Ndióxi̱ i̱xava̱ʼara ta̱a xíʼin ñaʼá

Jehová nda̱salivira iin táʼvi loʼo nu̱ú ñuʼú ña̱ xi̱naní Edén. Nu̱ú ña̱yóʼo ni̱xi̱yo ku̱a̱ʼání yita xíʼin yitu̱n ta ni̱xi̱yotu ku̱a̱ʼání kití. Tándi̱ʼi saáví i̱xava̱ʼara ta̱ Adán. Xíʼin ñuʼú i̱xava̱ʼara ta̱yóʼo tasaá ti̱vira si̱ti̱n ta̱ Adán. ¿Á xíni̱ún ndáaña ku̱u tándi̱ʼi? Ta̱ Adán ki̱xaʼá nda̱kanda̱ra ta ndu̱ura iin ta̱a ta̱ táku. Tasaá ni̱ka̱ʼa̱n Jehová xíʼin ta̱ Adán ña̱ kundaara ñuʼú livi nu̱ú íyora ta chinúura ki̱vi̱ ndiʼi kití.

Jehová ni̱ka̱ʼa̱nra iin ña̱ʼa ña̱ ndáyáʼviní xíʼin ta̱ Adán. Ka̱chira: “Va̱ʼa kaxíún ndiʼi ku̱i̱ʼi tí íyo ndaʼa̱ ndiʼi yitu̱n soo íyo iin tí va̱ása xíniñúʼu kaxíún. Tá ná kaxíúnrí, kuvivaún”.

Ni̱ya̱ʼa loʼo tiempo saá ni̱ka̱ʼa̱n Jehová: “Keʼíi̱ iin ñá chindeé táʼan xíʼin ta̱ Adán”. Tasaá sa̱kúsu̱nra ta̱ Adán ta ta̱vára iin leke kandíkara ta xíʼin ña̱yóʼo i̱xava̱ʼara ñá síʼí ta̱ Adán. Ñáyóʼo xi̱naníñá Eva. Na̱yóʼo kúú na̱ nu̱ú i̱xava̱ʼara. ¿Ndáaña ni̱ka̱ʼa̱n ta̱ Adán tá xi̱nira ñá síʼíra? Ni̱kusi̱íní-inira ta ni̱ka̱ʼa̱nra: “Xíʼin leke miíi̱ i̱xava̱ʼa Jehová ñáyóʼo. Nda̱a̱ táki̱ʼva íyo miíi̱ saá íyoñá”.

Jehová ni̱ka̱ʼa̱nra xíʼinna ña̱ koo ku̱a̱ʼá se̱ʼena ta si̱í ná kundoona nu̱ú ñuʼú yóʼo ta ndasalivinaña. Liviní koo ña̱yóʼo nda̱a̱ táki̱ʼva ni̱xi̱yo ña̱ Edén. Soo ¿nda̱chun su̱ví saá íyoña vitin? Nu̱ú inka capítulo sakuaʼayó xa̱ʼa ña̱yóʼo.