¿Ama ki̱xáʼa xáʼndachíñu Reino Ndióxi̱? (Táʼví nu̱ú)

NANDUKÚKANDÓ XA̱ʼA̱ ÑA̱ KÚNI̱NDÓ KUNDA̱A̱-ININDÓ

Julio: Ernesto, kútóoníi̱ ña̱ xa̱a̱ káʼa̱nyó xa̱ʼa̱ Biblia.a ¿Á ndákaʼún ña̱ ni̱nda̱ka̱tu̱ʼún yi̱ʼi̱ xa̱ʼa̱ Reino Ndióxi̱? Ni̱nda̱ka̱tu̱ʼún yi̱ʼi̱ nda̱chun sánáʼa̱ na̱ testigo Jehová ña̱ ki̱xáʼa Reino Ndióxi̱ xáʼndachíñuña tá ku̱i̱ya̱ 1914.

Ernesto: Saá íyoña, ña̱yóʼo kúú ña̱ ka̱ʼvii̱ nu̱ú iin revista ña̱ távándó, ña̱ Reino Ndióxi̱ ki̱xáʼa xáʼndachíñuña tá ku̱i̱ya̱ 1914, ta kǒo níkunda̱a̱-inii̱ xa̱ʼa̱ña. Saáchi káchindó ña̱ ndiʼi ña̱ kándíxandó va̱xiña nu̱ú Biblia.

Julio: Saá íyoña, ndiʼi ña̱ kándíxandi̱.

Ernesto: Soo yi̱ʼi̱ xa̱a̱ ka̱ʼvii̱ iníísaá Biblia ta ta̱ʼán ndani̱ʼíi̱ ña̱ ku̱i̱ya̱ yóʼo nu̱úña. Xa̱ʼa̱ ña̱kán na̱ndukúi̱ xa̱ʼa̱ ku̱i̱ya̱ “1914” nu̱ú iin Biblia ña̱ va̱xi nu̱ú internet ta kǒoña níndani̱ʼíi̱.

Julio: Kúni̱ ka̱ʼi̱n xíʼún ña̱ íyo u̱vi̱ ña̱ va̱ʼaní kéʼún, ña̱ nu̱ú xa̱a̱ ka̱ʼviún iníísaá Biblia ta xíʼin ña̱yóʼo náʼún ña̱ ndáyáʼviníña nu̱ún.

Ernesto: Saá íyovaña, ña̱yóʼo kúú iin libro ña̱ va̱ʼaníka.

Julio: Saátu ndákanixi̱ní yi̱ʼi̱va. Ña̱ u̱vi̱ saáchi xíniñúʼúnña ña̱ va̱ʼa nandukún ña̱ kuni̱ún kunda̱a̱-iniún xa̱ʼa̱. Ta xíʼin ña̱yóʼo ke̱ʼún ña̱ káʼa̱n Biblia xíʼinyó keʼéyó: ná nandukúyó ña̱ kúni̱yó kunda̱a̱-iniyó xa̱ʼa̱.b Va̱ʼaníva ña̱ ke̱ʼún ña̱yóʼo

Ernesto: Tíxa̱ʼviún Julio, saáchi kúni̱kai̱ sakúaʼi̱. Na̱ndukú loʼokai̱ xa̱ʼa̱ña ta nda̱ni̱ʼíi̱ ña̱ káʼa̱n xa̱ʼa̱ ku̱i̱ya̱ 1914 nu̱ú libro ña̱ káʼviyó. Ña̱ káʼa̱n xa̱ʼa̱ iin yitu̱n káʼnu tú xa̱ʼndana ta ndi̱ko tukunú xa̱ʼnunú túvii̱.

Julio: Saá íyovaña. Ña̱yóʼo kúú profecía ña̱ va̱xi nu̱ú capítulo 4 ña̱ Daniel, káʼa̱nña xa̱ʼa̱ xa̱ni ña̱ ni̱xa̱ní ta̱ Nabucodonosor, ta̱ xi̱kuu rey ñuu Babilonia.

Ernesto: Ña̱yóʼo kúú ña̱ ka̱ʼvivai̱. Ta ku̱a̱ʼá yichi̱ ka̱ʼvii̱ña soo va̱ása níkunda̱a̱-inii̱ xíʼinña nda̱chun kítáʼanña xíʼin Reino Ndióxi̱ á ku̱i̱ya̱ 1914.

Julio: Va̱ása ndakanda̱-iniún xíʼin ña̱yóʼo. Nda̱a̱ mií ta̱ ka̱ʼyí tu̱ʼun yóʼo, ta̱ profeta Daniel, va̱ása níkunda̱a̱-inira xíʼinña.

Ernesto: ¿Á ndixa?

Julio: Saá íyovaña. Koto ña̱ káʼa̱n Daniel 12:8: “Xi̱niso̱ʼi̱, soo va̱ása níkunda̱a̱-inii̱”.

Ernesto: Nda̱kanixi̱níi̱ ña̱ iinlá yi̱ʼi̱va kúú ta̱ va̱ása níkunda̱a̱-ini xíʼinña. Va̱ʼava kúnii̱ vitin.

Julio: ¿Á xíni̱ún nda̱chun va̱ása níkunda̱a̱-ini ta̱ Daniel xa̱ʼa̱ ña̱yóʼo? Saáchi ta̱ʼán ki̱xaa̱ tiempo ña̱ nda̱kaxin Ndióxi̱ ña̱ kunda̱a̱-inina xa̱ʼa̱ tu̱ʼun yóʼo. Soo ña̱yóʼo xa̱a̱ na̱samaña ta vitin xa̱a̱ kivi kunda̱a̱-iniyó xa̱ʼa̱ profecía ña̱ ka̱ʼyíra.

Ernesto: ¿Á saáva?

Julio: Saá íyovaña, ña̱yóʼo kúú ña̱ káʼa̱n inka versículo, versículo 9. Koto ña̱ káchiña: “Tu̱ʼun yóʼo koo se̱ʼéña ta ndasiña nda̱a̱ tiempo nu̱ú ndíʼi”. Nda̱a̱ táki̱ʼva ki̱ʼún kuenta ña̱ profecía yóʼo kivi kunda̱a̱-iniyó xa̱ʼa̱ña ki̱vi̱ nu̱ú ndíʼi. Ta ku̱a̱ʼání ña̱ʼa náʼa̱ ña̱ xa̱a̱ ndóoyó tiempo nu̱ú ndíʼi. Ta kunda̱a̱ka-iniyó xa̱ʼa̱ ña̱yóʼo nu̱ú libro ña̱ káʼviyó.c

Ernesto: ¿Á kivi ndakaniún ña̱ profecía yóʼo nu̱úi̱?

Julio: Va̱ʼava.

ÑA̱ NI̱XA̱NÍ TA̱ NABUCODONOSOR

Julio: Siʼna ná ka̱ʼa̱n loʼoyó xa̱ʼa̱ ña̱ ni̱xa̱ní ta̱ rey Nabucodonosor, tándi̱ʼi saá ka̱ʼa̱nyó ndáaña kúni̱ kachi ña̱yóʼo. ¿Á va̱ʼa túviún?

Ernesto: Va̱ʼava túvii̱.

Julio: Ta̱ Nabucodonosor ni̱xa̱níra xa̱ʼa̱ iin yitu̱n káʼnu tú xáa̱ nda̱a̱ chí ndiví. Tá ni̱xa̱níra xi̱niso̱ʼora ña̱ íyo iin na̱ chi̱ndaʼá Ndióxi̱ ta ni̱ka̱ʼa̱nna ña̱ ná kaʼndana yitu̱n yóʼo. Ña̱ ki̱ndoo kuití kúú ti̱oʼonú á yoʼo̱ xa̱ʼa̱nú ta saátu loʼo kuití xa̱ʼa̱nú. Tasaá ni̱ya̱ʼa “u̱xa̱ tiempo” ta yitu̱n yóʼo ndi̱kó tukunú xa̱ʼnunú.d Yichi̱ nu̱ú ni̱xi̱nu profecía yóʼo kúú tá xa̱ʼndachíñu mií ta̱ Nabucodonosor yóʼo. Iin rey ta̱ ndakúní ni̱xi̱yo ta̱yóʼo, ni̱xi̱yora nda̱a̱ táki̱ʼva íyo iin yitu̱n tú xáa̱ nda̱a̱ chí ndiví. Soo nda̱a̱ táki̱ʼva íyo ta̱ xa̱ʼndana saá ni̱xi̱yo ta̱yóʼo ta ndu̱vara “u̱xa̱ tiempo”. ¿Á ndákaʼún ndáaña kúni̱ kachi ña̱yóʼo?

Ernesto: Va̱ása ndákaʼíi̱n.

Julio: Biblia káchiña ña̱ sa̱na̱ra, ta ki̱ʼva u̱xa̱ ku̱i̱ya̱ ndo̱ʼora ña̱yóʼo á “u̱xa̱ tiempo” ta xa̱ʼa̱ ña̱yóʼo sa̱ndákoora ña̱ kúúra rey. Soo tándi̱ʼi tiempo yóʼo nda̱ʼavara ta ndi̱kóra ku̱ura rey.e

Ernesto: Xa̱a̱ ku̱a̱ʼa̱n kúnda̱a̱-inii̱. Soo, ¿ndáa ki̱ʼva kítáʼan ña̱yóʼo xíʼin Reino Ndióxi̱ ta saátu ku̱i̱ya̱ 1914?

Julio: Ña̱ chindeétáʼan xíʼinyó ña̱ va̱ʼa kunda̱a̱-iniyó xíʼin ña̱ profecía yóʼo, kúú ña̱ kunda̱a̱-iniyó ña̱ u̱vi̱ yichi̱ ni̱xi̱nuña. Tá sa̱ndákoo ta̱ Nabucodonosor xa̱ʼndachíñura. Ta ña̱ u̱vi̱ kúú tá va̱ása níxaʼndachíñuka Ndióxi̱. Ña̱ u̱vi̱ yóʼo kúú ña̱ kítáʼan xíʼin Reino Ndióxi̱.

Ernesto: ¿Nda̱chun va̱ʼa kúnda̱a̱-iniún ña̱ u̱vi̱ yichi̱ ni̱xi̱nuña?

Julio: Saáchi mií profecía yóʼo káʼa̱nña xa̱ʼa̱ sava ña̱ʼa ña̱ chindeétáʼan xíʼinyó ña̱ va̱ʼa kunda̱a̱-iniyó xa̱ʼa̱ña. Daniel 4:17 káʼa̱nña ña̱ profecía yóʼo ni̱ka̱ʼyi̱ña ña̱ va̱ʼa kunda̱a̱-ini na̱ yiví ña̱ “ta̱ káʼnuníka kúú ta̱ xáʼndachíñu ti̱xin Reino nu̱ú iníísaá ñuyǐví ta táxira ña̱yóʼo ndaʼa̱ na̱ kúni̱ miíra”. Ta, ¿á ki̱ʼún kuenta ña̱ káʼa̱nña ña̱ “xáʼndachíñura nu̱ú na̱ yiví”?

Ernesto: Ndixava, yóʼo káʼa̱nña “ta̱ káʼnuníka kúú ta̱ xáʼndachíñu ti̱xin Reino nu̱ú iníísaá ñuyǐví”.

Julio: ¿Ta ndáa ta̱ kúú “ta̱ káʼnuní” ta̱ káʼa̱nña xa̱ʼa̱ yóʼo?

Ernesto: Ndióxi̱ kúúra, ¿á su̱ví saá?

Julio: Saá íyoña, ña̱yóʼo náʼa̱ña ña̱ profecía su̱ví iinlá xa̱ʼa̱ ta̱ Nabucodonosor káʼa̱nña. Chi káʼa̱ntuña xa̱ʼa̱ Reino ña̱ xáʼndachíñu nu̱ú iníísaá ñuyǐví, ña̱yóʼo kúú Reino Ndióxi̱ ña̱ xáʼndachíñu nu̱ú iníísaá ñuyǐví. Tá ná kaʼvikayó xa̱ʼa̱ profecía yóʼo saá káxika kunda̱a̱-iniyó xa̱ʼa̱ña.

Ernesto: Va̱ʼava ná kuniso̱ʼi̱ yóʼó.

ÑA̱ NDÁYÁʼVINÍ KÁʼA̱N LIBRO TA̱ DANIEL XA̱ʼA̱

Julio: Libro ta̱ Daniel íyo iin ña̱ ku̱a̱ʼání káʼa̱nña xa̱ʼa̱: ña̱yóʼo kúú ña̱ kixáʼa Reino Ndióxi̱ kaʼndachíñuña ta ta̱ kaʼndachíñu xíʼin ña̱yóʼo kúú ta̱ Jesucristo. Ná ka̱ʼa̱n loʼokayó. Va̱xiña nu̱ú u̱vi̱ capítulo chí sa̱tá. Nu̱ú Daniel 2:44. Kaʼvi loʼoña, ixaún ña̱ ma̱ní.

Ernesto: Va̱ʼa, káchiña: “Ta ki̱vi̱ ná kundoo na̱ chíñu kán, Ndióxi̱ ta̱ íyo chí ndiví chindúʼúra iin ta̱ kaʼndachíñu ta va̱ása ndiʼi-xa̱ʼa̱ ña̱ kaʼndachíñura, ta chiñu ña̱ kuumií ta̱yóʼo va̱ása ndakiʼin inkanaña ndaʼa̱ra. Ta ta̱ chíñu yóʼo sandíʼi-xa̱ʼa̱ra ndiʼi na̱ chíñu ñuyǐví yóʼo, ta iinlá miíra koo ndiʼi tiempo”.

Julio: ¿Á túviún ña̱ káʼa̱n versículo yóʼo xa̱ʼa̱ Reino Ndióxi̱?

Ernesto: Va̱ása kúnda̱a̱ káxi-inii̱.

Julio: Ña̱ versículo yóʼo káʼa̱nña xa̱ʼa̱ Reinora “ña̱ kooña ndiʼi tiempo” á ña̱ va̱ása ndiʼi-xa̱ʼa̱ña. ¿Á íyo inkana kivi kaʼndachíñu ndiʼi tiempo nda̱a̱ táki̱ʼva kéʼé Ndióxi̱?

Ernesto: Kǒo nda̱a̱ ni iinna.

Julio: Saá íyovaña. Ná kotoyó inka profecía ña̱ káʼa̱n xa̱ʼa̱ Reino Ndióxi̱. Ta va̱xiña nu̱ú Daniel 7:13, 14 ta káʼa̱nña xa̱ʼa̱ iin na̱ yiví na̱ xa̱a̱ koo rey. Koto ña̱ káʼa̱nña: “Ta ta̱ xi̱ku̱aʼa yóʼo ta̱xira ndee̱ ndaʼa̱ ta̱yóʼo, ña̱ kuniʼi chíñura ta nda̱sakáʼnura ta̱yóʼo nu̱ú ndiʼina, na̱ ñuu válí xíʼin na̱ ñuu náʼnu nda̱a̱ na̱ káʼa̱n inka tu̱ʼun kivi kachíñuna nu̱ú ta̱yóʼo. Ta chiñu ña̱ kúúmií ta̱yóʼo va̱ása ndakiʼin inkanaña ndaʼa̱ra, kooña ndiʼi tiempo”. Nu̱ú versículo yóʼo va̱xi iin ña̱ xa̱a̱ ni̱ka̱ʼa̱nyó xa̱ʼa̱.

Ernesto: Ndixava, ndíkó tukuña káʼa̱nña xa̱ʼa̱ iin Reino.

Julio: Saá íyovaña, soo su̱ví xa̱ʼa̱ nda̱a̱ ndáaka reino káʼa̱nña. Ta ná kiʼún kuenta káchiña ña̱ xáʼndachíñuña nu̱ú “ñuu válí xíʼin na̱ ñuu náʼnu nda̱a̱ na̱ káʼa̱n inka tu̱ʼun”. Ña̱yóʼo kúni̱ kachiña ña̱ xáʼndachíñuña nu̱ú iníísaá ñuyǐví.

Ernesto: Va̱ása níkiʼi̱n kuenta xíʼin ña̱ káʼa̱nña, soo ndixava kúú ña̱ káʼún. Chi yóʼo káʼa̱n káxiña.

Julio: Ta koto tuku ña̱ káchi ña̱yóʼo: “Ta chiñu ña̱ kúúmií ta̱yóʼo va̱ása ndakiʼin inkanaña ndaʼa̱ra, kooña ndiʼi tiempo”. ¿Á su̱ví kítáʼanní versículo yóʼo xíʼin Daniel 2:44, ña̱ sa̱kán ka̱ʼviyó?

Ernesto: Ndixava, kítáʼannívaña.

Julio: Vitin ná ndikó tukuyó ka̱ʼa̱nyó xa̱ʼa̱ ña̱ xa̱a̱ sa̱kuaʼayó. Profecía ña̱ capítulo 4 ña̱ Daniel chíndeétáʼanña xíʼinyó ña̱ kunda̱a̱-iniyó xa̱ʼa̱ “ta̱ káʼnuníka kúú ta̱ xáʼndachíñu ti̱xin Reino nu̱ú iníísaá ñuyǐví”. Xíʼin ña̱yóʼo kúnda̱a̱-iniyó ña̱ íyo iin ta̱ káʼnuníka nu̱ú ta̱ Nabucodonosor. Ta saátu iníísaá nu̱ú libro ta̱ Daniel ndáni̱ʼíyó profecía ña̱ káʼa̱n xa̱ʼa̱ ña̱yóʼo: ta ná kixáʼa kaʼndachíñu Reino Ndióxi̱ ta ta̱ kaʼndachíñu xíʼin ña̱yóʼo kúú ta̱ Jesucristo. Ndiʼi ña̱yóʼo náʼa̱ña nu̱úyó ña̱ profecía ña̱ va̱xi nu̱ú capítulo 4 ña̱ Daniel káʼa̱nña xa̱ʼa̱ Reino Ndióxi̱, ¿á su̱ví saá túviún?

Ernesto: Ndixava, káʼa̱n káxivaña. Soo va̱ása kúnda̱a̱-inii̱ ndáa ki̱ʼva kítáʼan ña̱yóʼo xíʼin ku̱i̱ya̱ 1914.

NI̱YA̱ʼA U̱XA̱ TIEMPO

Julio: Ná ndíkó tukuyó ka̱ʼa̱nyó xa̱ʼa̱ ta̱ rey Nabucodonosor. Ni̱ka̱ʼa̱nyó ña̱ nu̱ú yichi̱ ni̱xi̱nu profecía yóʼo, káʼa̱nña ña̱ kúúra iin yitu̱n. Sa̱ndákoora ña̱ xáʼndachíñura tá xa̱ʼndana yitu̱n yóʼo ta ni̱ya̱ʼa u̱xa̱ tiempo sa̱tára. Ta̱ Nabucodonosor sa̱na̱ra, soo tá ni̱ya̱ʼa tiempo yóʼo nda̱ʼavara ta ki̱xáʼa xáʼndachíñu tukura. Ta ña̱ yichi̱ u̱vi̱ ña̱ ni̱xi̱nuña kúú tá va̱ása níxaʼndachíñuka Ndióxi̱, soo sa̱ndákoora ña̱ kaʼndachíñura, soo su̱ví xa̱ʼa̱ ña̱ ke̱ʼéra iin ña̱ va̱ása va̱ʼa.

Ernesto: ¿Ndáa ki̱ʼva? Va̱ása kúnda̱a̱-inii̱ xíʼinña.

Julio: Saáchi tá tiempo ña̱ káʼa̱n Biblia xa̱ʼa̱ káʼa̱nña xa̱ʼa̱ na̱ rey ñuu Israel ña̱ xi̱xiyona nu̱ú trono Jehová.f Ña̱yóʼo kúni̱ kachiña ña̱ mií Ndióxi̱ nda̱kaxin na̱yóʼo. Ña̱ xi̱xaʼndachíñuna kúú ña̱ xi̱ndakiʼin nu̱ú ña̱ xi̱xaʼndachíñu Ndióxi̱. Soo tá ni̱ya̱ʼa tiempo na̱yóʼo ku̱xíkána nu̱úra ta nda̱a̱ na̱ ñuu na̱ xi̱xaʼndachíñuna nu̱ú ku̱xíkána nu̱úra. Xa̱ʼa̱ ña̱yóʼo ta̱xira ña̱ sa̱ndíʼi-xa̱ʼa̱ na̱ ñuu Babilonia na̱ ñuu Israel tá ku̱i̱ya̱ 607 tiempo xi̱naʼá. Tá tiempo saá kǒoka na̱ rey níndaka̱xin Jehová kaʼndachíñu chí Jerusalén, nu̱ú ni̱xi̱yo ña̱ xi̱xaʼndachíñu na̱ rey. Xa̱ʼa̱ ña̱kán kivi kachiyó ña̱ va̱ása níxaʼndachíñuka Ndióxi̱. ¿Á va̱ʼa ku̱a̱ʼa̱n kúnda̱a̱-iniún vitin?

Ernesto: Xa̱a̱ ku̱a̱ʼa̱n kúnda̱a̱-inii̱ ña̱ káʼún.

Julio: Ña̱ u̱xa̱ tiempo ki̱xáʼaña tá ku̱i̱ya̱ 607 tiempo xi̱naʼá. Tiempo saá va̱ása níxaʼndachíñuka Ndióxi̱. Soo tándi̱ʼi tiempo yóʼo Ndióxi̱ nda̱kaxinra inka ta̱ koo rey soo ta̱yóʼo koora chí ndiví. Ta saátu inka profecía ña̱ ka̱ʼviyó nu̱ú libro ta̱ Daniel ni̱xi̱nuña tándi̱ʼi tiempo yóʼo. Soo ña̱ kúni̱yó kunda̱a̱-iniyó xa̱ʼa̱ vitin kúú: ¿ama kúú ña̱ ndi̱ʼi u̱xa̱ tiempo yóʼo? Tá ná kunda̱a̱-iniyó xa̱ʼa̱ ña̱yóʼo, saá kunda̱a̱-iniyó ama ki̱xáʼa xáʼndachíñu Ndióxi̱.

Ernesto: Ná ka̱ʼi̱n ndáa ku̱i̱ya̱ xi̱kuuña, ku̱i̱ya̱ 1914.

Julio: Saá íyovaña va̱ʼaní ni̱ka̱ʼún Ernesto.

Ernesto: ¿Soo ndáa ki̱ʼva kúnda̱a̱-iniyó ña̱ ku̱i̱ya̱ saá xi̱kuuña?

Julio: Saáchi tá ki̱xi ta̱ Jesús nu̱ú ñuʼú ni̱ka̱ʼa̱nra ña̱ ta̱ʼán ndiʼiví tiempo yóʼo.g Xa̱ʼa̱ ña̱kán tiempo ña̱ káʼa̱nyó xa̱ʼa̱ yóʼo ku̱a̱ʼáníva ku̱i̱ya̱ kúúña. Ña̱ u̱xa̱ tiempo yóʼo xa̱a̱ ku̱a̱ʼání ku̱i̱ya̱ chí sa̱tá ki̱xáʼaña tá kúma̱níka kixi ta̱ Jesús nu̱ú ñuʼú ta saátu ni̱xi̱yoka ña̱ u̱xa̱ tiempo yóʼo tá ndi̱kó ta̱ Jesús ku̱a̱ʼa̱nra chí ndiví. Soo, ¿á ndákaʼún? ña̱ ni̱ka̱ʼa̱nyó ña̱ profecía ta̱ Daniel ña̱ va̱ása kunda̱a̱-inina xíʼinña nda̱a̱ ná kixaa̱ “tiempo nu̱ú ndiʼi”.h Tá xa̱a̱ ndi̱ʼi siglo XIX, ku̱a̱ʼá na̱ yiví na̱ káʼvi Biblia ki̱xáʼana nándukú va̱ʼana xa̱ʼa̱ ña̱yóʼo xíʼin inkaka profecía. Ta loʼo tá loʼo ku̱nda̱a̱-inina ña̱ u̱xa̱ tiempo ndi̱ʼiña tá ku̱i̱ya̱ 1914. Ta ña̱ kúu nu̱ú ñuyǐví yóʼo náʼa̱ña nu̱úyó ña̱ ku̱i̱ya̱ yóʼo ki̱xáʼa ña̱ Reino Ndióxi̱ xáʼndachíñuña, tasaá ki̱xáʼa tiempo nu̱ú ndíʼi ñuyǐví yóʼo. Ta kúnda̱a̱-inii̱ ña̱ ku̱a̱ʼáníva kúú ña̱ káʼa̱nyó xa̱ʼa̱ yóʼo ña̱ va̱ʼa kamaní kunda̱a̱-iniyó xa̱ʼa̱ña, Ernesto.

Ernesto: ¿Á saáva?, xíniñúʼu kaʼvi tukui̱ña ña̱ va̱ʼa kunda̱a̱ va̱ʼa inii̱ xíʼinña.

Julio: Saá íyovaña, ku̱a̱ʼání tiempo xi̱niñúʼu yi̱ʼi̱ saá ku̱nda̱a̱-inii̱ xíʼinña. Soo va̱ʼaní tá chi̱ndeétáʼan ndiʼi ña̱ na̱túʼunyó xa̱ʼa̱ ña̱ va̱ʼa kunda̱a̱-iniún xa̱ʼa̱ na̱ testigo Jehová ña̱ ndiʼi ña̱ káʼa̱nndi̱ xa̱ʼa̱ Reino Ndióxi̱ nu̱ú Biblia kánaña.

Ernesto: Saá íyoña, ndiʼi tiempo ndákanda̱-inii̱ xíʼinndó xa̱ʼa̱ ña̱ kándíxandó ña̱ káʼa̱n Biblia.

Julio: Ta kíʼi̱n kuenta ña̱ saá kuni̱ún kandíxaúnña. Nda̱a̱ táki̱ʼva ni̱ka̱ʼi̱n xíʼún ku̱a̱ʼání kúú ña̱yóʼo ña̱ va̱ʼa kamaní kunda̱a̱-iniyó xa̱ʼa̱ña ta sana íyokaña kúni̱ún kunda̱a̱-iniún xa̱ʼa̱. Tá kúú ni̱ka̱ʼa̱nyó ña̱ u̱xa̱ tiempo ki̱xáʼaña ku̱i̱ya̱ 607 tiempo xi̱naʼá ta kítáʼanníña xíʼin Reino Ndióxi̱. Soo. ¿Nda̱chun káʼa̱nndi̱ ña̱ ndiʼiña tá ku̱i̱ya̱ 1914?i

Ernesto: Ndixava ña̱yóʼo kúú ña̱ kúni̱i̱ kunda̱a̱-ini xa̱ʼa̱.

Julio: Mií Biblia kúú ña̱ chíndeétáʼan xíʼinyó ña̱ kunda̱a̱-iniyó nda̱saa tiempo kúú ña̱ u̱xa̱ tiempo. ¿Á kúni̱ún ka̱ʼa̱nyó xa̱ʼa̱ ña̱yóʼo inka yichi̱?j

Ernesto: Va̱ʼava yóʼo kundatui̱ miíún.