¿Ndáana kúú Na̱ kíʼin kuenta xíʼin Ñuu Ndióxi̱ iníísaá ñuyǐví?

Tíempo xi̱naʼá ni̱xi̱yo iin grupo loʼo ñuu Jerusalén “na̱ apóstol xíʼin na̱ xi̱ku̱aʼa”, na̱yóʼo kúú na̱ xi̱kiʼin kuenta xíʼin ndiʼi na̱ congregación na̱ xi̱ku̱a̱ʼa̱n chí ndiví (Hechos 15:2). Ña̱ va̱ʼa inkáchi ka̱ʼa̱n ndiʼina xa̱ʼa ña̱ keʼéna, xi̱nandukuna ña̱ káʼa̱n Tu̱ʼun Ndióxi̱ ta xi̱ndiku̱nna yichi̱ ña̱ xi̱taxira ndaʼa̱na (Hechos 15:25). Ta Na̱ kíʼin kuenta xíʼin Ñuu Ndióxi̱ vitin ndíku̱nna yichi̱ na̱ xi̱ndoo tíempo xi̱naʼá.

Na̱yóʼo kúú na̱ xíniñúʼu Ndióxi̱ ña̱ kéʼéna ña̱ kúni̱ra. Na̱ kíʼin kuenta xíʼin Ñuu Ndióxi̱ na̱yóʼo kúú na̱ ndíʼi̱-ini xa̱ʼa tu̱ʼunra ña̱ va̱ʼa kunda̱a̱-iniyó xíʼinña. Ta xíni va̱ʼana taxina yichi̱ nu̱úyó xa̱ʼaña. U̱na̱ tá u̱na̱ ki̱vi̱ ndátakana ña̱ nátúʼunna xa̱ʼa ndáaña xíniñúʼu ndiʼi na̱ testigo Jehová ña̱ iníísaá ñuyǐví. Nu̱ú ña̱ Biblia távána ña̱ sánáʼa̱na, sava chíndaʼána carta á na̱ xi̱ku̱aʼa na̱ xíka xítoniʼni congregación á inka ñaniyó ña̱ ku̱a̱ʼa̱nna natúʼunna xíʼin na̱ congregación. Táʼan ña̱yóʼo xi̱keʼé ndiʼi na̱ xi̱ndoo tíempo xi̱naʼá. Ña̱yóʼo va̱ʼa chíndeéña na̱ congregación ña̱ inkáchi ndakanixi̱ní ndiʼina (Hechos 16:4, 5). Ta na̱yóʼo kúúna sánáʼa̱ miíyó xa̱ʼa Ndióxi̱, ta sándakaʼánna miíyó ña̱ ná kee ni̱ʼiyó natúʼunyó xa̱ʼa Ndióxi̱, ta na̱yóʼo kúútu na̱ kíʼin kuenta xíʼin tutu nu̱ú va̱xi ki̱vi̱ na̱ ndakiʼin iin chiñu ti̱xin congregación.

Ndíku̱nna ña̱ káʼa̱n Ndióxi̱. Na̱ kíʼin kuenta xíʼin Ñuu Ndióxi̱ ndíku̱nna míí ña̱ káʼa̱n Jehová xíʼin ña̱ káʼa̱n Jesús ta̱ níʼi chiñu xíʼin ndiʼi congregación (1 Corintios 11:3; Efesios 5:23). Ta na̱yóʼo kǒo xáʼndana chiñu ña̱ kúni̱ miína nu̱ú na̱ ñuu Ndióxi̱. Na̱yóʼo xíʼin na̱ ku̱ʼu̱nka chí ndiví ndíku̱nna ña̱ xáʼnda Jesús nu̱úna (Revelación 14:4). Na̱ kíʼin kuenta xíʼin Ñuu Ndióxi̱ tá káʼa̱nyó xa̱ʼana xíʼinra kúsi̱í-inina xa̱ʼa ña̱yóʼo.

• ¿Ndáana xi̱kiʼin kuenta xíʼin ñuu Ndióxi̱ ña̱ tíempo xi̱naʼá?

• Na̱ kíʼin kuenta xíʼin Ñuu Ndióxi̱ ña̱ tíempo vitin, ¿ndáaña kéʼéna ña̱ va̱ʼa ndíku̱nna míí ña̱ káʼa̱n Ndióxi̱?