Vií koo xíʼin táʼanndó

Jehová va̱ása kúni̱ra sandáʼvi-táʼanndó (Miqueas 6:8). Ndáyáʼviní ña̱ ná kǒo sándáʼvi-táʼanndó. Chi ña̱yóʼo chindeé ndóʼó ki̱vi̱ tá ki̱vi̱ ña̱ kukuni̱kandó kunitáʼanndó.

Tiempo vitin na̱ xa̱tindaʼa̱ ku̱a̱ʼánína sándáʼvi-táʼan. Ña̱ va̱ʼa ná kǒo ndoʼondó saá, xíniñúʼu keʼéndó sava ña̱yóʼo:

1 KUNDI̱ʼI̱-ININDÓ XA̱ʼA TÁʼANNDÓ

ÑA̱ KÁʼA̱N BIBLIA: “Kundi̱ʼi̱-inindó xa̱ʼa ña̱ʼa ña̱ ndáyáʼvika” (Filipenses 1:10). Ñá síʼún á yiíún kúú na̱ xíniñúʼu kundi̱ʼi̱ka-iniún xa̱ʼa.

Jehová kúni̱ra ña̱ iinlá ñá síʼún á yiíún kotóún nu̱ún, ña̱kán va̱ʼa si̱í kundoo xíʼin táʼanndó (Eclesiastés 9:9). Káxiní káʼa̱nra ña̱ va̱ása nandosó-iniún xa̱ʼa ñá síʼún á yiíún xíniñúʼu kotóún ndáa ki̱ʼva ndasasi̱ún-inira á iniñá (1 Corintios 10:24). Xíniñúʼu na̱ʼa̱ndó nu̱ú táʼanndó ña̱ ndixa kúni̱ táʼanndó.

ÑA̱ VA̱ʼA KEʼÉNDÓ:

• Tavándó tiempo ña̱ va̱ʼa koo xíʼin táʼanndó ta natúʼun xíʼin táʼanndó

• Va̱ása ndakanixi̱níún xa̱ʼa iinlá miíún, u̱vi̱ saándó ndakanixi̱níún xa̱ʼa

2 KUNDAANDÓ NÍMA̱NDÓ

ÑA̱ KÁʼA̱N BIBLIA: “Ndiʼi na̱ xíto nu̱ú iin ñaʼá ta kúni̱na ku̱su̱nna xíʼinñá xa̱ni̱ki̱ʼvina ku̱a̱chi xíʼinñá xíʼin níma̱na” (Mateo 5:28). Tá savana ndákanixi̱nína xa̱ʼa iin ñaʼá á iin ta̱a ta kúni̱na ku̱su̱nna xíʼinna, ña̱yóʼo kúni̱ kachiña nda̱a̱ táki̱ʼva íyo na̱ xa̱sandáʼvi ñá síʼí á yií saá íyona.

Jehová káʼa̱nra ña̱ xíniñúʼu kundaandó níma̱ndó (Proverbios 4:23; Jeremías 17:9). Ña̱ va̱ʼa kundaandóña xíniñúʼu kiʼinndó kuenta xíʼin ña̱ xítondó (Mateo 5:29, 30). Kundiku̱nndó yichi̱ ta̱ Job ta̱yóʼo iin chi̱ka̱a̱-inira ña̱ kǒo kotora nu̱ú inka ñaʼá ñá kǒo kúú ñá síʼíra (Job 31:1). Va̱ása kotondó nu̱ú tele á nu̱ú iin libro nu̱ú va̱xi na̱ yiví chala á na̱ kísi̱ xíʼin táʼan. Ni loʼo va̱ása ndakanixi̱níún xa̱ʼa inkana tá su̱ví ñá síʼún á yiíún kúúna.

ÑA̱ VA̱ʼA KEʼÉNDÓ:

• Na̱ʼa̱ nu̱ú inkana ña̱ iinlá ñá síʼún á yiíún kúni̱ún

• Kandíxa ña̱ káʼa̱n ñá síʼún á yiíún xíʼún tá kǒo kútóoñá á kǒo kútóora natúʼún xíʼin inkana, va̱ása natúʼún xíʼinna