¿Ña̱ tiʼvindaana kaʼá táʼanna á iin ku̱a̱chi kini kúúña?

Iin encuesta ña̱ keʼé ña̱ naní Centros para el Control y la Prevención de Enfermedades, ña̱ íyo chí Estados Unidos, xíʼin na̱ va̱lí na̱ kúúmií 15 nda̱a̱ 19 ku̱i̱ya̱, ku̱a̱ʼání na̱ va̱lí yóʼo ni̱ka̱ʼa̱nna ña̱ xa̱a̱ ti̱ʼvindaana kaʼá inka na̱ yiví,a ñá Sharlene Azam, ñá ka̱ʼyí libro ña̱ naní Oral Sex Is the New Goodnight Kiss (Sexo oral: el nuevo beso de buenas noches). Ni̱ka̱ʼa̱nñá: “Tá ná ka̱ʼún xíʼin iin na̱ va̱lí xa̱ʼa̱ ña̱ tíʼvindaana kaʼá táʼanna, ka̱ʼa̱nna xíʼún ña̱ iin ña̱ va̱ʼava kúú ña̱ keʼéna ña̱yóʼo”. Ta ka̱chikañá: “Ta ndákanixi̱nína xa̱ʼa̱ ña̱yóʼo, ña̱ va̱ása iin kúúña xíʼin ña̱ ku̱su̱nna xíʼin inkana”.

• ¿Ndáaña ndákanixi̱níún xa̱ʼa̱ ña̱yóʼo?

• ¿Ndáaña kúú ña̱ nda̱a̱?

• ¿Á ndáyáʼviní ña̱yóʼo?

¿Ndáaña ndákanixi̱níún xa̱ʼa̱ ña̱yóʼo?

Ndakuiin ña̱yóʼo.

1. ¿Á kivi ke̱e se̱ʼe iin ñá loʼo tá ná tiʼvindaañá kaʼá inkana?

   1. Kiviva

   2. Va̱ása

2. ¿Á kivi kiʼin kue̱ʼe̱na tá ná tiʼvindaana kaʼá iin na̱ yiví?

   1. Kiviva

   2. Va̱ása

3. ¿Ña̱ tíʼvindaana kaʼá táʼanna á iin ku̱a̱chi kini kúúña?

   1. Ña̱ kiniva kúúña

   2. Va̱ása

¿Ndáaña kúú ña̱ nda̱a̱?

Chitáʼan ña̱ nda̱kuiún xíʼin pregunta ña̱ va̱xi chí ni̱nu.

1. ¿Á kivi ke̱e se̱ʼe iin ñá loʼo tá ná tiʼvindaañá kaʼá inkana?

   Respuesta: Va̱ása. Saáchi xa̱ʼa̱ ña̱ va̱ása kivi ke̱e se̱ʼena ta kéʼéna ña̱yóʼo, kúú ña̱ káʼa̱nna ña̱ su̱ví iin ña̱ kiniví kúúña.

2. ¿Á kivi kiʼin kue̱ʼe̱na tá ná tiʼvindaana kaʼá iin na̱ yiví?

   Respuesta: Kiviva. Na̱ tíʼvindaa kaʼá iin na̱ yiví, kivi kiʼin hepatitis A á B miína, kiʼin verruga kaʼána, gonorrea, herpes, sida á sífilis.

3. ¿Ña̱ tíʼvindaana kaʼá táʼanna á iin ku̱a̱chi kini kúúña?

   Respuesta: Ña̱ kiniva kúúña. Ndiʼi ña̱ kéʼéna xíʼin kaʼá iin na̱ yiví nda̱a̱ táki̱ʼva íyo ña̱ ku̱su̱n xíʼin táʼanna saá íyovaña, tá kúú ña̱ tiʼvindaana kaʼá táʼanna, ña̱ xíínna chí sa̱tána nu̱ú tátana xíʼin ña̱ kusíkí ndaʼa̱na xíʼin kaʼá táʼanna.

¿Á ndáyáʼviní ña̱yóʼo?

Ná kotoyó ña̱ káʼa̱n Biblia xa̱ʼa̱ ña̱ tiʼvindaana kaʼá táʼanna.

Ña̱ káʼa̱n Biblia: “Ña̱yóʼo kúú ña̱ kúni̱ Ndióxi̱: ña̱ ná koondó na̱ yi̱i̱ ta ná kǒo ki̱ʼvindó ku̱a̱chi kini” (1 Tesalonicenses 4:3).

Tu̱ʼun ña̱ “ku̱a̱chi kini” kúni̱ kachiña ndiʼi ña̱ kini ña̱ kéʼé na̱ ta̱ʼán ti̱ndaʼa̱, tá kúú ña̱ ku̱su̱n xíʼin táʼanna, ña̱ tíʼvindaana kaʼá táʼanna, ña̱ xíínna chí sa̱tána nu̱ú tátana ta saátu ña̱ kusíkí ndaʼa̱na xíʼin kaʼá inka na̱ yiví. Ta ndiʼi na̱ kéʼé ña̱yóʼo kixi ku̱a̱ʼání tu̱ndóʼo nu̱úna; tá kúú ña̱ va̱ása viíka kutáʼanna xíʼin Ndióxi̱ (1 Pedro 3:12).

Ña̱ káʼa̱n Biblia: “Na̱ kéʼé ku̱a̱chi kini kíʼvina ku̱a̱chi xíʼin ku̱ñu miína” (1 Corintios 6:18).

Ña̱ tíʼvindaana kaʼá táʼanna kivi kiʼinna kue̱ʼe̱ ixaaña ta saátu kuxíkána nu̱ú Ndióxi̱. Ni kǒo táxiña ña̱ kusi̱í-inina. Libro ña̱ naní Cómo hablar de sexo con los adolescentes para que te escuchen káʼa̱nña: “Ña̱ kéʼéna ña̱ kini yóʼo xíʼin táʼanna, ndándikó-inina xa̱ʼa̱ña saáchi su̱ví ki̱ʼva ña̱ ku̱su̱n na̱ yiví xíʼin táʼanna kúúña. Xa̱ʼa̱ ña̱ kísi̱na xíʼin inkana sándakavaña-inina ta saátu xa̱ʼa̱ ña̱ kéʼéna inkaka ña̱ kini”.

Ña̱ káʼa̱n Biblia: “Yi̱ʼi̱, Jehová, kúú Ndióxi̱ miíún, yi̱ʼi̱ kúú ta̱ sánáʼa̱ yóʼó xa̱ʼa̱ ña̱ va̱ʼa miíún” (Isaías 48:17).

¿Á túviún ña̱ kivi chindeétáʼan ley Ndióxi̱ xíʼún ña̱ káʼa̱n xa̱ʼa̱ ña̱ ku̱su̱n xíʼin táʼanna? ¿Á ndákanixi̱níún ña̱ sásiña nu̱ún ta kǒo kívi keʼún ku̱a̱ʼá ña̱ʼa? Ndakanixi̱ní xa̱ʼa̱ iin carretera nu̱ú xíka ku̱a̱ʼání carro ta íyo iin señal ña̱ káʼa̱n nda̱saa velocidad xíniñúʼu kakana ta saátu ndáa míí kundichina. ¿Á ndakanixi̱níún ña̱ señal yóʼo sásiña nu̱ún, á ndáavaña yóʼó? ¿Ndáaña kuu tá miíún xíʼin inkana va̱ása xíniso̱ʼondó ña̱yóʼo?

Saá íyo ley Ndióxi̱. Tá kǒo xíniso̱ʼoyóña, kixiní tu̱ndóʼo nu̱úyó (Gálatas 6:7). Iin libro ña̱ naní Sex Smart (Sexo inteligente) káʼa̱nña ña̱yóʼo: “Tá sándakoún ña̱ kándíxaún xíʼin ña̱ vií ndákanixi̱níún, ta kéʼún ña̱ʼa ña̱ xíniún ña̱ va̱ása va̱ʼa, va̱ása ixato̱ʼókaún miíún”. Soo tá kéʼún ña̱ káʼa̱n ley Ndióxi̱, na̱ʼún ña̱ kúún iin na̱ yiví na̱ to̱ʼó-ini. Ta saátu va̱ʼaní koo ña̱ xínitúni̱ún (1 Pedro 3:16).