Viíní ná kuniñúʼuyó tiempoyó ña̱ kaʼvi va̱ʼayó xa̱ʼa̱ tu̱ʼun Ndióxi̱

¿NDA̱CHUN XÍNIÑÚʼU KEʼÉYÓÑA? Tá ná kaʼvi va̱ʼayó tu̱ʼun Ndióxi̱ chindeétáʼanña xíʼinyó ña̱ va̱ʼa kunda̱a̱-iniyó xíʼin ña̱ nda̱a̱ “nda̱saa ndíka̱ña, nda̱saa kániña, nda̱saa súkunña ta nda̱saa kúnuña” (Ef 3:18). Chíndeétáʼantuña xíʼinyó ña̱ kǒo keʼéyó ña̱ yaku̱a̱ ña̱ kéʼé na̱ ñuyǐví yóʼo, ta saátu ña̱ kǒo sandákooyó tu̱ʼun Ndióxi̱ ña̱ taxi kutakuyó (Flp 2:15, 16). Tá káʼvi mitúʼunyó tu̱ʼun Ndióxi̱ xíniñúʼu ndakanixi̱níyó ndáaña xíniñúʼuyó ta ña̱kán ndaka̱xinyó kaʼviyó. ¿Nda̱saa kivi kuniñúʼu va̱ʼayó tiempoyó ña̱ sakuaʼayó xa̱ʼa̱ ña̱ káʼa̱n tu̱ʼun Ndióxi̱?

¿NDÁA KI̱ʼVA KEʼÉYÓÑA?

• Ná ndakaʼyíyó sava versículo ta ná taayó sava tu̱ʼun válí nu̱ú Biblia ña̱ xíniñúʼuyó tá káʼviyó, ni kúúña nu̱ú tutu á nu̱ú tableta á celular.

• Tá káʼviyó ná ndakanixi̱níyó xa̱ʼa̱ ña̱ káʼviyó ta ná nda̱ka̱tu̱ʼunyó miíyó “¿ndáana?”, “¿ndáaña?”, “¿ndáa míí?”, “¿ama?”, “¿nda̱saa?” xíʼin “¿nda̱chun?”.

• Ná nandukúyó xa̱ʼa̱ ndiʼi ña̱ kítáʼan xíʼinña. Kivi kuniñúʼuyó ndiʼi tutu ña̱ kúúmiíyó ña̱ va̱ʼa nandukúyó xa̱ʼa̱ iin tema á xa̱ʼa̱ iin versículo kuití.

• Ná ndakanixi̱níyó xa̱ʼa̱ ña̱ káʼviyó ndáa ki̱ʼva chindeéña miíyó.

• Ná keʼéyó ndiʼi ña̱ sákuaʼayó (Lu 6:47, 48).

TÁNDI̱ʼI XI̱TONDÓ VIDEO TÁ NÁ KAʼVI VA̱ʼAYÓ TU̱ʼUN NDIÓXI̱ VA̱ÁSA SANDÁKOOYÓÑA, NDAKUIINNDÓ PREGUNTA YÓʼO:

• ¿Ndáaña káʼa̱n savana xa̱ʼa̱ ña̱ kaʼviyó tu̱ʼun Ndióxi̱?

• ¿Nda̱chun xíniñúʼu ka̱ʼa̱nyó xíʼin Ndióxi̱ tá kúma̱níka kixáʼayó kaʼviyó?

• ¿Ndáaña kivi chindeétáʼan xíʼinyó ña̱ va̱ʼaka kunda̱a̱-iniyó xíʼin ña̱ káʼa̱n iin texto ña̱ va̱xi nu̱ú Biblia?

• ¿Ndáaña kivi kaʼyíyó nu̱ú Biblia ña̱ xíniñúʼuyó tá káʼviyó?

• ¿Nda̱chun ndáyáʼviní ndakanixi̱níyó xa̱ʼa̱ ña̱ káʼviyó nu̱ú tu̱ʼun Ndióxi̱?

• ¿Ndáaña xíniñúʼu keʼéyó xíʼin ña̱ʼa ña̱ sákuaʼayó?