Sakuaʼandó xa̱ʼa Ndióxi̱ ña̱ va̱ʼa si̱í koondó

Na̱ yiví na̱ ti̱ndaʼa̱ ki̱vi̱ nu̱ú, Jehováa sa̱tindaʼa̱-ñaʼá. Ña̱ Biblia káʼa̱nña xíʼinyó Jehová ‘i̱xava̱ʼara iin ñaʼá tasaá ta̱xirañá ndaʼa̱ ta̱ ta̱aʼ ta ni̱kusi̱íkaví-ini ta̱ Adán, ta ni̱ka̱ʼa̱nra: “Ñáyóʼo ndixa kúú leke miíi̱ xíʼin ku̱ñu miíi̱” (Génesis 2:22, 23). Jehová kúni̱ra si̱í ná kundoo na̱ xa̱tindaʼa̱.

Na̱ sa̱kán tíndaʼa̱ sana ndákanixi̱nína ña̱ kǒo ku̱a̱chi kooví nu̱úna. Soo míí ña̱ nda̱a̱, nda̱a̱ na̱ kúni̱ní xínitáʼan koova ku̱a̱chi nu̱úna (1 Corintios 7:28). Nu̱ú folleto yóʼo ndani̱ʼún consejo ña̱ va̱ʼa chindeé yóʼó ña̱ va̱ʼa si̱í koún xíʼin ñá síʼún á xíʼin yiíún (Salmo 19:8-11).

1 KEʼÉNDÓ CHIÑU ÑA̱ TA̱XI JEHOVÁ NDAʼA̱NDÓ

ÑA̱ KÁʼA̱N BIBLIA: Ta̱a kúú ta̱ níʼi yichi̱ nu̱ú na̱ veʼera (Efesios 5:23).

Tá ta̱ xa̱tindaʼa̱ kúún, Jehová kúni̱ra ña̱ viíní ná kundaún ñá síʼún (1 Pedro 3:7). Jehová i̱xava̱ʼara ñá ñaʼá ña̱ chindeéñá yóʼó ta kúni̱ra ná kuʼvi̱ní-iniún kuniúnñá ta to̱ʼó koún xíʼinñá (Génesis 2:18). Xa̱ʼa ña̱ kúʼvi̱ní-iniún xíniúnñá, ña̱ʼa ña̱ kúni̱ñá á kútóoñá xíniñúʼu kundi̱ʼi̱ka-iniún xa̱ʼa ña̱yóʼo nu̱úka ña̱ kúni̱ miíún (Efesios 5:25-29).

Tá ñá xa̱tindaʼa̱ kúún, Jehová kúni̱ra ña̱ to̱ʼóní koún xíʼin yiíún ta chindeé táʼún xíʼinra (1 Corintios 11:3; Efesios 5:33). Xíʼin ndiʼi-iniún chindeúnra xa̱ʼa ndáaka ña̱ káʼa̱nra keʼéra ta kǒo sa̱a̱ún xíʼinra (Colosenses 3:18). Tá ná keʼún ña̱yóʼo, kusi̱íní-ini yiíún xíʼún ta saátu Jehová (1 Pedro 3:1-6).

ÑA̱ VA̱ʼA KEʼÉNDÓ:

• Nda̱ka̱tu̱ʼún yiíún á ñá síʼún ndáaña xíniñúʼu keʼún ña̱ va̱ʼaka kundoo xíʼin táʼanndó. Kuniso̱ʼo ta keʼé ña̱ káʼa̱n yiíún á ñá síʼún xíʼún

• Kǒo sáa̱ kamandó, chi kue kueva sakuaʼandó ña̱ xa̱a̱ndó vií koo xíʼin táʼanndó

2 NA̱ʼA̱NDÓ ÑA̱ NDIXA NDÍʼI̱-ININDÓ XA̱ʼA TÁʼANNDÓ

ÑA̱ KÁʼA̱N BIBLIA: Ña̱ ndáyáʼviní kúú ña̱ ndi̱ʼi̱-iniún xa̱ʼa ña̱ kútóo ñá síʼún á yiíún (Filipenses 2:3, 4). Vií koún xíʼin ñá síʼún á xíʼin yiíún, ndakaʼún chi Jehová kúni̱ra ndiʼi na̱ ndásakáʼnu-ñaʼá to̱ʼó ná koona ndiʼi tiempo (2 Timoteo 2:24). Ndakani vií xi̱níún xa̱ʼa ña̱ ka̱ʼún, chi Biblia káchiña: “Íyo na̱ kǒo ndákanixi̱ní xíʼin tu̱ʼun káʼa̱nna ta nda̱a̱ tá íyo iin yuchu̱ xi̱ín nu̱ú saá íyo tu̱ʼun káʼa̱nna, soo na̱ ndákanixi̱ní xíʼin tu̱ʼun káʼa̱n nda̱a̱ tá íyo na̱ sándáʼa saá íyona” (Proverbios 12:18). Espíritu Jehová chindeé miíún ña̱ va̱ʼa ndakani vií xi̱níún xíʼin tu̱ʼun ka̱ʼún (Gálatas 5:22, 23; Colosenses 4:6).

ÑA̱ VA̱ʼA KEʼÉNDÓ:

• Ka̱ʼa̱n xíʼin Jehová ña̱ va̱ʼa ná sandíkoora-iniún ta va̱ʼa ndakani vií xi̱níún xa̱ʼa ña̱ ka̱ʼún xíʼin ñá síʼún á xíʼin yiíún tá íyo tu̱ndóʼo nu̱úndó

• Ndakani va̱ʼa xi̱níún xa̱ʼa ña̱ ka̱ʼún ta ndáa ki̱ʼva ka̱ʼúnña

3 IIN YU̱ʼU̱ KOONDÓ

ÑA̱ KÁʼA̱N BIBLIA: Tá tindaʼa̱na “iinlá xa̱a̱na nduuna” (Mateo 19:5). Ni u̱vi̱ kúúndó ta síín ndákanixi̱ní iin iinvandó, soo xíniñúʼu sakuaʼandó ña̱ inkáchi ndakanixi̱níndó ta inkáchi ña̱ keʼéndó (Filipenses 2:2). Ndáyáʼviní ña̱ inkáchi kutáʼan yu̱ʼu̱ndó xa̱ʼa ndáaña keʼéndó. Ña̱ Biblia káchiña: ‘Na̱ ndúkú consejo va̱ʼa kána ña̱ kúni̱na keʼénaʼ (Proverbios 20:18). Tu̱ʼun Ndióxi̱ va̱ʼaní chindeéña ndóʼó xíʼin ndáaka ña̱ʼa kúni̱ndó keʼéndó (Proverbios 8:32, 33).

ÑA̱ VA̱ʼA KEʼÉNDÓ:

• Natúʼún xíʼin ñá síʼún á xíʼin yiíún xa̱ʼa ndiʼi ña̱ ndóʼún á ña̱ sándi̱ʼi̱-iniún

• Siʼnaka xíʼin ñá síʼún á xíʼin yiíún natúʼún xa̱ʼa ndáaka ña̱ kúni̱ún keʼún