¿Ndáa ki̱ʼva sánáʼa̱ na̱ testigo Jehová na̱ yiví?
Na̱ testigo Jehová íyo iin ki̱ʼva ña̱ va̱ʼaní sánáʼa̱na na̱ yiví ña̱ va̱ʼa sakúaʼana ña̱ sánáʼa̱ Biblia. Programa ña̱ kúúmiíndi̱ ña̱ káʼvindi̱ Biblia kivi chindeétáʼanña xíʼún ña̱ kuumiíún ña̱yóʼo:
Si̱í koún xíʼin na̱ veʼún.
Koún migo Ndióxi̱.
Sakúaʼún ña̱ káʼa̱n Biblia xa̱ʼa̱ ña̱ koo chí nu̱únínu.
Nu̱ú ña̱ página yóʼo ndakuiinyó pregunta ña̱ va̱xi yóʼo:
Tá ná kixáʼíi̱ kaʼvii̱ Biblia, ¿á xíniñúʼu xa̱i̱ koi̱ testigo Jehová?
Tá xa̱a̱ ka̱ʼvii̱ Biblia xíʼin na̱ testigo Jehová tá ya̱chi̱, ¿á kivi ndikó tukui̱ kaʼvii̱?
¿Á kúúmiína iin ki̱ʼva ña̱ kaʼvii̱ Biblia tá va̱ása kúni̱i̱ ña̱ kaʼvi iinna xíʼi̱n?
¿Ndáa ki̱ʼva káʼvindi̱ xíʼin na̱ yiví xa̱ʼa̱ Biblia?
Iin na̱ testigo Jehová sanáʼa̱na yóʼó xa̱ʼa̱ iin tá iin ña̱ káʼa̱n Biblia xa̱ʼa̱. Ña̱ va̱ʼa sanáʼa̱na yóʼó xa̱ʼa̱ Biblia kuniñúʼuna ña̱ naní Kivi koo si̱íún vitin ta saátu chí nu̱únínu, loʼo tá loʼo sakúaʼún ndáaña sánáʼa̱ Biblia ta kotoún ndáa ki̱ʼva chíndeétáʼanña xíʼún. Tá kúni̱kaún kunda̱a̱-iniún xa̱ʼa̱ ña̱yóʼo, koto video yóʼo.
¿Á xíniñúʼu chaʼviyó xa̱ʼa̱ña?
Va̱ása. Ndi̱ʼi̱ na̱ testigo Jehová kéʼéndi̱ ña̱ ni̱ka̱ʼa̱n ta̱ Jesús xíʼin na̱ discípulora tá ka̱chira: “Va̱ása níchaʼvindó xa̱ʼa̱ ña̱yóʼo, ña̱kán va̱ása ndukúndó ña̱ʼa nu̱úna” (Mateo 10:8). Va̱ása chaʼviún na̱ sanáʼa̱ yóʼó. Ta saátu va̱ása chaʼviún xa̱ʼa̱ ni iin ña̱ kuniñúʼuna ña̱ sanáʼa̱na yóʼó, tá kúú Biblia xíʼin tutu ña̱ naní Kivi koo si̱íún vitin ta saátu chí nu̱únínu.
¿Nda̱saa tiempo káʼvina xíʼin na̱ yiví?
Ña̱ káʼvina xíʼin na̱ yiví kúúmiíña 60 lección. Kivi kúee á kama kaʼviún, nda̱a̱ táki̱ʼva kúni̱ miíún. Ku̱a̱ʼání na̱ yiví iin lección káʼvina iin semana á inkatuna ku̱a̱ʼákaña káʼvina.
¿Ndáa ki̱ʼva kixáʼíi̱ kaʼvii̱?
1. Sandákutú iin tutu nu̱ú internet. Kuniñúʼundi̱ ña̱ ka̱ʼyíún yóʼo ña̱ va̱ʼa ka̱ʼa̱n iin na̱ testigo Jehová xíʼún.
2. Na̱ sanáʼa̱ yóʼó xa̱ʼa̱ Biblia ka̱ʼa̱nna xíʼún. Ka̱ʼa̱nna xíʼún ndáaña va̱ʼa ndakiʼún tá ná ka̱ʼviún Biblia ta saátu ndakuiinna ña̱ kúni̱ún kunda̱a̱-iniún xa̱ʼa̱.
3. Miíún xíʼin na̱ sanáʼa̱ yóʼó kindo̱ondó ndáa ki̱ʼva kaʼvindó. Kivi ku̱ʼu̱nna kotona yóʼó á ka̱ʼa̱nna xíʼún xíʼin teléfono, videollamada, correo á iin correo electrónico. Sana ki̱ʼva iin hora kaʼvina xíʼún, soo kivi kooña ku̱a̱ʼáka á loʼoka nda̱a̱ nda̱saa tiempo kúúmií miívaún.
¿Á kivi kotoi̱ ndáa ki̱ʼva káʼvina xíʼin na̱ yiví?
Kiviva. Soo xíniñúʼu sandákutún iin tutu nu̱ú internet. Tá ná ka̱ʼa̱n na̱ testigo Jehová xíʼún, ka̱ʼa̱n xíʼinna ña̱ iin yichi̱ kuití kúni̱ún kaʼviún ña̱ va̱ʼa kotoún á kútóún ña̱yóʼo á va̱ása. Ta saá kuniñúʼuna folleto ña̱ naní Kivi koo si̱íún vitin ta saátu chí nu̱únínu, ña̱ va̱ʼa kaʼvina xíʼún ta ña̱yóʼo kúúmiíña u̱ni̱ lección.
Tá ná kixáʼíi̱ kaʼvii̱ Biblia, ¿á xíniñúʼu xa̱i̱ koi̱ testigo Jehová?
Va̱ása. Na̱ testigo Jehová kútóonína kaʼvina Biblia xíʼin na̱ yiví, soo va̱ása íxandúxana xíʼinna ña̱ nduuna testigo Jehová. Ña̱ kéʼéna kúú, xíʼin ña̱ to̱ʼó káʼa̱nna xíʼinna ña̱ sánáʼa̱ Biblia, ta xíni̱na ña̱ iin tá iin na̱ yiví kúúmiína derecho ña̱ ndaka̱xinna ndáaña kúni̱na kandíxana (1 Pedro 3:15).
¿Á kivi kuniñúʼi̱ Biblia miíi̱?
Kiviva. Kivi kuniñúʼún nda̱a̱ ndáaka Biblia kúni̱ miíún. Soo ndi̱ʼi̱ na̱ testigo Jehová kútóokandi̱ kuniñúʼundi̱ Biblia ña̱ naní Traducción del Nuevo Mundo, chi va̱ása yo̱ʼvi̱ káʼa̱nña ta káxi káʼa̱nña. Kúnda̱a̱-inindi̱ ku̱a̱ʼání na̱ yiví kútóona kuniñúʼuna Biblia ña̱ xa̱a̱ xíni̱na.
¿Á kivi koo inkana xíʼi̱n tá ná kaʼvii̱?
Kiviva. Kivi ka̱ʼún xíʼin ndiʼi na̱ veʼún á nda̱a̱ ndáaka na̱ migoún.
Tá xa̱a̱ ka̱ʼvii̱ Biblia xíʼin na̱ testigo Jehová tá ya̱chi̱, ¿á kivi ndikó tukui̱ kaʼvii̱?
Kiviva. Ta sana nda̱a̱ kutóokaúnña vitin nu̱úka tá ya̱chi̱. Na̱sama ki̱ʼva ña̱ káʼvindi̱ xíʼin na̱ yiví ña̱ va̱ʼa chindeétáʼanndi̱ xíʼinna. Chi vitin nátúʼun u̱vi̱ saándó, nátúʼun na̱ sánáʼa̱ yóʼo ta saátu miíún. Ta íyo ku̱a̱ʼáka video kotoún ta saátu na̱ʼná, xa̱ʼa̱ ña̱yóʼo síínva íyo ña̱ káʼvindi̱ vitin nu̱úka ña̱ xi̱kaʼvindi̱ xíʼinna tá ya̱chi̱.
¿Á kúúmiína iin ki̱ʼva ña̱ kaʼvii̱ Biblia tá va̱ása kúni̱i̱ ña̱ kaʼvi iinna xíʼi̱n?
Íyovaña. Ku̱a̱ʼáka na̱ yiví kamaka sákuaʼana tá íyo iin na̱ chíndeétáʼan xíʼinna, ta inkana siʼna kutóona kaʼvi miína ña̱yóʼo. Nu̱ú táʼví ña̱ naní “Ayudas para estudiar la Biblia” nu̱ú ña̱yóʼo íyo ku̱a̱ʼání ña̱ kivi kuniñúʼún ta kǒo xu̱ʼún chaʼviún xa̱ʼa̱ña ta kivi chindeétáʼanña xíʼún. Ña̱yóʼo kúú savaña:
Videos sobre la Biblia. Ña̱yóʼo sánáʼa̱ña ña̱ káʼa̱n Biblia xa̱ʼa̱.
Ña̱ kúni̱na ku̱nda̱a̱-inina xa̱ʼa̱ Biblia. Ña̱yóʼo kúú sava ña̱ ndákuiin ña̱ káʼa̱n xa̱ʼa̱ Biblia.
Textos bíblicos explicados. Kunda̱a̱-iniún ña̱ kúni̱ kachi sava texto ña̱ va̱xi nu̱ú Biblia ña̱ xíni̱nína xa̱ʼa̱.