ÑA̱ KÉʼÉYÓ NA̱ TESTIGO
Táki̱ʼva xíto Jehová miíyó saá ná kotoyó miíyó
Jehová kúsi̱íní-inira xíʼin na̱ ñuura (Sl 149:4). Ni kúúyó na̱ yiví ku̱a̱chi, kǒo sási ña̱yóʼo nu̱úra ña̱ kotora ña̱ va̱ʼa ña̱ kúúmiíyó xíʼin ña̱ kivi keʼéyó. Soo sana ixayo̱ʼvi̱ña xíʼinyó kotoyó miíyó nda̱a̱ táki̱ʼva xíto Jehová miíyó. Sana i̱xandi̱va̱ʼana xíʼinyó á sana ke̱ʼéyó iin ña̱ va̱ása va̱ʼa xi̱naʼá ta xa̱ʼa̱ ña̱yóʼo ndákanixi̱níyó ña̱ kǒo ndáyáʼviyó ta saátu ña̱ va̱ása xíniñúʼu kuʼvi̱-ini Jehová kunira miíyó. Tásaá ndóʼún, ¿ndáaña kivi chindeétáʼan xíʼún?
Ná ndakaʼányó chi su̱ví nda̱a̱ táki̱ʼva xíto miíyó na̱ yiví ña̱ʼa, saá xíto Jehová ña̱yóʼo (1Sa 16:7). Tá xíto Jehová miíyó, ku̱a̱ʼání ña̱ va̱ʼa ña̱ kúúmiíyó kíʼinra kuenta xíʼin ta sana miíyó ni kǒo kíʼinyó kuenta xíʼin ña̱yóʼo. Ta tá ná káʼviyó Biblia saá kúú ña̱ kunda̱a̱-iniyó ndáa ña̱ʼa kúú ña̱ kíʼinra kuenta xíʼin. Tá ná kaʼviyó sava versículo á inkaka ña̱ káʼa̱n xa̱ʼa̱ na̱ ni̱xi̱yo xi̱naʼá, saá kivi kunda̱a̱-iniyó ña̱ kúʼvi̱ní-ini Jehová xínira na̱ ndásakáʼnu miíra.
TÁNDI̱ʼI XI̱TONDÓ VIDEO ÑA̱ NANÍ NÁ KANDÍXAYÓ ÑA̱ XA̱A̱ I̱XAKÁʼNU-NI JEHOVÁ XA̱ʼA̱YÓ, NDAKUIINNDÓ PREGUNTA YÓʼO:
¿Ndáaña sákuaʼayó xa̱ʼa̱ Jehová xíʼin ejemplo iin ta̱ loʼo ta̱ xínu xíʼin ña̱ ke̱ʼé yivára xíʼinra?
Tá iinna ni̱ki̱ʼvina iin ku̱a̱chi ndeé nu̱ú Jehová soo xa̱a̱ chi̱kaa̱na ndee̱ ña̱ ndi̱kóna nu̱úra, ¿ndáaña kivi chindeétáʼan xíʼinna ña̱ kandíxana ña̱ xa̱a̱ i̱xakáʼnu-ini Jehová xa̱ʼa̱na? (1Jn 3:19, 20).
Tá ka̱ʼvi ta̱ hermano yóʼo xa̱ʼa̱ ta̱ David xíʼin xa̱ʼa̱ ta̱ Jehosafat ta nda̱kanixi̱níra xa̱ʼa̱ na̱yóʼo, ¿ndáa ki̱ʼva chi̱ndeétáʼanña xíʼinra?