¿Yukú míí na̱ ndixa xáʼndachíñu ñuyǐví yóʼo?

ÑA̱ KÁʼA̱N BIBLIA

“Iníísaá ñuyǐví ndíka̱a̱ña ndaʼa̱ ta̱ Ndi̱va̱ʼa”(1 Juan 5:19).

“Xa̱ʼa̱ ña̱yóʼo kúú ña̱ ki̱xi se̱ʼe Ndióxi̱: ña̱ va̱ʼa sandíʼi-xa̱ʼa̱ra ña̱ʼa ña̱ kéʼé ta̱ Ndi̱va̱ʼa” (1 Juan 3:8, Traducción del Nuevo Mundo).

¿NDÁAÑA VA̱ʼA NDAKIʼÚN TÁ NÁ KAʼVIÚNÑA?

Kunda̱a̱-iniún míí ki̱xaʼá xa̱ʼa tu̱ndóʼo ña̱ íyo ñuyǐví yóʼo (Apocalipsis 12:12).

Kunda̱a̱-iniún ndáa xa̱ʼa kúú ña̱ va̱ʼa kandíxaún ña̱ kǒoka tu̱ndóʼo koo ñuyǐví yóʼo (1 Juan 2:17).

¿Á VA̱ʼA KANDÍXAYÓ ÑA̱ KÁʼA̱N BIBLIA?

Va̱ʼava, yóʼo sakuaʼayó xa̱ʼa u̱ni̱ ña̱ʼa:

• Ña̱ xáʼndachíñu ta̱ Ndi̱va̱ʼa ña̱ ndiʼi-xa̱ʼa kúúvaña. Jehová iin chi̱ka̱a̱-inira ña̱ sandiʼi-xa̱ʼara ña̱ xáʼndachíñu ta̱ Ndi̱va̱ʼa ñuyǐví yóʼo. Ndióxi̱ káʼa̱nra sandiʼi-xa̱ʼara ndiʼi ña̱ kini ña̱ kéʼé ta̱ Ndi̱va̱ʼa (Hebreos 2:14).

• Ndióxi̱ nda̱kaxinra ta̱ Jesús ña̱ kaʼndachíñura. Ta̱ Jesús síínní íyora nu̱ú ta̱ Ndi̱va̱ʼa ta̱ xáʼndachíñu ñuyǐví yóʼo. Xa̱ʼa ña̱yóʼo, Ndióxi̱ káʼa̱nra nda̱saa kaʼndachíñu ta̱ Jesús: “Kuʼvi̱ní-inira kunira na̱ vitá-ini xíʼin na̱ ndáʼvi [...] ta tavára miína nu̱ú tu̱ndóʼo xíʼin nu̱ú ku̱a̱chi ña̱ ñúʼuna” (Salmo 72:13, 14).

• Ndióxi̱ kǒo káʼa̱nra tu̱ʼun vatá. Ña̱ Biblia káxiní káʼa̱nña Ndióxi̱ “va̱ása kívi sándaʼvira” (Hebreos 6:18). Tá káʼa̱n Jehová keʼéra iin ña̱ʼa, ña̱ sáxi̱nura kúúvaña (Isaías 55:10, 11). Ta saátu ni̱ka̱ʼa̱nra ña̱ tavára “ta̱ xáʼndachíñu ñuyǐví yóʼo” (Juan 12:31).