KIXÁ’A NATÚ’UN XÍ’IN NA̱ YIVÍ
LECCIÓN 6
Kǒo yi̱ʼvíún
Ña̱ káʼa̱n tu̱ʼun Ndióxi̱: “Ndióxi̱ ta̱xira ña̱ ndakú koo inindi̱ ña̱ va̱ʼa natúʼunndi̱ xíʼinndó tu̱ʼun va̱ʼa xa̱ʼa̱ra” (1 Tes. 2:2).
Ña̱ ke̱ʼé ta̱ Jesús
1. Koto VIDEO á kaʼvi Lucas 19:1-7. Tándi̱ʼi, ndakanixi̱ní xa̱ʼa̱ pregunta ña̱ va̱xi yóʼo:
¿Nda̱chun va̱ása níxiin sava na̱ yiví kutáʼanna xíʼin ta̱ Zaqueo?
¿Nda̱chun va̱ʼa na̱túʼun ta̱ Jesús xíʼinra?
¿Ndáaña sákuaʼayó xíʼin ña̱ ke̱ʼé ta̱ Jesús?
2. Xíniñúʼu ndakú koo iniyó ña̱ va̱ʼa natúʼunyó xíʼin ndiʼi na̱ yiví xa̱ʼa̱ Ndióxi̱.
Keʼé táki̱ʼva ke̱ʼé ta̱ Jesús
3. Kundaa-ini Jehová. Espíritu santo kúú ña̱ ta̱xi ndee̱ ndaʼa̱ ta̱ Jesús ña̱ va̱ása níyi̱ʼvíra natúʼunra xíʼin na̱ yiví, ta saátu kivi taxi Jehová ña̱yóʼo ndaʼún (Mat. 10:19, 20; Luc. 4:18). Ka̱ʼa̱n xíʼin Jehová ná taxira ndee̱ ndaʼún ña̱ va̱ása yi̱ʼvíún natúʼun xíʼin na̱ yiví (Hech. 4:29).
4. Kǒo ndaka̱xiún na̱ yiví na̱ natúʼún xíʼin. Sava yichi̱ íxayo̱ʼvi̱ña xíʼinyó natúʼunyó xíʼin na̱ yiví xa̱ʼa̱ ki̱ʼva ña̱ náʼa̱na, ña̱ kúúna na̱ kúiká á na̱ ndáʼvi á xa̱ʼa̱ religión ña̱ kúúmiína. Soo ndakaʼán:
Miíyó va̱ása kivi kunda̱a̱-iniyó ndáaña ndíkaa̱ níma̱ na̱ yiví, soo Jehová xíʼin ta̱ Jesús kiviva keʼéna ña̱yóʼo.
Kiviva chindeétáʼan Jehová xíʼin na̱ yiví ña̱ xa̱a̱na ndasakáʼnunara.
5. Va̱ása yi̱ʼvíún tá káʼún xíʼinna soo kuentaní koún (Mat. 10:16). To̱ʼó ka̱ʼún xíʼinna ta kǒo na̱a̱ún xíʼinna. Tá xítoún ña̱ va̱ása xíínna kuniso̱ʼona á va̱ása va̱ʼa kúniún xíʼin ña̱ káʼa̱nna, to̱ʼó ka̱ʼún xíʼinna ta ndakiʼún ku̱ʼún (Prov. 17:14).