Xa̱a̱ Mesías kúú ta̱ Jesús vitin

Ta̱ Juan ni̱ka̱ʼa̱nra xíʼin na̱ yiví: “Si̱lóʼo kúma̱ní ña̱ kixa̱a̱ iin ta̱ íyoka ndée nu̱ú yi̱ʼi̱”. Sana tá ndíka̱a̱ ta̱ Jesús 30 ku̱i̱ya̱, ke̱era ñuu Galilea ta ni̱xa̱ʼa̱nra yu̱ta Jordán. Kán ndíka̱a̱ ta̱ Juan sándákuchira na̱ yiví. Ta̱ Jesús xi̱kuni̱ra ña̱ sandákuchiñaʼá ta̱ Juan, soo ta̱ Juan ni̱ka̱ʼa̱nra: “Va̱ása xíniñúʼu sandákuchii̱ yóʼó, miívaún xíniñúʼu sandákuchi yi̱ʼi̱”. Ta̱ Jesús ni̱ka̱ʼa̱nra: “Jehová kúni̱ra yóʼó sandákuchi yi̱ʼi̱”. Ta ni̱ki̱ʼvina ini yu̱ta Jordán, ta chi̱ka̱a̱ níí ta̱ Juan ta̱ Jesús ini yu̱ta.

Tá ki̱ta ta̱ Jesús ini ti̱kui̱í, ke̱ʼéra iin oración nu̱ú Jehová. Tasaá ni̱nu̱na chí ndiví, táki̱ʼva káa iin sa̱ta saá káa espíritu Ndióxi̱ va̱xiña chí xi̱níra. Tasaá ni̱ka̱ʼa̱n Jehová: “Yóʼó kúú se̱ʼi̱, ta̱ kúni̱níi̱ xínii̱. Yóʼó kúú ta nda̱ka̱xii̱n”.

Saá nda̱kiʼin ta̱ Jesús espíritu Jehová ta ndu̱ura ta̱ Cristo á ta̱ Mesías. Vitin ki̱xaʼára xíʼin chiñu ña̱ ta̱xi Jehová ndaʼa̱ra ña̱ keʼéra nu̱ú ñuʼú yóʼo.

Tándi̱ʼi nda̱kuchi ta̱ Jesús ku̱a̱ʼa̱nra chí ñuʼú yi̱chí, 40 ki̱vi̱ ni̱xa̱ʼa̱nra. Tá ndi̱kóra ni̱xa̱ʼa̱nra xi̱tora ta̱ Juan. Tá xi̱nira ku̱a̱ʼa̱nra ni̱ka̱ʼa̱nra: “Ta̱yóʼo táki̱ʼva íyo ndikachi sa̱na̱ Ndióxi̱ saá íyora, ta̱ ndakata ku̱a̱chi na̱ yiví”. Ni̱ka̱ʼa̱nra ña̱yóʼo ña̱ kunda̱a̱-ini na̱ yiví ta̱ Jesús kúú ta̱ Mesías. Soo, ¿á xíni̱ún ndáaña ndo̱ʼo ta̱ Jesús tá ni̱xa̱ʼa̱nra nu̱ú ñuʼú yi̱chí? Ná kotoyó ndáaña ndo̱ʼora.