¿Ndáaña kúú Betel?

Betel kúúña iin tu̱ʼun hebreo ta kúni̱ kachiña “Veʼe Ndióxi̱” (Génesis 28:17, 19, nota ña̱ Biblia). Ta íyoña iníísaá ñuyǐví ta yóʼo kúú nu̱ú káchíñu sava na̱ testigo Jehová, ta kán kúú nu̱ú xáʼndana chiñu ña̱ ku̱ʼu̱n tu̱ʼun Ndióxi̱ nu̱ú na̱ yiví. Na̱ kíʼin kuenta xíʼin Ñuu Ndióxi̱ íyona ña̱ Betel ña̱ ñuu Nueva York (Estados Unidos) kán kíʼinna kuenta xíʼin ndiʼi chiñu ña̱ kéʼé Betel inka ñuyǐví. Ndiʼi na̱ káchíñu kán nanína na̱ veʼe Betel. Chi ndiʼi na̱yóʼo nda̱a̱ tá íyona xíʼin na̱ veʼena saá ndóo xíʼin táʼanna. Chi iin káchi xíxina, iin káchi káchíñuna, ta iin káchi káʼvina Biblia (Salmo 133:1).

Na̱ káchíñu Betel xíʼin ndiʼi-inina káchíñuna. Ta iin iin Betel ñúʼu ta̱a ñúʼu na̱ siʼí ta ndiʼina káchíñu nu̱ú Ndióxi̱ ta ndíʼi̱-inina xa̱ʼa chiñura (Mateo 6:33). Táxina veʼe nu̱ú kundoo na̱ káchíñu yóʼo, táxina ña̱ kuxuna ta táxituna xu̱ʼún ndaʼa̱na ña̱ kuniñúʼuna, soo su̱ví ya̱ʼvina kúú ña̱yóʼo. Ta iin iinna íyo chiñu kéʼéna: na̱ káchíñu oficina, na̱ íxava̱ʼa ña̱ʼa xíxina, na̱ ndákata ti̱ko̱to̱na, na̱ tíʼví veʼe nu̱ú ndóona, savatuna káchíñu xíʼin máquina nu̱ú távána tutu, ta íyo ku̱a̱ʼáka chiñu kéʼé savana.

Veʼe yóʼo kúú nu̱ú ndíʼi̱ní-inina xa̱ʼa ña̱ ku̱ʼu̱n tu̱ʼun Ndióxi̱. Chiñu ña̱ ndíʼi̱ka-inina xa̱ʼa kúúña ná ku̱ʼu̱n tu̱ʼun Ndióxi̱ nu̱ú ku̱a̱ʼáka na̱ yiví. Ta xa̱ʼa ña̱yóʼo ta̱vána tutu yóʼo va̱xi ndaʼa̱yó. Chi Na̱ kíʼin kuenta xíʼin Ñuu Ndióxi̱ yóʼo kúú na̱ ni̱ka̱ʼa̱n ña̱ kaʼyínaña, tasaá chíndaʼánaña ku̱a̱ʼa̱nña iníísaá ñuyǐví nu̱ú ndiʼi na̱ sáyáʼaña inka tu̱ʼun, ta ku̱a̱ʼá Betel kúúmií máquina nu̱ú kánaña ta yáʼaka iin ciento u̱xu̱ mil congregación ku̱a̱ʼa̱nña. Na̱ ñúʼu Betel va̱ʼaní chiñu kéʼéna, chi tutu ña̱ tává na̱yóʼo ku̱a̱ʼa̱nña nu̱ú ndiʼi na̱ yiví ña̱ va̱ʼa kunda̱a̱-inina xa̱ʼa Ndióxi̱ (Marcos 13:10).

• ¿Ndáana kúú na̱ káchíñu Betel, ta ndáa ña̱ʼa táxina ndaʼa̱na?

• ¿Ndáa chiñu kúúña ndíʼi̱ka ini na̱ ñúʼu Betel xa̱ʼa?