¿Á xíniñúʼún tarjeta ña̱ káʼa̱n xa̱ʼa ña̱ ki̱ʼvina jw.org?

Ña̱ nátúʼunyó xa̱ʼa Ndióxi̱ xíniñúʼu kama ku̱ʼu̱nña nu̱úna, chi ña̱ gran tribulación xa̱a̱ kuyatinní va̱xiña (Pr 24:11, 12, 20). Ña̱ va̱ʼa chindeé táʼanyó xíʼin na̱ yiví ná kuniñúʼuyó ña̱ tarjeta ña̱ ki̱ʼvina jw.org, ña̱ va̱ʼa ndani̱ʼína nu̱ú va̱xi tu̱ʼun Ndióxi̱ nu̱ú Internet. Ña̱ tarjeta kúúmiíña código ña̱ video ¿Ndachun kaʼviyó Biblia? ta saátu káʼa̱nña xíʼinna tá kúni̱kana kunda̱a̱-inina á kúni̱tuna sakuaʼana xa̱ʼa Biblia ná ki̱ʼvina nu̱ú Internet. Íyo sava na̱ yiví va̱ása kútóona kaʼvina tutu ña̱ tává na̱ ñuu Ndióxi̱, soo kútóovana ki̱ʼvina nu̱ú jw.org. Xa̱ʼa ña̱yóʼo ná taxiyó iin tarjeta ndaʼa̱na. Na̱ yiví na̱ kǒo kútóo kuniso̱ʼo ña̱ káʼa̱n Biblia kǒo taxiyó tarjeta ndaʼa̱na.

Ndáaka míí nu̱ú ñúʼuyó, ña̱ va̱ʼa ná kutóo na̱ yiví sakuaʼana xa̱ʼa Ndióxi̱, kivi ka̱ʼa̱nyó ña̱yóʼo xíʼinna: “Kúni̱i̱ taxii̱ iin tarjeta loʼo ndaʼún. Nu̱ú ña̱yóʼo va̱xi sitio ña̱ Internet nu̱ú kivi sakuaʼún ku̱a̱ʼání ña̱ʼa xa̱ʼa Ndióxi̱ ta kivi kotondeʼún video, va̱ása chaʼviún xa̱ʼa ña̱yóʼo” (Jn 4:7). Ña̱ tarjeta yóʼo va̱ʼa ku̱ʼu̱nña xíʼinyó chi válívaña ta va̱ʼa taxiyóña ndaʼa̱ na̱ yiví tá kúni̱na sakuaʼana.