¿Á xítoyó ndiʼi ña̱ʼa ña̱ ke̱ʼé Ndióxi̱?

Tá xítoyó iin yita ña̱ liviní, á tá xítoyó ña̱ liviní ki̱mi íyo chí ndiví, á tá xítoyó nu̱ú liviní kóyo ti̱kui̱í ¿á ndákanixi̱níyó xa̱ʼa̱ Ndióxi̱ ta̱ ke̱ʼé ndiʼi ña̱yóʼo? Ndiʼi ña̱ʼa ña̱ ke̱ʼé Ndióxi̱ táxiña kúnda̱a̱-iniyó ña̱ ku̱a̱ʼání ña̱ va̱ʼa kúúmiíra (Ro 1:20). Tá távayó tiempo ña̱ ndákanixi̱níyó xíʼin ña̱ xítoyó ndiʼi ña̱ʼa ña̱ ke̱ʼé Jehová, kivi xa̱a̱yó kunda̱a̱-iniyó xa̱ʼa̱ ndiʼi ña̱ va̱ʼa kúúmiíra, ña̱ ku̱a̱ʼání ndee̱ kúúmiíra, ña̱ kúʼvi̱ní-inira xínira miíyó, ña̱ ndíchiníra, ña̱ nda̱kúní tíinra chiñu xíʼin ña̱ va̱ʼaní-inira (Sl 104:24).

¿Ndáa ña̱ʼa ña̱ ke̱ʼé Ndióxi̱ xítoún ndiʼi ki̱vi̱? Ni tá ñuu sáʼán íyoún xítoún saa á yitu̱n kúíi̱. Ña̱ kotoyó ndiʼi ña̱ʼa ña̱ ke̱ʼé Ndióxi̱ kivi chindeétáʼa̱nña xíʼinyó ña̱ kǒo ndi̱ʼi̱ní-iniyó xa̱ʼa̱ tu̱ndóʼo ña̱ ndóʼoyó, xíʼin ña̱ va̱ʼaníka xa̱a̱yó kandíxayó ña̱ mií Jehová kundaa miíyó ndiʼi tiempo (Mt 6:25-32). Tá íyo se̱ʼún, chindeétáʼan xíʼinna ná kunda̱a̱-inina xa̱ʼa̱ ndiʼi ña̱ va̱ʼa ña̱ kúúmií Jehová. Tá ná taxiyó tíxa̱ʼvi ndaʼa̱ Jehová xa̱ʼa̱ ndiʼi ña̱ʼa ña̱ ke̱ʼéra, va̱ʼaníka xa̱a̱yó kutáʼanyó xíʼinra (Sl 8:3, 4).

TÁNDI̱ʼI XI̱TONDÓ VIDEO NDIʼI ÑA̱ʼA ÑA̱ KE̱ʼÉ NDIÓXI̱ NDÁSAKÁʼNUÑARA: ÑA̱ LUZ XÍʼIN COLOR ÑA̱ XÍTOYÓ NDAKUIINNDÓ PREGUNTA YÓʼO:

• ¿Ndáaña kúúmií iin tá iin ña̱ʼa ta xa̱ʼa̱ ña̱yóʼo va̱ʼa xítoyó ku̱a̱ʼání nu̱ú color?

• ¿Ndáa ki̱ʼva kána color ña̱ táxa á ña̱ yéʼe̱?

• ¿Nda̱chun ku̱a̱ʼání nu̱ú color xítoyó chí ndiví?

• ¿Ndáa color ña̱ liviní kúú ña̱ xa̱a̱ xítoún yatin nu̱ú íyoún?

• ¿Nda̱chun xíniñúʼu taváyó tiempo ña̱ kotoyó ña̱ʼa ña̱ i̱xava̱ʼa Ndióxi̱?