Sakuaʼaka ña̱ va̱ʼa sanáʼa̱kaún: taxi ña̱ libro Enseña

¿Nda̱chun sákuaʼakayó? Ña̱ libro Enseña kúú ña̱ xíniñúʼukayó tá ku̱a̱ʼa̱nyó servicio. Soo tá kúni̱yó kuniñúʼuyóña ña̱ sánáʼa̱yó na̱ yiví xa̱ʼa Biblia siʼna xíniñúʼu ndakooyóña ndaʼa̱na. Ña̱kán xíniñúʼu sakuaʼa va̱ʼayó ndáa ki̱ʼva taxiyóña (Prov. 22:29). Íyo ku̱a̱ʼá ña̱ keʼéyó ña̱ va̱ʼa taxiyóña ndaʼa̱na, soo xíniñúʼu ndaka̱xinyó ndáaña kúú mií ña̱ va̱ʼaka kuniñúʼuyó.

¿Ndáa ki̱ʼva keʼéyóña?

Keʼé iin pregunta xíʼinna iin ña̱ kútóona ná kooña ña̱kán va̱ʼa kuni̱na kaʼvina capítulo ña̱ káʼa̱n xa̱ʼaña. Va̱ʼa ndaka̱xiún iin pregunta ña̱ va̱xi nu̱ú kíxaʼá iin iin capítulo. Ta kundatún ná ka̱ʼa̱nna xíʼún ndáaña ndákanixi̱nína xa̱ʼaña, tándi̱ʼi kaʼviún iin texto nu̱úna, tasaátu va̱ʼa kaʼvi loʼondó iin párrafo ña̱ káʼa̱n xa̱ʼa ña̱yóʼo.
Inka ña̱ kivi keʼún kúúña kuniñúʼu pregunta ña̱ va̱xi nu̱ú kíxaʼá xa̱ʼa libro ta kivi na̱ʼún libro yóʼo nu̱úna ña̱ va̱ʼa ná kunina ndáaña káʼa̱n Biblia xa̱ʼaña. Tá kúú ná kixaʼún ka̱ʼún xíʼinna xa̱ʼa iin ña̱ ni̱ya̱ʼa nu̱ú noticia, kivi ka̱ʼún xíʼinna ku̱a̱ʼání na̱ yiví kéʼéna pregunta táʼan ña̱ va̱xi nu̱ú página 3 yóʼo. Inkatuña kivi keʼún kúúña ka̱ʼún xíʼinna ña̱ xíkaún nátúʼun xíʼin na̱ yiví xa̱ʼa ña̱ koo chí nu̱únínu. Na̱ʼa̱ na̱ʼná ña̱ va̱xi nu̱ú página 4 xíʼin 5 nu̱úna ta nda̱ka̱tu̱ʼunna: “¿Ndáa ña̱ va̱xi yóʼo kúni̱ún siʼna xi̱nu nu̱ú?”. Á kivitu ka̱ʼún xíʼinna ña̱ xíkaún iin rato loʼo nátúʼun xa̱ʼa ña̱ʼa ña̱ sándi̱ʼi̱-ini ndiʼiyó. Na̱ʼa̱ pregunta ña̱ va̱xi nu̱ú ndíʼi página 6 nu̱úna, ta ka̱ʼa̱n xíʼinna ná ka̱ʼa̱nna xíʼún ndáaña kúni̱na kunda̱a̱-inina xa̱ʼa.
Va̱ʼatu ndi̱ku̱n ka̱ʼún xíʼinna á kútóona sakuaʼana xa̱ʼa Biblia. Kivi ka̱ʼún ña̱yóʼo xíʼinna: “Xíkandi̱ táxindi̱ tutu yóʼo ndaʼa̱ ndiʼi na̱ táʼanyó ña̱ va̱ʼa sakuaʼana xa̱ʼa Biblia, ¿á xa̱xíniúnña? [Kundatún ná ndakuiinna]. Tá íyo loʼo tiempoún, kúni̱ na̱ʼi̱ nu̱ún nda̱saa va̱ʼa kuniñúʼúnña ña̱ kaʼviún Bibliaún”.

Keʼé ña̱yóʼo yo̱o̱ yóʼo:

Sakuaʼa kúeendóña xíʼin na̱ veʼendó.
Tá xítoún va̱ása xíín va̱ʼa na̱ yiví kuniso̱ʼona ña̱ káʼún xa̱ʼa xíʼinna, nasamaña.