¿Á kivi ku̱a̱ʼáka tiempoyó xíʼin ndee̱yó taxiyó ndaʼa̱ Jehová?

Ta̱ profeta Isaías ni̱ka̱ʼa̱nra ña̱ ku̱a̱ʼání koo na̱ ndasakáʼnu Ndióxi̱ tiempo vitin, ta xa̱a̱ saá ku̱a̱ʼání ndu̱uyó tiempo vitin (Is 54:2). Xa̱ʼa̱ ña̱yóʼo xíniñúʼukayó ku̱a̱ʼáka salón nu̱ú ndátakayó, salón ña̱ Asamblea savaka veʼe ña̱ xíniñúʼuna ti̱xin Betel. Tá ndíʼi kúva̱ʼa ña̱yóʼo, xíniñúʼu kiʼinníyó kuenta xíʼinña ña̱ viíní ná kooña, ta tá yáʼa tiempo ndásava̱ʼana sava ña̱yóʼo ña̱ vií kooña. Ta xíniñúʼu chindeétáʼanyó xíʼin na̱ hermano tá ndásava̱ʼana sava ña̱ veʼe yóʼo, chi saá kúú ña̱ taxiyó ndee̱yó xíʼin tiempoyó ndaʼa̱ Jehová. Ná ka̱ʼa̱nyó xa̱ʼa̱ sava ña̱yóʼo:

• Kivi chindeétáʼanyó xiʼin na̱ grupoyó ña̱ ndatiʼvíyó á ndasaviíyó ti̱xin veʼe nu̱ú ndáku̱táʼanyó.

• Kivi sákuaʼayó ndáa ki̱ʼva keʼéyó sava chiñu ti̱xin veʼe nu̱ú ndáku̱táʼanyó ña̱ va̱ʼa limpio koo iniña.

• Kivi sándakutúyó ña̱ Solicitud de voluntario local de diseño y construcción (DC-50) ña̱ va̱ʼa chindeétáʼanyó xíʼin na̱ hermano na̱ kéʼé táʼan chiñu yóʼo, tá kúú ti̱xin congregación nu̱ú ñúʼuyó á nu̱ú kéʼéna veʼe.

• Va̱ʼatu sándakutúyó ña̱ Solicitud para el programa de voluntarios (A-19) ña̱ va̱ʼa kachíñuyó loʼo tiempo á ku̱a̱ʼá tiempo ti̱xin Betel á ti̱xin oficina ña̱ traducción ña̱ íyo yatin ñuu nu̱ú íyoyó.

TÁNDI̱ʼI XI̱TONDÓ IIN TÁʼVÍ LOʼO ÑA̱ VIDEO IIN PROYECTO XA̱Á ÑA̱ KEʼÉYÓ, NDAKUIINNDÓ PREGUNTA YÓʼO:

• Nani tá 2014, ¿ndáa ki̱ʼva ki̱xáʼayó xíniñúʼuníkayó video?

• Ña̱ va̱ʼa kuva̱ʼa ndiʼi video ña̱ xíniñúʼuyó, ¿ndáa proyecto ña̱ construcción kúú ña̱ kéʼé na̱ ñuu Ndióxi̱, ta nda̱saa tiempo saá xa̱a̱ña xi̱nuuña?

• ¿Nda̱saa keʼéyó ña̱ va̱ʼa chindeétáʼanyó xíʼin na̱ hermano ti̱xin ña̱ proyecto yóʼo?

• Tá kúni̱yó chindeétáʼanyó xíʼin na̱ hermano ña̱ kuva̱ʼa ña̱ veʼe chí Rámapo, ¿nda̱chun xíniñúʼu sándakutúyó ña̱ solicitud DC-50 ta kachíñuyó xíʼin na̱ LDC?

• ¿Ndáaña náʼa nu̱úyó ña̱ mií Jehová kúú ta̱ chíndeétáʼan xíʼin na̱ hermano ña̱ keʼéna chiñu yóʼo?

• ¿Ndáa ki̱ʼva chindeétáʼanyó xíʼin na̱ hermano nu̱ú kúva̱ʼa ña̱ veʼe yóʼo tá kǒo kíví ku̱ʼu̱nyó?