¿Ndáaña keʼíi̱ tá íxandúxana xíʼi̱n ña̱ ku̱su̱i̱n xíʼin inkana?

¿NDÁAÑA KEʼÚN?

Ndakanixi̱ní xa̱ʼa̱ ña̱yóʼo: Ñá Heather xíʼin ta̱ Mike xa̱a̱ u̱vi̱ yo̱o̱ ku̱a̱ʼa̱n xínitáʼanna, soo nu̱ú miíñá xa̱a̱ ku̱a̱ʼání tiempo kúúña. Ndiʼi ki̱vi̱ chíndaʼána mensaje nu̱ú táʼanna ta káʼa̱ntuna xíʼin teléfono, ta nda̱a̱ xíni̱na ña̱ ndákanixi̱ní iin tá iinna ni ta̱ʼán ka̱ʼa̱nnaña. Soo vitin, ta̱ Mike va̱ása kúni̱ kuitíra natúʼunra, saáchi íyoka inka ña̱ʼa kúni̱ra keʼéra.

Nda̱a̱ vitin, ta̱ Mike xíʼin ñá Heather ña̱ kéʼé kuitína kúú ña̱ tíin ndaʼa̱ táʼanna ta chítú yuʼú táʼanna. Ñáyóʼo kǒo kúni̱ñá keʼéñá inkaka ña̱ʼa, soo ni kǒo kúni̱tuñá ndakoorañá. Saáchi viíní íyora xíʼinñá. Ta ñáyóʼo, ndákanixi̱níñá: “Ta̱ Mike xíʼin yi̱ʼi̱ kiviva keʼéndi̱ inka ña̱ʼa chi kúʼvi̱va-inindi̱ xínitáʼanndi̱”.

Tá xa̱a̱ kúúmiíún ku̱i̱ya̱ ña̱ koo novioún á noviaún, ¿ndáaña keʼún tá miíún níxi̱yo ñá Heather?

NDAKANIXI̱NÍ XA̱ʼA̱ ÑA̱YÓʼO

Tá ná sakánaún miíún ndaʼa̱ iin yitu̱n, tukue̱ʼe̱vaún. Saátu ndoʼún tá ná ya̱ʼandosóún ley Ndióxi̱ ta keʼún ña̱ kini, tá kúú ña̱ ku̱sún xíʼin na̱ ta̱ʼán tindaʼa̱ xíʼún (1 Tesalonicenses 4:3).

¿Ndáaña ndoʼún tá kǒo íxato̱ʼún ña̱yóʼo? Ña̱ Biblia káchiña: “Soo ña̱ ku̱su̱nna xíʼin na̱ ta̱ʼán tindaʼa̱ xíʼinna íxayaku̱a̱ña ku̱ñuna” (1 Corintios 6:18). ¿Ndáaña kúni̱ kachi ña̱yóʼo?

Sava estudio ña̱ ke̱ʼéna sánáʼa̱ña, ku̱a̱ʼá na̱ va̱lí na̱ ni̱ki̱si̱ xíʼin na̱ ta̱ʼán tindaʼa̱na xíʼin, ndo̱ʼona táʼan ña̱ va̱xi yóʼo.

• NDA̱NDIKÓ-ININA. Ku̱a̱ʼání na̱ va̱lí na̱ ni̱ki̱si̱ xíʼin inkana tá kúma̱níka tindaʼa̱na nda̱ndikó-inina xa̱ʼa̱ ña̱ ke̱ʼéna ña̱yóʼo.

• KǑO KÁNDÍXATÁʼANKANA. Tándi̱ʼi ni̱ki̱si̱ xíʼin táʼanna, savana kíxáʼa ndáka̱tu̱ʼunna miína ndáakana ni̱ki̱si̱ xíʼin noviona á noviana.

• KǑO KANAÑA TÁKI̱ʼVA KÚNI̱NA. Ña̱ kúni̱ ná válí kúú ña̱ kooná xíʼin na̱ chindeétáʼan xíʼinná su̱ví ña̱ ixandi̱va̱ʼana xíʼinná. Ta ku̱a̱ʼání na̱ va̱lí va̱ása kútóokana xínina ná válí ná kamaní ndákuiin yuʼúna.

• Nu̱ú ndíʼi: Tá kísi̱ún xíʼin iinna tá kúma̱níka tindaʼún, saá na̱ʼún ña̱ kǒo ndáyáʼvikaún (Romanos 1:24). Ta yóʼó ndáyáʼvinívaún. Kundaún miíún.

Xíniñúʼu ndakú koún ta kǒo ku̱sún xíʼin ni iinna nda̱a̱ tá ná tindaʼún (1 Tesalonicenses 4:3). Tá ná tindaʼún, saá kivi ku̱sún xíʼin ñá síʼún á yiíún. Tasaá kusi̱í-iniún keʼúnña ta kǒo kaka-iniún, kǒo kundi̱ʼi̱-iniún, ta ni kǒo ndandikó-iniún xa̱ʼa̱ ña̱yóʼo, saáchi ña̱yóʼo kúú ña̱ ndóʼo ku̱a̱ʼá na̱ kísi̱ xíʼin táʼan tá kúma̱níka tindaʼa̱na (Proverbios 7:22, 23; 1 Corintios 7:3).

¿NDÁAÑA NDÁKANIXI̱NÍÚN?

• Tá iinna kúʼvi̱-inina xínina yóʼó, ¿á su̱ví ña̱ ndixa kúú ña̱ kúni̱na ña̱ vií koún ta si̱í koún?

• Tá iinna ndixa ndíʼi̱-inina xa̱ʼún, ¿á ka̱ʼa̱nna xíʼún keʼún iin ña̱ʼa ña̱ sakúxíka yóʼó nu̱ú Ndióxi̱? (Hebreos 13: 4).