LECCIÓN 02

Ña̱ Biblia káʼa̱nña xíʼinyó xa̱ʼa̱ ña̱ koo chí nu̱únínu

Siaʼa ka̱naña nu̱ú tutu

Iníísaá ñuyǐví yóʼo, na̱ yiví yáʼana nu̱ú tu̱ndóʼo ña̱ sákusuchí-inina, ña̱ sándi̱ʼi̱-inina ta xóʼvi̱na xíʼin ña̱yóʼo. ¿Á xa̱a̱ ndóʼún saá? Sana xóʼvi̱ún xa̱ʼa̱ ña̱ kúúmiíún iin kue̱ʼe̱ á xa̱ʼa̱ ña̱ ni̱xi̱ʼi̱ iin na̱ veʼún. Ta sana ndákanixi̱níún, ¿á kixaa̱ iin ki̱vi̱ ña̱ va̱ása kooka ña̱ sáxo̱ʼvi̱ miíyó? Ña̱ Biblia chíndeétáʼanña xíʼinyó ña̱ kunda̱a̱-iniyó xa̱ʼa̱ ña̱yóʼo.

1. ¿Ndáaña va̱ʼa káʼa̱n Biblia koo chí nu̱únínu?

Ña̱ Biblia káʼa̱nña xíʼinyó nda̱chun íyoní tu̱ndóʼo nu̱ú ñuyǐví yóʼo. Ta saátu káʼa̱nña xíʼinyó ña̱ loʼova tiempo koo tu̱ndóʼo yóʼo chi si̱lóʼo kúma̱ní ta ndiʼi-xa̱ʼa̱ña. Ta ña̱ káʼa̱n ña̱ Biblia kivi chindeétáʼanña xíʼún ña̱ vií koún chí nu̱únínu ta ndakiʼún ña̱ va̱ʼa (kaʼvi Jeremías 29:11, 12). Ta tiempo vitin chíndeétáʼanña xíʼinyó ña̱ kundeé-iniyó nu̱ú tu̱ndóʼo ta va̱ása ndakava-iniyó. Ta káʼa̱ntuña xíʼinyó ña̱ kivi koo si̱íyó ndiʼi tiempo.

2. ¿Ndáaña káʼa̱n Biblia xa̱ʼa̱ ña̱ koo chí nu̱únínu?

Ña̱ Biblia káʼa̱nña, ña̱ va̱ʼaní koo chí nu̱únínu saáchi kǒo kuvikana ni va̱ása kooka ña̱ kúsuchí-inina ni va̱ása kuakukana ni va̱ása kooka ña̱ xóʼvi̱na (kaʼvi Apocalipsis 21:4). Ta va̱ása kooka ña̱ sáxo̱ʼvi̱ miíyó, tá kúú ña̱ ndáʼviyó, ña̱ íyo na̱ kéʼé ña̱ va̱ása va̱ʼa, kue̱ʼe̱ ta saátu ña̱ xíʼi̱yó. Ña̱ Biblia káʼa̱nña, ña̱ ndulivi nu̱ú ñuʼú yóʼo ta na̱ yiví kusi̱í-inina koona nu̱úña ndiʼi tiempo.

3. ¿Ndáaña chindeétáʼan xíʼún ña̱ kandíxaún ña̱ káʼa̱n Biblia koo chí nu̱únínu?

Ku̱a̱ʼání na̱ yiví kándíxana ña̱ va̱ása kooka tu̱ndóʼo, soo xíka-inina á ndixa koo ña̱yóʼo. Soo kiviva xa̱a̱yó kandíxayó ña̱ káʼa̱n Biblia tá viíní ná kaʼviyóña (Hechos 17:11). Ta ña̱yóʼo chindeétáʼan xíʼún ña̱ kandíxaún ña̱ káʼa̱nña koo chí nu̱únínu.

NÁ SAKUAʼAKAYÓ XA̱ʼA̱ÑA

Ná ka̱ʼa̱nyó xa̱ʼa̱ sava ña̱ káʼa̱n Biblia koo chí nu̱únínu. Ta kotoyó ndáa ki̱ʼva xa̱a̱ chíndeétáʼan ña̱yóʼo xíʼin inka na̱ yiví tiempo vitin.

Ku̱a̱ʼá na̱ʼná: na̱ʼná ña̱ náʼa̱ ndáa ki̱ʼva ndóo na̱ yiví tiempo vitin, ta ndáa ki̱ʼva káʼa̱n Biblia kundoona chí nu̱únínu. Va̱xika ña̱ na̱ʼná yóʼo chí ni̱nu̱.

4. Ña̱ Biblia káʼa̱nña xíʼinyó ña̱ viíní kooyó chí nu̱únínu ta va̱ása xo̱ʼvi̱kayó

Koto ña̱ va̱xi yóʼo ña̱ káʼa̱n Biblia koo chí nu̱únínu, ¿ndáaña kútóokaún? Ta, ¿nda̱chun?

Kaʼvindó texto ña̱ va̱xi xíʼin ña̱yóʼo ta ka̱ʼa̱nndó xa̱ʼa̱ña:

¿Á kándíxaún ña̱ koo ña̱ káʼa̱n texto yóʼo chí nu̱únínu? Ndakanixi̱ní xa̱ʼa̱ na̱ veʼún ta saátu na̱ migoún, ¿á chindeétáʼan ña̱ texto yóʼo xíʼinna?

Ndakanixi̱ní ña̱ xa̱a̱ íyoún nu̱ú ñuyǐví nu̱ú va̱ása íyoka tu̱ndóʼo:

NDA̱A̱ NI IINNA...	NDIʼI NA̱ YIVÍ...
... va̱ása xo̱ʼvi̱kana, va̱ása kuchéekana ta kǒo kuvikana (Isaías 25:8)	... kunina na̱ veʼena tá ná ndatakuna nu̱ú ñuʼú yóʼo (Juan 5:28, 29)
... va̱ása kuumiíkana kue̱ʼe̱ (Isaías 33:24; 35:5, 6)	... va̱ása kiʼinka kue̱ʼe̱ miína, ta koo ndee̱na nda̱a̱ táki̱ʼva íyo na̱ va̱lí (Job 33:25)
... va̱ása xo̱ʼvi̱kana xa̱ʼa̱ ña̱ kéʼé inkana xíʼinna (Isaías 32:16, 17)	... koo ku̱a̱ʼání ña̱ kuxuna, koo iin veʼena ta saátu iin chiñu ña̱ kutóona keʼéna (Salmo 72:16; Isaías 65:21, 22)
... va̱ása xo̱ʼvi̱kana xa̱ʼa̱ ña̱ íyo guerra (Salmo 46:9)	... va̱ʼaní koona chi va̱ása koo ña̱ sándi̱ʼi̱-inina (Salmo 37:11)
... va̱ása kusuchíka-inina ta ni kǒo ndakaʼánkana xa̱ʼa̱ ña̱ va̱ása va̱ʼa ndo̱ʼona (Isaías 65:17)	... koona ndiʼi tiempo ta viíní koona (Salmo 37:29)

Iin ta̱ lée loʼo tá ya̱chi̱ xi̱kuumiíra kue̱ʼe̱, ta vitin va̱ása kúúmiíkara kue̱ʼe̱ ta siʼíra númiñára.

Tá ya̱chi̱ iin ta̱a xi̱ku̱a̱ʼa̱ ni̱xi̱yora, ta vitin ndu̱loʼora ta chíndaʼára iin carretilla nu̱ú ñúʼu verdura.

5. Ña̱ káʼa̱n Biblia koo chí nu̱únínu kivi chindeétáʼanña xíʼinyó ña̱ viíka kooyó

Ku̱a̱ʼání na̱ yiví ndákava-inina á nda̱a̱ sáa̱na xa̱ʼa̱ ña̱ íyoní tu̱ndóʼo nu̱ú ñuyǐví yóʼo. Savana kéʼéna nda̱a̱ ndáaka ña̱ʼa ña̱ va̱ʼa nasamana ña̱ kúu nu̱ú ñuʼú yóʼo. Koto ndáa ki̱ʼva xa̱a̱ chíndeétáʼan ña̱ káʼa̱n Biblia koo chí nu̱únínu xíʼin ku̱a̱ʼání na̱ yiví tiempo vitin. Kotondó VIDEO ta ka̱ʼa̱nndó xa̱ʼa̱ ña̱yóʼo:

VIDEO: Xi̱kuni̱i̱ ña̱ vií kutáʼan ndiʼi na̱ yiví (4:07)

Na̱ʼná ña̱ va̱xi nu̱ú video ña̱ naní “Xi̱kuni̱i̱ ña̱ vií ná kutáʼan ndiʼi na̱ yiví”. 1. Ñá Rafika tá ni̱xi̱yo loʼoñá ndákayáñá algodón xíʼin na̱ yiví na̱ íyo nda̱a̱ táki̱ʼva íyo miíñá. 2. Ñá Rafika tá ni̱xa̱ʼa̱nñá ña̱ yichi̱ nu̱ú iin asamblea na̱ testigo Jehová. Ni̱kusi̱íní-iniñá tá xi̱niñá na̱ yiví na̱ xa̱a̱ síín síín ñuu.

Nda̱a̱ táki̱ʼva xi̱niyó nu̱ú video yóʼo, ¿ndáaña xi̱sandíʼi̱ní-ini ñá Rafika?
Ni va̱ása nísandákoo na̱ yiví ña̱ kundasína kunitáʼanna, soo ¿ndáa ki̱ʼva chi̱ndeétáʼan ña̱ Biblia xíʼinñá?

Ña̱ káʼa̱n Biblia koo chí nu̱únínu kivi chindeétáʼanña xíʼinyó ña̱ va̱ása kundi̱ʼi̱ní-iniyó, ta saátu ña̱ kundeé-iniyó ya̱ʼayó nu̱ú tu̱ndóʼo. Kaʼvindó Proverbios 17:22 xíʼin Romanos 12:12, ta ka̱ʼa̱nndó xa̱ʼa̱ ña̱yóʼo:

¿Á kivi chindeétáʼan ña̱ káʼa̱n ña̱ Biblia koo chí nu̱únínu xíʼún tiempo vitin? Ta, ¿nda̱chun?

ÑA̱ KÁʼA̱N SAVA NA̱ YIVÍ: “Va̱ʼaníva ña̱ káʼa̱n ña̱ Biblia, soo ni va̱ása xi̱nuvíña”.

Tá íyo ña̱ káʼa̱n xa̱ʼa̱ ña̱ xi̱nu ña̱ va̱xi nu̱ú Biblia, ¿á ndáyáʼvi kunda̱a̱-iniyó xa̱ʼa̱ña? Ta, ¿nda̱chun?

ÑA̱ XA̱A̱ SA̱KUAʼAYÓ

Ña̱ Biblia káʼa̱nña xíʼinyó xa̱ʼa̱ ña̱ ndátuyó ndakiʼinyó chí nu̱únínu, ta saátu káʼa̱nña xíʼinyó ña̱ si̱íní kundooyó, ta chíndeétáʼanña xíʼinyó ña̱ kundeé-iniyó ya̱ʼayó nu̱ú tu̱ndóʼo.

Ná ndakaʼányó xa̱ʼa̱ ña̱yóʼo

¿Nda̱chun xíniñúʼu kandíxa na̱ yiví ña̱ koo chí nu̱únínu?
¿Ndáaña káʼa̱n Biblia xa̱ʼa̱ ña̱ koo chí nu̱únínu?
¿Ndáa ki̱ʼva chindeétáʼan ña̱ ndátún ndakiʼún chí nu̱únínu xíʼún tiempo vitin?

Ki̱vi̱ ña̱ sa̱ndíʼún ka̱ʼviún lección yóʼo:

Kivi keʼún ña̱yóʼo

Ña̱ va̱ʼa kǒo nandósóún xa̱ʼa̱ ña̱ káʼa̱n Biblia koo chí nu̱únínu, kivi ndikó tukún kaʼviún texto ña̱ va̱xi nu̱ú lección yóʼo.

Inkaka ña̱ kivi keʼún:

Inkaka ña̱ kivi keʼún

NANDUKÚKA XA̱ʼA̱ÑA

Kivi kunda̱a̱ka-iniún ndáa ki̱ʼva chindeétáʼan ña̱ koo chí nu̱únínu xíʼún.

“¿Ndáa míí kivi kunda̱a̱-iniyó xa̱ʼa̱ ña̱ koo chí nu̱únínu?” (¡Despertad!, 22 tí abril ku̱i̱ya̱ 2004)

Kivi kunda̱a̱-iniún ndáa ki̱ʼva xa̱a̱ chíndeétáʼan ña̱ koo chí nu̱únínu xíʼin na̱ kúúmií iin kue̱ʼe̱ ña̱ ndeéní.

“¿Á kivi chindeétáʼan ña̱ káʼa̱n Biblia xíʼinyó ña̱ kundeé-iniyó ya̱ʼayó nu̱ú iin kue̱ʼe̱?” (Artículo ña̱ va̱xi nu̱ú jw.org)

Tá ná kotoún video yóʼo, ndakanixi̱ní ña̱ xa̱a̱ íyoún nu̱ú ñuyǐví xa̱á ña̱ káʼa̱n Biblia xa̱ʼa̱.

Liviní ñuyǐví xítoi̱ (3:37)

Koto ndáa ki̱ʼva chi̱ndeétáʼan ña̱ káʼa̱n Biblia koo chí nu̱únínu xíʼin iin ta̱a, ta̱ xi̱ka̱ʼa̱n ña̱ vií ná keʼéna xíʼin kití.

“Va̱ása kúni̱i̱ nasamakai̱ ki̱ʼva ña̱ íyo ñuyǐví yóʼo” (La Atalaya, 1 tí julio ku̱i̱ya̱ 2013)