va̱ʼa xa̱ún koún siervo ministerial? Tá xa̱a̱ kúún siervo ministerial, ¿á xa̱a̱ chíka̱ún ndee̱ ña̱ xa̱ún koún anciano? ¿Á kivi nasamaún ña̱ kéʼún ña̱ va̱ʼa ku̱ʼún escuela ña̱ naní Escuela para Evangelizadores del Reino? Tá ná ku̱ʼún escuela yóʼo, va̱ʼaníka kuniñúʼu ta̱ Jesús yóʼó ña̱ keʼún chiñu ti̱xin ñuu Jehová. Tá túviún ña̱ kǒo kúchiñún keʼúnña ka̱ʼa̱n xíʼin Jehová, ndukú espíritu santo nu̱úra ña̱ va̱ʼa viíní keʼún chiñu ña̱ taxina ndaʼún (Luc. 11:13; Hech. 20:28).d

17. ¿Ndáaña ni̱ka̱ʼa̱n ta̱ Jesús koo tiempo nu̱ú ndíʼi?

¹⁷ Ta̱ Jesús ni̱ka̱ʼa̱nra ña̱ koo na̱ ta̱a na̱ chindeétáʼan xíʼinyó tiempo nu̱ú ndíʼi vitin, ta ña̱yóʼo náʼa̱ña ña̱ viíní níʼira yichi̱ nu̱úyó (Mat. 28:20). Ta̱ Jesús ta̱ kúú Rey nu̱úyó, kúni̱níra xínira miíyó ta va̱ʼaní-inira xíʼinyó, ta xítora ndáaña xíniñúʼuyó ña̱kán táxira na̱ hermano na̱ chindeétáʼan xíʼinyó. Táxiníyó tíxa̱ʼvi ndaʼa̱na xa̱ʼa̱ chiñu ña̱ kéʼéna, ña̱kán ná ndukúyó ki̱ʼva ña̱ taxiyó tíxa̱ʼvi ndaʼa̱na, ta saátu ná taxiyó tíxa̱ʼvi ndaʼa̱ Jehová xa̱ʼa̱ chiñu ña̱ kéʼéna saáchi miíra kúú ta̱ táxi ndiʼi ña̱ va̱ʼa ndaʼa̱yó (Sant. 1:17).