Ndióxi̱ ta̱várana ñuʼú livi

KOTO ña̱ kúú nu̱ú na̱ʼná yóʼo. Távána ta̱ Adán xíʼin ñá Eva nu̱ú ñuʼú livi yóʼo. ¿Á xíni̱ún ndachun távánana?

Saáchi ke̱ʼéna iin ña̱ va̱ása va̱ʼa. Xa̱ʼa ña̱yóʼo tává Jehová miína. ¿Á xíni̱ún ndáaña ke̱ʼéna?

Ke̱ʼéna iin ña̱ ni̱ka̱ʼa̱n Ndióxi̱ xíʼinna ña̱ kǒo keʼéna. Ndióxi̱ ni̱ka̱ʼa̱nra xíʼinna ña̱ va̱ʼa kaxína ndiʼi ku̱i̱ʼi á ña̱ʼa ña̱ íyo ndaʼa̱ yitu̱n tú ni̱xi̱yo nu̱ú ñuʼú livi kán. Soo iin yitu̱n xi̱ndichi kán, Ndióxi̱ ni̱ka̱ʼa̱nra xíʼinna ña̱ kǒo kaxína ku̱i̱ʼi yóʼo, chi ná kaxínaña kuvina káchira xíʼinna. Ta xíni̱yó chi va̱ása va̱ʼa kiʼinyó ña̱ʼa inkana. Ta, ¿á xi̱niso̱ʼo ta̱ Adán xíʼin ñá Eva ña̱ ni̱ka̱ʼa̱n Ndióxi̱ xíʼinna?

Iin ki̱vi̱ tá íyo mitúʼun ñá Eva nu̱ú ñuʼú livi kán, iin ko̱o̱ ni̱ka̱ʼa̱n xíʼinñá, ta káchirí ná kaxíñá ku̱i̱ʼi ña̱ ni̱ka̱ʼa̱n Ndióxi̱ xíʼinna ña̱ kǒo kaxína. Tá ki̱vi̱ i̱xava̱ʼa Ndióxi̱ ko̱o̱, va̱ása nítaxira tu̱ʼunrí, ña̱kán íyova inka na̱ sa̱káʼa̱nrí. ¿Yukú na̱ sa̱káʼa̱nrí?

Su̱ví ta̱ Adán nísaka̱ʼa̱nrí. Iin ángel ta̱ i̱xava̱ʼa Jehová xi̱kuura. Ndakaʼún chi siʼnaka na̱ ángel i̱xava̱ʼa Jehová saáví i̱xava̱ʼara Ñuʼú yóʼo. Ta na̱ ángel yóʼo va̱ása kívi kuniyóna. Ta iin ta̱ ángel yóʼo xi̱kuni̱ra ndukáʼnura. Ki̱xaʼára nda̱kanixi̱níra ña̱ va̱ʼa kaʼndachíñura táki̱ʼva xáʼndachíñu Ndióxi̱, ta kúni̱ra ná kuniso̱ʼona ña̱ káʼa̱nra su̱víka ña̱ káʼa̱n Jehová. Ta̱yóʼo kúú ta̱ sa̱káʼa̱n tí ko̱o̱.

Ta̱ ángel yóʼo ni̱kuchiñura sa̱ndáʼvira ñá Eva. Tá ki̱vi̱ ni̱ka̱ʼa̱nra xíʼinñá ña̱ kaxíñá ku̱i̱ʼi kán, ni̱ka̱ʼa̱nra ña̱ xa̱a̱ñá kooñá táki̱ʼva íyo Ndióxi̱ tá ná kaxíñá ku̱i̱ʼi kán, ta ñáyóʼo ka̱ndíxañá ña̱ ni̱ka̱ʼa̱nra. Ta saá xa̱xíñá ku̱i̱ʼi yóʼo, ta saátu ta̱ Adán xa̱xíraña. Ta̱ Adán xíʼin ñá Eva kǒo níxiniso̱ʼona ña̱ ni̱ka̱ʼa̱n Ndióxi̱ xíʼinna, ña̱kán ta̱várana nu̱ú ñuʼú livi nu̱ú xi̱ndoona.

Soo iin ki̱vi̱ Ndióxi̱ ndasalivira iníísaá nu̱ú Ñuʼú yóʼo ta xa̱a̱ña kooña táki̱ʼva ni̱xi̱yo ñuʼú livi ña̱ xi̱naní Edén. Chí nu̱ú loʼoka sakuaʼún ndáaña keʼún ta va̱ʼa xa̱ún koún nu̱úña. Ta vitin ná kotoyó ndáaña ndo̱ʼo ta̱ Adán xíʼin ñá Eva.