Ta̱ Juan na̱túʼunra xa̱ʼa ña̱ kixi ta̱ Jesús

Se̱ʼe ta̱ Zacarías xíʼin ñá Elisabet xi̱kuu ta̱ Juan. Jehová nda̱ka̱xin ta̱yóʼo ña̱ kuura profeta ta ka̱ʼa̱nra xíʼin na̱ yiví xa̱ʼa ña̱ xa̱a̱ ku̱nu̱mí kixi ta̱ Mesías. Soo su̱ví ñuu á sinagoga níxi̱kara natúʼunra chi chí ñuʼú yi̱chíva ni̱xi̱kara. Ku̱a̱ʼání na̱ yiví na̱ ñuu Jerusalén xíʼin ñuu Judá xi̱xa̱ʼa̱nna xi̱xiniso̱ʼona ña̱ xi̱natúʼunra. Xi̱ka̱ʼa̱nra xíʼinna ña̱ xíniñúʼu sandákoona ña̱ kini kéʼéna ña̱ va̱ʼa sakusi̱ína-ini Ndióxi̱. Ña̱kán ku̱a̱ʼánína ndi̱kó-inina xa̱ʼa ña̱ kéʼéna, ta ta̱ Juan sa̱ndákuchirana ini yu̱ta Jordán.

Ta̱ Juan va̱ása níxitakura táki̱ʼva íyo na̱ ku̱i̱ká. Ta̱ ndáʼviva xi̱kuura, yixí camello xi̱ndixira ta xi̱xaxíra ti̱ka xíʼin ñu̱ñú. Na̱ yiví kúni̱na kunda̱a̱-inina xa̱ʼara. Nda̱a̱ na̱ fariseo xíʼin na̱ saduceo ni̱xa̱ʼa̱nna nu̱úra. Ta ni̱ka̱ʼa̱nra xíʼinna: “Xíniñúʼu ndikó-inindó ta nasa̱mandó. Ni káʼa̱nndó ña̱ kúúndó se̱ʼe ta̱ Abrahán, soo su̱ví ña̱yóʼo kúni̱ kachiña ña̱ kúúndó se̱ʼe Ndióxi̱”.

Na̱ yiví xi̱nda̱ka̱tu̱ʼunnara: “¿Ndáaña xíniñúʼu keʼéndi̱ ña̱ sakusi̱índi̱-ini Ndióxi̱?”. Ta ni̱ka̱ʼa̱nra: “Tá íyo u̱vi̱ ti̱ko̱to̱ndó, taxindó iinña ndaʼa̱ na̱ xíniñúʼuña”. ¿Á xíniún nda̱chun xi̱ka̱ʼa̱nra ña̱yóʼo? Saáchi xi̱kuni̱ra ña̱ kunda̱a̱-inina ña̱ va̱ʼa sakusi̱ína-ini Ndióxi̱ xíniñúʼu kuʼvi̱-inina kunina na̱ yiví.

Ni̱ka̱ʼa̱ra xíʼin na̱ ndákaya xu̱ʼún: “Nda̱kú koondó ta kǒo sandáʼvindó na̱ yiví”. Na̱ soldado ni̱ka̱ʼa̱nra xíʼin: “Va̱ása ka̱ʼa̱nndó tu̱ʼun vatá ta kǒo tavándó xu̱ʼún ndaʼa̱ na̱ yiví”.

Na̱ su̱tu̱ xíʼin na̱ levita ni̱ka̱ʼa̱nna xíʼin ta̱ Juan: “Ndiʼina kúni̱na kunda̱a̱-inina ndáa ta̱a kúún”. Ta̱ Juan ni̱ka̱ʼa̱nra: “Yi̱ʼi̱ kúú ta̱ káʼa̱n xíʼin na̱ yiví nu̱ú ñuʼú yi̱chí ta sánáʼi̱na xa̱ʼa Jehová, táki̱ʼva ni̱ka̱ʼa̱n ta̱ profeta Isaías”.

Xi̱kutóoní na̱ yiví kuniso̱ʼona ta̱ Juan, ta ku̱a̱ʼánína xi̱kuni̱ kunda̱a̱-ini á ta̱yóʼo kúú ta̱ Mesías. Ña̱kán ni̱ka̱ʼa̱nra: “Si̱lóʼo kúma̱ní ña̱ kixa̱a̱ iin ta̱ íyoka ndeé nu̱ú yi̱ʼi̱. Ta yi̱ʼi̱ su̱ví ta̱ ndeé kúi̱ nu̱ú ta̱yóʼo. Yi̱ʼi̱ xíʼin ti̱kui̱í sándakuchii̱ ndóʼó, soo ta̱kán xíʼin espíritu santo sandákuchira ndóʼó”.