¿Ama ki̱xáʼa xáʼndachíñu Reino Ndióxi̱? (Táʼví u̱vi̱)

NÁ NDAKAʼÁNYÓ XA̱ʼA̱ ÑA̱ NI̱XA̱NÍ TA̱ NABUCODONOSOR

Julio: Kúaʼún Ernesto, kúsi̱íní-inii̱ ña̱ ndi̱kó tukui̱ nu̱ún. Kútóoníi̱ ña̱ va̱xii̱ ndiʼi semana ña̱ ka̱ʼi̱n xíʼún xa̱ʼa̱ Biblia.a ¿Á íyo va̱ʼún?

Ernesto: íyo va̱ʼavai̱ tíxa̱ʼviún.

Julio: Va̱ʼaníva, á ndákaʼún tá ki̱xii̱ ni̱ka̱ʼa̱nyó nda̱chun kándíxa na̱ testigo Jehová ña̱ ki̱xáʼa Reino Ndióxi̱ xáʼndachíñuña tá ku̱i̱ya̱ 1914.b Xi̱niyó nu̱ú capítulo 4 ña̱ libro ña̱ ka̱ʼyí ta̱ Daniel chíndeétáʼanña xíʼinyó ña̱ va̱ʼa kunda̱a̱-iniyó xa̱ʼa̱ ña̱yóʼo. ¿Á ndákaʼún ndáaña kúúña?

Ernesto: Ndákaʼánvai̱, ña̱ ni̱xa̱ní ta̱ rey nabucodonosor.

Julio: Saá íyoña, ta̱yóʼo ni̱xa̱níra xa̱ʼa̱ iin yitu̱n tú xáa̱ nda̱a̱ chí ndiví. Ta ti̱xin xa̱ni yóʼo xi̱niso̱ʼora ña̱ ni̱ka̱ʼa̱n iin ángel ña̱ ná kaʼndana tú yitu̱n yóʼo. Ña̱ ni̱ka̱ʼa̱nna kúú ña̱ ná kindo̱o kuití ti̱oʼonú xíʼin xa̱ʼa̱nú. Tándi̱ʼi ni̱ya̱ʼa “u̱xa̱ tiempo” sa̱tánú, tú yitu̱n yóʼo xa̱ʼnu tukunú.c Ta saátu xi̱niyó ña̱ u̱vi̱ yichi̱ ni̱xi̱nu profecía yóʼo. ¿Ndáaña xi̱kuu ña̱ nu̱ú? ¿Á ndákaʼún?

Ernesto: Ña̱ ndo̱ʼo ta̱ Nabucodonosor kúúña, ¿á su̱ví saá? Ta̱yóʼo sa̱na̱ra ta ki̱ʼva u̱xa̱ ku̱i̱ya̱ ndo̱ʼora ña̱yóʼo.

Julio: Saá íyoña. Sa̱na̱ra ta̱ va̱ása níxi̱yokara rey. Ta yichi̱ u̱vi̱ ña̱ ni̱xi̱nu profecía yóʼo kúú ña̱ va̱ása níxi̱yoka rey na̱ nda̱ka̱xin Ndióxi̱ ña̱ kaʼndachíñuna nu̱ú ñuʼú yóʼo u̱xa̱ tiempo. Ta tiempo yóʼo ki̱xáʼaña tá ndi̱ʼi-xa̱ʼa̱ ñuu Jerusalén tá ku̱i̱ya̱ 607 tiempo xi̱naʼá, ta nani saá, kǒo na̱ rey níxi̱yo na̱ ndaka̱xin Jehová. Tá ná ndiʼi tiempo yóʼo, Ndióxi̱ ndaka̱xinra iin rey xa̱á, soo chí ndiví koora. Ña̱yóʼo kúni̱ kachiña, tá ná ndiʼi u̱xa̱ tiempo, kixáʼa Reino Ndióxi̱ kaʼndachíñuña. Tásaá, xa̱a̱ sa̱kúaʼayó ama ki̱xáʼa ña̱ u̱xa̱ tiempo yóʼo. Vitin ná kotoyó nda̱saa tiempo kúúña ña̱ va̱ʼa kunda̱a̱-iniyó ndáa ku̱i̱ya̱ ki̱xáʼa Reino Ndióxi̱ xáʼndachíñuña. ¿Á xa̱a̱ kúnda̱a̱ loʼo iniún xíʼinña?

Ernesto: Xa̱a̱ ndákaʼíi̱n xa̱ʼa̱ ña̱ ni̱ka̱ʼa̱nyó tá ki̱xiún saá.

Julio: Va̱ʼaníva. Ná kotoyó nda̱saa tiempo kúú ña̱ u̱xa̱ tiempo. Saátu miíi̱ xi̱niñúʼu ndi̱kói̱ kaʼviña ña̱ va̱ʼa ndakaʼíi̱n xa̱ʼa̱ña. Chika̱i̱ ndee̱ ña̱ viíní ka̱ʼi̱n xa̱ʼa̱ña xíʼún.

Ernesto: Va̱ʼava.

NDI̱ʼI U̱XA̱ TIEMPO, TA KI̱XÁʼA TIEMPO NU̱Ú NDÍʼI

Julio: Ña̱ nu̱ú yichi̱ ña̱ ni̱xi̱nuña xíʼin ta̱ Nabucodonosor, u̱xa̱ tiempo u̱xa̱ ku̱i̱ya̱ kúúña. Soo yichi̱ u̱vi̱ ña̱ ni̱xi̱nuña, Reino Ndióxi̱ ku̱a̱ʼákava tiempo kúúña.

Ernesto: Ta, ¿nda̱chun va̱ʼa kúnda̱a̱-iniún?

Julio: Ña̱ va̱ʼa kixáʼayó, ña̱ u̱xa̱ tiempo ki̱xáʼaña tá ku̱i̱ya̱ 607 tiempo xi̱naʼá, tá sa̱ndíʼi-xa̱ʼa̱na ñuu Jerusalén. Tá ná kaʼviyó u̱xa̱ ku̱i̱ya̱, xáa̱yó ku̱i̱ya̱ 600 tiempo xi̱naʼá ta ña̱ ku̱i̱ya̱ yóʼo kǒo iin ña̱ ndáyáʼvi níkuu ña̱ kítáʼan xíʼin Reino Ndióxi̱. Ta saátu nda̱a̱ táki̱ʼva xa̱a̱ sa̱kúaʼayó tá ki̱xi ta̱ Jesús nu̱ú ñuʼú ni̱ka̱ʼa̱nra ña̱ ta̱ʼán ndiʼi ña̱ u̱xa̱ tiempo.

Ernesto: Saá íyo ña̱ ndákaʼíi̱n.

Julio: Tásaá, tá u̱xa̱ tiempo su̱ví u̱xa̱ ku̱i̱ya̱ kúúña; xíniñúʼu ku̱a̱ʼáka tiempo kooña.

Ernesto: ¿Ku̱a̱ʼáka tiempo? ¿Nda̱saa tiempo?

Julio: Saáchi nu̱ú tutu ña̱ Apocalipsis, va̱xi iin profecía ña̱ kítáʼanní xíʼin ña̱ ni̱ka̱ʼa̱n ta̱ Daniel, ta ña̱yóʼo chindeétáʼanña xíʼinyó kunda̱a̱-iniyó nda̱saa kúú u̱xa̱ tiempo. Nu̱ú ña̱ profecía yóʼo káʼa̱nña u̱ni̱ tiempo sava kúúña 1,260 ki̱vi̱.d Tá u̱vi̱ yichi̱ ná ka̱ʼviyó ña̱yóʼo, kúúña u̱xa̱ tiempo, ña̱yóʼo kúúña 2,520 ki̱vi̱. ¿Á va̱ʼa kúnda̱a̱-iniún xíʼinña?

Ernesto: Ndixava, soo va̱ása kúnda̱a̱-inii̱ nda̱chun kándíxandó ña̱ ki̱xáʼa Reino Ndióxi̱ xáʼndachíñuña tá ku̱i̱ya̱ 1914.

Julio: Va̱ʼava, vitin ka̱ʼa̱nyó xa̱ʼa̱ ña̱yóʼo. Nu̱ú sava profecía ña̱ va̱xi nu̱ú Biblia iin ki̱vi̱ kúúña iin ku̱i̱ya̱. Tá ná keʼéyó ña̱yóʼo xíʼin ña̱ u̱xa̱ tiempo, 2,520 ki̱vi̱ kúúña 2,520 ku̱i̱ya̱. Tá ná kixáʼayó ku̱i̱ya̱ 607 tiempo xi̱naʼá, tá ki̱xáʼa ña̱ u̱xa̱ tiempo, ta kaʼviyó 2,520 ku̱i̱ya̱ xáa̱yó nda̱a̱ ku̱i̱ya̱ 1914, xa̱ʼa̱ ña̱yóʼo kúú ña̱ kivi ka̱ʼa̱nyó ña̱ saá kúú ña̱ ndi̱ʼi ña̱ u̱xa̱ tiempo, ta saá ki̱xáʼa ta̱ Jesús kúúra rey ti̱xin Reino Ndióxi̱. Ta saátu tá ku̱i̱ya̱ 1914 ki̱xáʼa kúu ña̱ʼa ña̱ káʼa̱n Biblia xa̱ʼa̱ ña̱ koo ki̱vi̱ nu̱ú ndíʼi.

Ernesto: ¿Ndáaña kúúña?

Julio: Nu̱ú Mateo 24:7, ta̱ Jesús ni̱ka̱ʼa̱nra xa̱ʼa̱ ña̱ kuu tá ná kixáʼara kaʼndachíñura chí ndiví: “Kanitáʼan iin ñuu xíʼin inka ñuu, ta iin país xíʼin inka país, ta koo so̱ko ta ndeéní ta̱an”. ¿Á xi̱niún?, ta̱ Jesús ni̱ka̱ʼa̱nra ña̱ koo so̱ko ta ndeéní ta̱an. ¿Á su̱ví ña̱yóʼo kúú ña̱ ki̱xáʼa kúú nu̱ú ñuʼú yóʼo tá ku̱i̱ya̱ 1914?

Ernesto: Ndixava.

Julio: Ta̱ Jesús ni̱ka̱ʼa̱nra ña̱ ndeéní kanitáʼanna. Nu̱ú libro ña̱ Apocalipsis ni̱ka̱ʼa̱nra ña̱ su̱ví iin ñuu loʼo kooña, chi kooña iníísaá ñuyǐví.e ¿Á ndákaʼún ama kúú ña̱ ki̱xáʼa Primera Guerra Mundial?

Ernesto: Tá ku̱i̱ya̱ 1914, ndixa saá kúú ña̱ káʼa̱nndó ña̱ ki̱xáʼa ta̱ Jesús xáʼndachíñura chí ndiví. Nda̱a̱ ni iin yichi̱ ta̱ʼán ndakanixi̱níi̱ ña̱ kítáʼan ña̱yóʼo.

Julio: Saá íyovaña, tá kíʼinyó kuenta ña̱ kítáʼanva profecía ña̱ ka̱ʼa̱n xa̱ʼa̱ ña̱ u̱xa̱ tiempo xíʼin profecía ña̱ káʼa̱n xa̱ʼa̱ ki̱vi̱ nu̱ú ndíʼi va̱ʼaníva kítáʼanña. Ndi̱ʼi̱ na̱ testigo Jehová va̱ása xíka-inindi̱ ña̱ ki̱xáʼa ta̱ Jesús xáʼndachíñura tá ku̱i̱ya̱ 1914, ta nani saá ta nda̱a̱ vitin ndóoyó ki̱vi̱ nu̱ú ndíʼi.f

Ernesto: Íxayo̱ʼvi̱kavaña xíʼi̱n ña̱ kunda̱a̱-inii̱ xíʼinña.

Julio: Sana saá ndóʼovaún. Saátu ndo̱ʼo miíi̱, i̱xayo̱ʼvi̱ña xíʼi̱n ña̱ kunda̱a̱-inii̱ xíʼinña tá yichi̱ nu̱ú ña̱ ni̱ka̱ʼa̱nnaña xíʼi̱n. Soo va̱ʼaní tá ña̱ na̱túʼunyó xa̱ʼa̱ chindeétáʼanña xíʼún ña̱ kiʼún kuenta, ña̱ ni va̱ása káʼa̱n Biblia xa̱ʼa̱ ña̱ 1914, ndi̱ʼi̱ na̱ testigo Jehová íyo ña̱ náʼa̱ nu̱úndi̱ ña̱ ndixa ki̱xáʼa ta̱ Jesús xáʼndachíñura tá ku̱i̱ya̱ yóʼo ta saátu va̱ʼaní tá ku̱nda̱a̱-iniún ña̱ ndiʼi ña̱ kándíxandi̱ nu̱ú Biblia va̱xiña.

Ernesto: Saá íyovaña, ndiʼi tiempo ndákanda̱ní-inii̱ xíʼinndó. Ndiʼi ña̱ ni̱ka̱ʼún xíʼi̱n nu̱ú Biblia va̱xiña. Nda̱a̱ ndáaka ña̱ ndáka̱tu̱ʼíi̱n yóʼó, va̱ása káʼún “Yi̱ʼi̱ kándíxai̱” á “Ndákanixi̱níi̱”. Chi xíniñúʼún Biblia ña̱ ka̱ʼún xa̱ʼa̱ña. Soo ¿nda̱chun yo̱ʼvi̱ní kunda̱a̱-iniyó xíʼinña? ¿Nda̱chun va̱ása káxi ní káʼa̱n Ndióxi̱ xa̱ʼa̱ ta̱ Jesús ña̱ ki̱xáʼara koora rey tá ku̱i̱ya̱ 1914?

Julio: Va̱ʼaníva ña̱ ni̱nda̱ka̱tu̱ʼún, Ernesto. Íyo ku̱a̱ʼání ña̱ va̱ása káʼa̱n káxi Biblia xa̱ʼa̱. ¿Nda̱chun kúú ña̱ ke̱ʼé Ndióxi̱ ña̱yóʼo saá? Á ¿nda̱chun xíniñúʼu chika̱a̱yó ndee̱ ña̱ kunda̱a̱-iniyó xíʼinña? ¿Á kúni̱ún ná ka̱ʼa̱nyó xa̱ʼa̱ ña̱yóʼo inka semana?

Ernesto: Va̱ʼaníva, kúni̱vai̱. Ndátui̱ yóʼó.