Ñá Rahab chi̱se̱ʼéñá u̱vi̱ ta̱a

Na̱ ta̱a na̱ ñuu Israel na̱ ku̱a̱ʼa̱n koto se̱ʼé ñuu Jericó, veʼe iin ñá ñaʼá naní Rahab ki̱ndoona. Tá na̱kunda̱a̱-ini ta̱ rey ñuu Jericó xa̱ʼa ña̱yóʼo, chi̱ndaʼára sava na̱ soldado ku̱a̱ʼa̱nna veʼeñá. Ñáyóʼo chi̱se̱ʼéñána xi̱ní veʼeñá ta ni̱ka̱ʼa̱nñá xíʼin na̱ soldado ná ku̱ʼu̱nna nandukúnana. Ñá Rahab ni̱ka̱ʼa̱nñá xíʼin na̱ ta̱a ñuu Israel: “Chindeéi̱ ndóʼó chi kúnda̱a̱-inii̱ ña̱ chindeé Jehová ndóʼó ña̱ taxira ñuʼú yóʼo ndaʼa̱ndó. Saka̱kundó yi̱ʼi̱ xíʼin na̱ veʼi̱, ndáʼvindi̱”.

Na̱yóʼo ni̱ka̱ʼa̱nna xíʼin ñá Rahab: “Tá ná katún iin yoʼo̱ kuaʼá chí ventanaún va̱ása kaʼníndi̱ ni iin na̱ yiví na̱ ñúʼu ini veʼún. Tasaá kivi ka̱ku na̱ veʼún”.

Ñá Rahab chi̱ndeéñá na̱ ta̱a yóʼo ña̱ va̱ʼa ke̱ena ñuu Jericó, ta̱váñána chí ventana xíʼin iin yoʼo̱. U̱ni̱ ki̱vi̱ ni̱xi̱yo se̱ʼéna chí yuku̱ ta saáví ndi̱kóna nu̱ú ta̱ Josué. Tándi̱ʼi na̱ ñuu Israel ni̱ko̱so̱kavana yu̱ta Jordán ta nda̱koo tu̱ʼvana ña̱ ki̱ʼvina ñuu kán. Jericó kúú ñuu ña̱ siʼna nda̱kiʼinna. Jehová ni̱ka̱ʼa̱nra xíʼinna ná ka̱va̱na iin yichi̱ sa̱tá ñuu kán iin iin ki̱vi̱, ta i̱ñu̱ ki̱vi̱ ke̱ʼéna ña̱yóʼo. Ña̱ ki̱vi̱ u̱xa̱, u̱xa̱ yichi̱ ni̱ka̱va̱na sa̱tá ñuu Jericó. Tándi̱ʼi na̱ su̱tu̱ ti̱vina trompeta, ta na̱ soldado na̱ ñuu Israel ni̱nda̱ʼyi̱ kóʼóna. Ta nama̱ ñuu kán ndu̱vavaña. Mií yatin nama̱ ni̱xi̱yo veʼe ñá Rahab, soo va̱ása nínduvaña. Ñá Rahab xíʼin na̱ veʼeñá ni̱ka̱kuvana chi ka̱ndíxana Jehová.