Ta̱ Jesús nda̱ka̱xinra ta̱ Saulo

Ta̱ Saulo ta̱ ñuu Roma xi̱kuura soo ñuu Tarso ka̱kura. Ta̱ fariseo xi̱kuura ta va̱ʼaní sa̱kuaʼara xa̱ʼa ley na̱ ñuu Judá ta xi̱sa̱a̱-inira xi̱xinira na̱ discípulo ta̱ Jesús. Xi̱tavárana ini veʼena, na̱ ta̱a xíʼin ná si̱ʼí, ta xi̱chika̱a̱rana veʼeka̱a. Nda̱a̱ xi̱nira tá xa̱ʼnína ta̱ discípulo Esteban xíʼin yu̱u̱.

Soo su̱ví kuití na̱ discípulo ta̱ Jesús na̱ ndóo ñuu Jerusalén xi̱kuni̱ra tiinra. Chi nda̱a̱ ni̱ka̱ʼa̱nra xíʼin ta̱ su̱tu̱ káʼnu ña̱ chindaʼárara ñuu Damasco ña̱ ku̱ʼu̱nra nandukúra na̱ discípulo ta̱ Jesús. Tá xa̱a̱ kúni̱ xa̱a̱ra, iin nda̱ye̱ʼe̱ ñuʼu̱ chí ndiví nu̱úra, ta ndu̱vara. Tasaá xi̱niso̱ʼora ni̱ka̱ʼa̱nna: “Saulo, ¿nda̱chun íxandi̱va̱ʼún xíʼi̱n?”. Ta̱ Saulo ni̱ka̱ʼa̱nra: “¿Yukú kúú yóʼó?”. Ni̱ka̱ʼa̱nna xíʼinra: “Ta̱ Jesús kúi̱. Kúaʼan chí ñuu Damasco, ta kán ka̱ʼa̱nna xíʼún ndáaña xíniñúʼu keʼún”. Mií saa ku̱áa nu̱úra, ña̱kán na̱ ku̱a̱ʼa̱n xíʼinra tíinna ndaʼa̱ra ku̱a̱ʼa̱nra ñuu Damasco.

Ñuu Damasco ni̱xi̱yo iin ta̱ discípulo ta̱ Jesús ta̱ naní Ananías. Ta̱ Jesús ni̱ka̱ʼa̱nra xíʼinra: “Kúaʼan veʼe ta̱ Judas, chí calle naní Recta, ta kán nandukún ta̱ Saulo”. Ta̱ Ananías ni̱ka̱ʼa̱nra: “Táta, ku̱a̱ʼání ña̱ʼa xi̱niso̱ʼi̱ ke̱ʼé ta̱ ta̱a yóʼo. Ta̱yóʼo chi̱ka̱a̱ na̱ discípuloún veʼeka̱a”. Soo ta̱ Jesús ni̱ka̱ʼa̱nra: “Kúaʼan nu̱úra, chi yi̱ʼi̱ nda̱ka̱xin ta̱ Saulo ña̱ ku̱ʼu̱nra natúʼunra xa̱ʼa Ndióxi̱ ku̱a̱ʼání ñuu”.

Tasaá ta̱ Ananías ku̱a̱ʼa̱nra nu̱ú ta̱ Saulo ta ni̱ka̱ʼa̱nra xíʼinra: “Ñani Saulo, ta̱ Jesús chi̱ndaʼá yi̱ʼi̱ ña̱ va̱xii̱ sandáʼi̱ nu̱ún”. Iin kama nda̱ʼa nu̱úra. Sa̱kuaʼara xa̱ʼa ta̱ Jesús ta ndu̱ura discípulora. Nda̱kuchira ta ki̱xaʼára sánáʼa̱ra nu̱ú íyo ña̱ sinagoga xíʼin inkaka na̱ discípulo ta̱ Jesús. ¿Á ndákanixi̱níún ña̱ nda̱kanda̱-ini na̱ ñuu Judá? Vitin xítona sánáʼa̱ ta̱ Saulo na̱ yiví xa̱ʼa ta̱ Jesús. Na̱ ñuu Judá ndáka̱tu̱ʼun xíʼin miína: “¿Á su̱ví ta̱ ta̱a yóʼo kúú ta̱ xi̱ndiku̱n sa̱tá na̱ discípulo ta̱ Jesús?”.

U̱ni̱ ku̱i̱ya̱ ni̱xi̱ka ta̱ Saulo sa̱náʼa̱ra na̱ yiví ñuu Damasco. Na̱ ñuu Judá ni̱sa̱a̱ní-inina xi̱ninara ta nda̱a̱ xi̱kuni̱na kaʼnínara. Soo na̱ discípulo na̱kunda̱a̱-inina xa̱ʼa ña̱yóʼo ta ta̱vá se̱ʼénara. Chi̱ka̱a̱nara ini iin ña̱ʼa ña̱ nu̱ura chí sa̱tá nama̱ ñuu Damasco.

Tá ni̱xa̱ʼa̱n ta̱ Saulo ñuu Jerusalén, ni̱xa̱ʼa̱nra xi̱tora na̱ hermano na̱ ñuu kán. Soo na̱kán yíʼvivana xínina ta̱ Saulo. Tasaá iin ta̱ discípulo ta̱ va̱ʼaní ini ta̱ xi̱naní Bernabé ni̱xa̱ʼa̱nra xíʼin ta̱ Saulo nu̱ú íyo na̱ apóstol ta ni̱ka̱ʼa̱nra xíʼinna ña̱ ndixa kúúña xa̱a̱ na̱sa̱mava ta̱ Saulo. Ta̱ Saulo nda̱kutáʼanra xíʼin na̱ congregación ñuu Jerusalén ta ki̱xaʼára nátúʼunra xa̱ʼa Ndióxi̱. Tándi̱ʼi nda̱kunaníra Pablo.