¿Á ndákaʼún xa̱ʼa ña̱yóʼo?

¿Á ka̱ʼviún ndiʼi tutu Ña̱ Nátúʼun xíʼinyó? Koto á kuchiñún ndakuiún ndiʼi ña̱yóʼo:

¿Ndáa ku̱mí ña̱ʼa kúú ña̱ xíniñúʼu keʼéyó ña̱ va̱ʼaka katayó?

Vií ná kundichiyó ta ná ndaniʼiyó libro ña̱ yaa xítayó, ná ndakiʼin va̱ʼayó ta̱chíyó, ta ná kuná va̱ʼayó yuʼúyó ta ndeé ná katayó. Tá saá ná keʼéyó ndeéní xa̱a̱ ña̱ katayó (w17.11-S, página 5).

¿Ndáaña sákuaʼayó xa̱ʼa ñuu nu̱ú kivi ka̱kuna ña̱ xi̱xiyo ñuu Israel xíʼin yichi̱ ña̱ xi̱niʼi miína ña̱ va̱ʼa xa̱a̱na ñuu yóʼo?

Ni̱xi̱yo i̱ñu̱ ñuu nu̱ú kivi ka̱kuna iníísaá país, ta yichi̱ nu̱ú kakana ña̱ va̱ʼa xa̱a̱na ñuu yóʼo va̱ʼaníva xi̱xiyoña. Xa̱ʼa ña̱yóʼo kama xi̱xa̱ana ta va̱ása ní ixayo̱ʼvi̱ña xíʼinna xa̱a̱na ñuu yóʼo ña̱ va̱ʼa ka̱kuna (w17.11-S, página 14).

¿Nda̱chun káʼa̱nyó xa̱ʼa Salmo 118:22 ña̱ káʼa̱nña xa̱ʼa ña̱ ndataku ta̱ Jesús?

Kǒo níxiinna kunina ta̱ Jesús ña̱ kúúra ta̱ Mesías ta xa̱ʼnínara. Ta xíniñúʼu ndatakura ña̱ va̱ʼa xa̱a̱ra nduura “yu̱u̱ ña̱ ndáyáʼvika” (w17.12-S, página 9 xíʼin 10).

¿Á xíniñúʼu koona na̱ nu̱ú ña̱ va̱ʼa ti̱xin na̱yóʼo kaku ta̱ Mesías?

Su̱ví ti̱xin na̱ nu̱ú kuití xa̱a̱ ta̱ Mesías kakura. Na̱ Judío xi̱xini̱na ña̱yóʼo, chi ka̱ndíxavana ña̱ ti̱xin na̱ táʼan ta̱ David kakura, ta̱ so̱ndíʼi se̱ʼe ta̱ Jesé (w17.12-S, página 14 xíʼin 15).

¿Á va̱ʼa kuʼvi̱-iniyó kuniyó miíyó?

Xíniñúʼu kuʼvi̱-iniyó kuniyó inkana táki̱ʼva kúʼvi̱-iniyó xíniyó miíyó (Mar. 12:31). Ta̱a ta̱ íyo ñá síʼí “xíniñúʼu kuʼvi̱-inira kunira ñá síʼíra nda̱a̱ táki̱ʼva kúʼvi̱-inira xínira miíra” (Efes. 5:28). Ta xíniñúʼu kiʼinyó kuenta su̱ví xa̱ʼa ña̱ kúni̱yó xíniyó miíyó iinlá mií kuitíyó kundi̱ʼi̱ní-iniyó xa̱ʼa (w18.01, página 23).

¿Ndáaña keʼéyó ña̱ va̱ʼa kuaʼnuyó xíʼin tu̱ʼun Ndióxi̱?

Ná kaʼviyó tu̱ʼun Ndióxi̱ ta ná ndakanixi̱níyó xa̱ʼa ña̱ káʼa̱nña, ná keʼéyó ña̱ sákuaʼayó. Ná kundiku̱nyó yichi̱ ña̱ táxi espíritu santo ta ná taxiyó chindeé táʼanna xíʼinyó ta ná taxiyó tixaʼvi ndaʼa̱na (w18.02, página 26).

Tá xa̱a̱ ni̱ka̱ʼa̱nyó xíʼin iinna ña̱ ku̱ʼu̱nyó veʼena ¿ndáaña xíniñúʼu keʼéyó?

Tá xa̱a̱ ni̱ka̱ʼa̱nyó xíʼin iinna ña̱ ku̱ʼu̱nyó veʼena xíniñúʼu sáxi̱nuyó tu̱ʼun ña̱ ni̱ka̱ʼa̱nyó (Sal. 15:4). Ni íxayo̱ʼvi̱ña xíʼinyó va̱ása va̱ʼa ndikó-iniyó. Sana na̱ ka̱na miíyó chi̱ka̱a̱nína ndée ña̱ keʼéna ña̱ kuxuyó (w18.03, página 18).

¿Ndáaña sákuaʼa na̱ kúúmií chiñu ti̱xin ñuu Ndióxi̱ xa̱ʼa ta̱ Timoteo?

Ta̱ Timoteo xi̱ndi̱ʼi̱ní-inira xa̱ʼa inkana ta xi̱ndi̱ʼi̱ní-inira xa̱ʼa chiñu Ndióxi̱. Ndeéní ka̱chíñura nu̱ú Jehová ta ke̱ʼéra ña̱ sa̱kuaʼara. Chi̱ka̱a̱ra ndée ña̱ sa̱kuaʼa mitúʼun miíkara xa̱ʼa Ndióxi̱ ta ka̱ndíxaníra espíritu santo Jehová. Su̱ví kuití na̱ anciano xíniñúʼu kundiku̱n yichi̱ ta̱ Timoteo chi ndiʼivayó kivi keʼéña (w18.04, página 13 xíʼin 14).