¿Míí kána xu̱ʼún ña̱ káchíñu na̱ testigo Jehová?

Na̱ testigo Jehová, ndiʼi ku̱i̱ya̱ távána millón ta millón biblia xíʼin inkaka tutu ña̱ xáxana. Ta íxava̱ʼana Veʼe nu̱ú Ndákutáʼanna ña̱ sákuaʼana xa̱ʼa Ndióxi̱ ta íxava̱ʼana veʼe Betel, ta kíʼinna kuenta xíʼinña ná kǒo kúyatá kamaña. Ta kíʼinna kuenta xíʼin ndiʼi na̱ káchíñu Betel, na̱ misionero, ta chíndaʼána ña̱ʼa ku̱a̱ʼa̱nña ndaʼa̱ na̱ ñúʼu tu̱ndóʼo sava ñuu nu̱ú kóon sa̱vi̱ kini á sava nu̱ú táan. ¿Míí távána xu̱ʼún ña̱ va̱ʼa kéʼéna ndiʼi ña̱yóʼo?

Kǒo xu̱ʼún távandi̱ ndaʼa̱ na̱ yiví. Ndiʼi ña̱ kéʼéndi̱ ku̱a̱ʼá xu̱ʼún xíniñúʼuña, ni saaví kǒo xu̱ʼún távándi̱ ndaʼa̱ na̱ yiví. Xa̱yáʼa iin ciento ku̱i̱ya̱ ka̱na̱ tutu La Atalaya ña̱ ni̱ka̱ʼa̱n ndiʼi chiñu kéʼéndi̱ Jehová kúú ta̱ kíʼin kuenta xíʼinña. Ta ni̱ka̱ʼa̱nña: “Na̱ ñuu Ndióxi̱ kǒo xu̱ʼún ndukúna nu̱ú na̱ yiví ña̱ ná chindeé táʼanna xíʼinna”. Ni vitin kǒo xu̱ʼún ndúkúndi̱ nu̱ú na̱ yiví (Mateo 10:8).

Kéʼéndi̱ chiñu xíʼin xu̱ʼún ña̱ táxi na̱ yiví xíʼin ndinuʼu-inina. Ku̱a̱ʼání na̱ yiví kúsi̱í-inina xíʼin chiñu kéʼéndi̱ ña̱ sánáʼa̱ndi̱na xa̱ʼa Ndióxi ta savana ndinuʼu-inina táxina xu̱ʼún. Ta ndi̱ʼi̱ na̱ testigo Jehová xíniñúʼundi̱ tíempondi̱, ndéendi̱ xíʼin xu̱ʼúndi̱ ña̱ sánáʼa̱ndi̱ na̱ yiví xa̱ʼa Ndióxi̱ ña̱ iníísaá ñuyǐví (1 Crónicas 29:9). Ta veʼe nu̱ú sákuaʼandi̱ xa̱ʼa Ndióxi̱ xíʼin asamblea nu̱ú xáʼandi̱, kán íyo kaja válí ña̱ va̱ʼa taánndi̱ xu̱ʼún, na̱ kúni̱ taxiña xíʼin ndinuʼu-inina va̱ʼa taánnaña. Kivitu taxiyóña nu̱ú Internet jw.org. Ku̱a̱ʼá na̱ yiví na̱ kúú ndáʼví táxi xu̱ʼún, tasaá ndíku̱nna ña̱ keʼé ñá ñaʼá ñá ni̱ka̱ʼa̱n va̱ʼa Jesús xa̱ʼa, ñá ta̱án u̱vi̱ xu̱ʼún válí ini tú kaja válí tú xi̱ñuʼu ini veʼe nu̱ú xi̱ndasakáʼnuna Jehová ña̱ tíempo xi̱naʼá (Lucas 21:1-4). Na̱ kúni̱ taxi xu̱ʼún va̱ʼa taanna nda̱saa kúni̱ miína (1 Corintios 16:2; 2 Corintios 9:7).

Míí Jehová kúú ta̱ chíka̱a̱-ini na̱ yiví ña̱ ná ndasakáʼnuna miíra xíʼin xu̱ʼúnna ta ná kǒo sándákoona taxina xu̱ʼún ña̱kán va̱ʼa ná ku̱ʼu̱n tu̱ʼunra nu̱ú inka na̱ yiví, tasaá xi̱nu míí ña̱ kúni̱ra (Proverbios 3:9).

• ¿Ndáaña kúú ña̱ kéʼé ndi̱ʼi̱ na̱ testigo Jehová ta kǒo ña̱yóʼo kéʼé na̱ inka veʼe-ñu̱ʼu?

• ¿Ndáaña kéʼéna xíʼin xu̱ʼún ña̱ ndákaya?