Na̱ discípulo ndákiʼinna ndée Ndióxi̱

Xa̱a̱ ni̱ya̱ʼa 10 ki̱vi̱ ña̱ ndi̱kó ta̱ Jesús chí ndiví. Tasaá na̱ discípulo ta̱ Jesús nda̱kiʼinna espíritu santo Ndióxi̱, nda̱a̱ táki̱ʼva ni̱ka̱ʼa̱nra xíʼinna. Tá ni̱xi̱yo vikó ña̱ Pentecostés ña̱ ku̱i̱ya̱ 33, ku̱a̱ʼání na̱ yiví ki̱xa̱a̱na ñuu Jerusalén ña̱ keʼéna vikó yóʼo. Ta 120 na̱ discípulo ta̱ Jesús nda̱takana ini iin veʼe, ta iin kama ku̱u iin ña̱ nda̱kanda̱-inina xíʼin. Nda̱a̱ táki̱ʼva íyo iin ñuʼu̱ íyo ña̱ ka̱na xi̱ní iin iin na̱ discípulo, ta ki̱xaʼána káʼa̱nna ku̱a̱ʼání tu̱ʼun. Saátu, xi̱niso̱ʼona iin ta̱chí ndeéní ni̱ya̱ʼa veʼe nu̱ú ñúʼuna.

Na̱ yiví na̱ ki̱xa̱a̱ ñuu Jerusalén xi̱niso̱ʼona ña̱yóʼo ta xínuna ku̱a̱ʼa̱nna kotona ndáaña kúu. Tá ni̱xa̱a̱na iin nda̱kanda̱-inina tá xi̱nina káʼa̱n na̱ discípulo ku̱a̱ʼání tu̱ʼun. Ta ni̱ka̱ʼa̱nna: “Na̱ yiví yóʼo chí ñuu Galilea ke̱ena, ¿nda̱chun va̱ʼaní káʼa̱nna tu̱ʼunyó?”.

Tasaá, ta̱ Pedro xíʼin inka na̱ apóstol nda̱kundichina nu̱ú ndiʼi na̱ yiví. Ta̱ Pedro ni̱ka̱ʼa̱nra: “Ndóʼó xa̱ʼníndó ta̱ Jesús, soo Jehová sa̱ndátakura ta̱yóʼo. Ta vitin íyora chí ndiví chí ndaʼa̱ kúaʼa Ndióxi̱. Ta ta̱xira espíritu santo ndaʼa̱ndi̱ nda̱a̱ táki̱ʼva ni̱ka̱ʼa̱nra xíʼinndi̱. Ña̱kán va̱ʼa káʼa̱nndi̱ inka tu̱ʼun”.

Na̱ yiví iin nda̱kanda̱-inina. Tu̱ʼun ña̱ ni̱ka̱ʼa̱n ta̱ Pedro xíʼinna va̱ʼaní na̱kunda̱a̱-inina xíʼinña, xa̱ʼa ña̱yóʼo ni̱ka̱ʼa̱nna: “¿Ndáaña keʼéndi̱ vitin?”. Ta̱yóʼo ni̱ka̱ʼa̱nra xíʼinna: “Vitin kǒo keʼéndó ña̱ xi̱keʼéndó ta ndakuchindó xíʼin ki̱vi̱ ta̱ Jesús. Saátu taxira espíritu santo ndaʼa̱ ndóʼóva”. Mií ki̱vi̱ saá ki̱ʼva 3,000 na̱ yiví nda̱kuchi. Tá tiempo saá, ku̱a̱ʼání na̱ yiví na̱ íyo chí ñuu Jerusalén nda̱kundiku̱nna sa̱tá ta̱ Jesús. Na̱ apóstol chi̱ndeéní espíritu santo Ndióxi̱ miína ta ke̱ʼéna ku̱a̱ʼáka congregación. Tasaá va̱ʼa sa̱náʼa̱na na̱ discípulo ndiʼi ña̱ ni̱ka̱ʼa̱n ta̱ Jesús xíʼinna.